Адыгеим икомандэу «АГУ-Адыифым» зэнэкъокъум ипэшIоры­гъэшъ едзыгъо ятIонэрэ текIоныгъэр къыщыдихыгъ.

Типшъашъэхэр «Ставропольем» текIуа­гъэх, пчъагъэр 28:24. Тикомандэ анахь къахэщыгъэр Алиса Дворцевая, ащ гъогогъуи 10 Iэгуаор хъагъэм дидзагъ.

— БлэкIыгъэ ешIэгъоу «Ставропольем» дытиIагъэм Iэгоуи 8-кIэ ыпэ титэу кIэухым тшIуихьын ылъэкIыгъ. Ар къин къытщыхъугъ. Хэукъоныгъэу тшIыгъэхэр зэфэтхьысы­жьыгъэх, ятIонэрэ зэIукIэгъум тишъыпкъэу текIоныгъэм тыфэбэнагъ ыкIи ар къыддэ-хъугъ. АщкIэ командэм хэтхэм, анахьэу къэ­лэпчъэIутэу Регина Якуповам ыкIи Диана Казихановам, инэу сафэраз. БэшIагъэу сызкIэхъопсыщтыгъэр къыздэхъугъ — зы ешIэгъум Iэгоуи 10 дэсыдзагъ, — къыIуагъ Алиса Дворцеваям.

КъыкIэлъыкIощт ешIэгъур «АГУ-Адыифым» Москва щыриIэщт, чIыпIэ командэу «Лучым» IукIэщт. Ащ текIоныгъэр къызщыдихыкIэ купэу «Б-м» щешIэхэрэм ящэнэрэ чIыпIэр щызыIыгъым нахь пэблагъэ хъущт. Китай икомандэу «Феникс» зыфиIорэм джыдэдэм очкоуи 6-кIэ ыуж ит.