КIэлэеджакIохэм язэнэкъокъу
КIэлэеджакIохэм азыфагу шахматхэмкIэ зэхащэгъэ Спартакиадэм иапэрэ зэфэхьысыжьхэр ашIыгъэх.
Мэфищрэ кIогъэ зэнэкъокъухэм апэрэ купым хэтыгъэ команди 9 ащызэIукIагъэх, ахэр зэкIэмкIи нэбгырэ 50 фэдиз хъущтыгъэх. Зы мафэм ешIэгъу щырыщ яIагъ. Анахь дэгъоу зыкъэзыгъэлъэгъуагъэхэр лицееу N19-м икIэлэеджакIохэр ары. Мыхэм яIэгъэ зэIукIэгъухэр зэкIэ къахьыгъэх. Командэм хэтыгъэх Максим Балабуевыр, ХьатхьакIумэ Адам, Сапый Атмир, Бзэджэжъыкъо Маринэ, Глеб Смирновыр, Екатерина Козырьковар. ЯтIонэрэ хъугъэх гурыт еджапIэу N 17-м илIыкIохэр, ящэнэрэ чIыпIэр къыдихыгъ лицееу N 8-м икомандэ.
ЯтIонэрэ купым хэтхэр джы зэнэкъокъущтых, ащ ыуж Спартакиадэм изичэзыу едзыгъо щэрыонымкIэ лъагъэкIотэщт.