Адыгэ Республикэм футболымкIэ изэIухыгъэ кIымэфэ зэнэкъокъу къыдыхэлъытэгъэ ешIэгъухэр неущ зэхащэщтых. Апэрэ купым хэт командэхэм я 11-рэ турэу яIэщтыр гъэшIэгъон зэрэхъущтым щэч хэлъэп.

Командэу «Ошъутенэр» апэрэ чIыпIэм уцужьынымкIэ амалышIу­хэр иIэх, ащ пае Мыекъопэ районым икомандэу «Тульскэм» текIон фае. ЕшIэгъур пчэдыжьым сыхьатыр 10-м рагъэжьэщт. Апэрэ купым хэт командэхэм джыри ешIэгъу заулэ къафэнагъ, ахэм зэфэхьысыжьэу афэхъухэ­рэм елъытыгъэу текIоныгъэр ыкIи хагъэунэфыкIырэ чIыпIэхэр къыдэзыхыгъэхэр къэнэфэщтых. Командэхэм очко пчъагъэу рагъэкъугъэр:

Спортмастер-2 — 26, Ошъутен — 24, Легион — 19, МФОК-у «Ошъутен» — 19, Спортмастер — 16, Тульскэр — 16, Кавказ — 12, Юг-Авто — 12, Делотехника — 9, СШОР-2007 — 7, Сокол — 7, СШОР-2008 — 1, Альянс — 0.

Я 11-рэ турым (мэзаем и 11-м) зэдешIэщтхэр:

Ошъутен — Тульскэр, Легион — Юг-Авто, Сокол — Кавказ, СШОР-2008 — Альянс, Делотехника — Спортмастер, МФОК-у «Ошъутен» — СШОР-2007.