Мыекъопэ къэлэ администрацием физическэ культурэмкIэ ыкIи спортымкIэ и Комитет кIэщакIо зыфэхъугъэ Iофтхьабзэу «Жэжъые биатлон» зыфиIорэр ящэнэрэу Адыгеим икъэлэ шъхьаIэ щыкIуагъ. Мыщ зыщызыушэтын гухэлъ зиIэхэм пэшIорыгъэшъэу ялъэIу тхылъхэр къагъэхьыгъэх, зэкIэмкIи командэ 50 фэдиз ащ хэлэжьагъ.

Шъугу къэдгъэкIыжьын, «Жэ­жъые биатлоныр» апэрэу 2021-рэ илъэсым зэхащагъ. Джащыгъум биатлоным шапхъэу пылъхэр агъэфедэхэзэ жэжъыехэмкIэ уна­гъохэм язэнэкъокъу рагъэкIо­кIынэу рахъухьагъ.

ЗэхэщакIохэм зэрагъэнэфа­гъэу, командэм нэбгыри 2 хэт. Шъхьа­фэу зэнэкъокъугъэх бзылъфыгъэ ыкIи хъулъфыгъэ, зэхэгощэгъэ ыкIи кIэлэцIыкIу командэхэр.

Iофтхьабзэр зыщыкIуагъэр республикэ шахмат клубым къыпэIулъ чIыпIэр ары.

Мы мафэм чъыIагъэ нахь мышIэми, командэхэм алъэкI къагъэнагъэп, кIуачIэу яIэр, спортым зэрэфэщагъэхэр къагъэлъэгъуагъ. ЗэхэщакIохэм агъэнэфэгъэ шапхъэхэм адиштэу командэ тIурытIу зэнэкъокъущтыгъ. Жэ­жъыехэм арысхэу ахэм метрэ 200 къачъыгъ, хагъэунэфыкIырэ чIыпIэхэм яшъыпкъэу афэбэнагъэх.

Зэнэкъокъум къызэрэщыдэ­лъытагъэмкIэ, командэм хэтхэм язым жэжъыер ыщэн, адрэр оскIэ щэрыон фэягъ. БлэукIыхэрэм тазыр атыралъхьэщтыгъ, метрэ 30 фэдиз лыеу къачъыщтыгъ.

Жэжъые биатлоным хэлэжьагъэхэм язэфэхьысыжьхэр зэфэмыдэх нахь мышIэми, ахэр зэ­рэгъэчэфыгъэх, япсауныгъэ агъэ­­пытагъ. Ары зэхэщакIохэм пшъэ­рылъ шъхьаIэу яIагъэри.

Iофтхьабзэм зыщызыушэтыгъэ­хэм торт ин афарагъэшIыгъ, ар зэкIэми афикъугъ. Джащ фэдэу текIоныгъэр ыкIи хагъэунэфыкIырэ чIыпIэхэр къыдэзыхыгъэхэм кубокхэр, дипломхэр ыкIи шIухьаф­тынхэр афагъэшъошагъэх.

ТекIоныгъэр къыдэзыхыгъэ командэхэр: «Крутые пацаны» (Максим Соломкиныр ыкIи Дмитрий Пономаревыр), «Снежки» (Татьяна ыкIи София Новиковхэр), «Команда» (Олег Денда ыкIи Юлия Мелентьевар), «Ратник» (Сергей ыкIи Ратибор Кожубековхэр), «Жуковы» (Игорь ыкIи Дмитрий Жуковхэр).