Мыекъуапэ осыр бэрэ щыплъэгъущтэп. Мы мафэхэм республикэм икъэлэ шъхьаIэ къызэрэщесыгъэр къызфигъэфеди Мыекъопэ къэлэ администрацием физическэ культурэмкIэ ыкIи спортымкIэ и Комитет Iофтхьабзэу «Жэжъые биатлон» зыфиIорэр зэхищэнэу рихъухьагъ. Ар мэзаем и 11-м рагъэкIокIыщт, фаехэр зэкIэ хэлэжьэнхэ алъэкIыщт.

«Жэжъые биатлоныр» 2021-рэ илъэсым мэзаем и 16-м апэрэу Мыекъуапэ щызэхащэгъагъ. Мы уахътэм осышхо щыIагъ ыкIи биатлонымкIэ дунэе чемпионатыр Словением щыкIощтыгъ. Джащыгъум биатлоным шапхъэу пылъхэр агъэфедэхэзэ жэжъыехэмкIэ уна­гъохэм язэнэкъокъу рагъэкIокIы­нэу рахъухьагъ.

ЗэхэщакIохэм зэрагъэнэфагъэу, командэм нэбгыри 2 хэтыщт. Шъхьафэу зэнэкъокъущтых бзылъфыгъэ ыкIи хъулъфыгъэ, зэхэгощэгъэ ыкIи кIэлэцIыкIу командэхэр. Ахэр жэжъыехэм арысхэу метрэ 200 къачъын фае. Джащ фэдэу щытхэу оскIэ гъогогъуитIо щэрыощтых. БлэукIыхэрэм тазыр атыралъхьащт, метрэ 30 фэдиз лыеу къачъыщт.

Iофтхьабзэр зыщыкIощтыр рес­публикэ щахмат клубым къыпэIулъ чIыпIэр ары (узэрэдэхьащтыр урамэу Гагариным ыцIэ зыхьырэм дэжь). ТекIоныгъэр ыкIи хагъэ­унэфыкIырэ чIыпIэхэр къыдэзыхыгъэхэм кубокхэр, дипломхэр ыкIи медальхэр афагъэшъошэщтых.

ЗэхэщакIохэм зэнэкъокъум хэлажьэхэрэм зэкIэми жэжъыехэр аратыщтых.