Художественнэ гимнастикэмкIэ Къыблэ ыкIи Темыр-Кавказ федеральнэ шъолъырхэм я Первенствэ Адыгэ Республикэм ихэшыпыкIыгъэ командэ чанэу хэлэжьагъ ыкIи типшъашъэхэм гъэхъэгъэшIухэр ашIыгъэх.

Къалэу Налщык щыкIогъэ зэ­нэкъокъухэм спортсменкэ 600-м ехъу ахэлэжьагъ, ахэм илъэси 10-м щегъэжьагъэу 15-м нэс аныбжь. Спортым имастер хъунхэмкIэ кандидатхэм якъыхэхынкIэ ыкIи апэрэ разрядымкIэ щыIэ программэхэм къадыхэлъытагъэу пшъашъэхэр тынхэм афэбэна­гъэх.

Адыгеир зэрифэшъуашэу къагъэлъэгъуагъ Мыекъопэ СШОР N 2-м зыщызыгъасэхэрэ Милена Капковам, Дарья Ларионовам, Анна Алексеевам, Милана Матевосян, Мырзэ Самилэ, Елизавета Годынюк, Анастасия Червяковам, Нина Коробовам, Карина Сильченкэм, Арина Щербаневам, Сихъу Данэ.

Купхэм язэнэкъокъухэм Адыгеим ихэшыпыкIыгъэ командэ я 18-рэ чIыпIэр къыщыдихыгъ, зэкIэмкIи командэ 78-рэ зэрэхъу­щтыгъэхэр. ШъхьэзакъохэмкIэ типшъашъэхэмкIэ анахь къахэщыгъэр, дэгъоу зыкъэзыгъэлъэгъуагъэр Милена Капковар ары. Ащ я 18-рэ чIыпIэр къыдихыгъ ыкIи Урысыем и Первенствэ хэлэжьэн амал иIэ хъугъэ. Ар мэзаем и 12-м щыублагъэу и 23-м нэс Москва щыкIощт.

Командэр агъэхьазырыгъ тренер шъхьаIэу, Урысыем спортымкIэ имастерэу Яна Цеханович, Яна Кост ыкIи Людмила Кошевам. Типшъашъэхэм тапэкIи тагъэ­гушIонэу, гъэхъэгъэшIухэр ашIынхэу афэтэIо.