ХоккеимкIэ мыекъопэ клубэу «Титан» зыфиIорэм хэтхэмрэ ащ итренерхэмрэ Адыгеим и ЛIышъхьэу КъумпIыл Мурат аIукIагъ ыкIи гущыIэгъу афэхъугъ.

Шъугу къэтэгъэкIыжьы: Адыгэ Респуб­ликэм и ЛIышъхьэ «Линие занкIэу» тапэкIэ иIагъэм илъэхъан клубым хэтхэм ащыщхэм республикэм хоккеим хэхъоныгъэ зэрэщишIырэм, мылылъэ унэ зэрафашIыгъэм апае зэрэфэразэхэр къыраIогъагъ, тренировкэхэм ыкIи зэнэкъокъухэм къякIолIэнэуи къырагъэб­лэгъагъ.

ЗэIукIэгъур Мылылъэ унэу «Ошъутенэм» щыкIуагъ ыкIи хоккеим Адыгеим хэхъоныгъэ щишIыным, IэпэIэсэныгъэ зыхэлъ спортсменхэм IэпыIэгъу аратыным ыкIи нэмыкIхэм япхыгъэ Iофыгъохэм афэгъэхьыгъагъ. Мы зэдэгущыIэгъум хэлэжьагъ Адыгэ Республикэм физическэ культурэмкIэ ыкIи спортымкIэ и Комитет итхьаматэу Дэгужъые Мурат.

«Титаным» гъогоу къыкIугъэм ыкIи гъэхъагъэу иIэхэм афэгъэхьыгъэу къы­Iотагъ Адыгэ Республикэм хоккеимкIэ и Федерацие ипрезидентэу КIыкI Ахьмэд. Ежьхэм яшIоигъоныгъэкIэ зыхэхьэгъэхэ клубыр 2016-рэ илъэсым къыщыубла­гъэу щыI. Ащ къыщегъэжьагъэу республикэм инэмыкI чIыпIэхэм тренировкэхэр ащашIыхэу рагъэжьэгъагъ. 2020-рэ илъэ­сым мылылъэ аренэу «Ошъутенэр» къызызэIуахым зэнэкъокъухэмрэ тренировкэхэмрэ зыщыкIощтхэ чIыпIэ клубым иIэ хъугъэ.

Непэ Адыгеим команди 7 иI: «Титан 18+», «Титан 40+», «Нартыр», «Трудовые резервы», «Сапсан», «Динамо 18+», «Динамо 40+». Ахэр зэкIэ ахэлажьэх «Ночная лига» зыфиIорэ джэгунхэм. Нэбгырэ 80 фэдиз мэхъух спортсменхэу ахэм ахэтхэр.

Республикэм щыпсэурэ пстэуми хоккеим пылъмэ зышIоигъоу ахэтхэм джы мылылъэ унэр къызфагъэфедэн алъэ­кIыщт. «Ошъутенэм» кIэлэцIыкIу секциехэр къыщызэIуахыгъэх, спортсмен ныбжьыкIи 150-м ехъу ахэм якIуалIэ.

Адыгэ Республикэм и ЛIышъхьэу КъумпIыл Мурат къызэрэхигъэщыгъэмкIэ, республикэм щыпсэухэрэми ащ ихьа­кIэхэми хоккей ешIапIэр агу рехьы, зэрэунагъоу къекIуалIэхэуи къыхэкIы. «ЦIыфхэм зыщагъэпсэфынымкIи, фигурнэ катанием, хоккеим апылъынхэмкIи мылылъэ унэм ишIогъэшхо къэкIо. КIэлэцIыкIубэ секциехэм къякIуалIэ. Арышъ, мыщ фэдэ ятIонэрэ псэуалъэм ишIын иIофыгъо тыхэплъэ», — къыIуагъ КъумпIыл Мурат.

Адыгеим и ЛIышъхьэ хоккеистхэм заIокIэм «любительскэкIэ» заджэхэрэ спортым хэхьанхэу къызхэкIыгъэмкIэ яупчIыгъ. Мыщ къекIуалIэрэм инахьыбэр аныбжь икъугъэу конькихэм атеуцуагъэх, респуб­ликэм апэрэ мылылъэр иIэ зэхъур ары зыкъызэIуахын, амалэу яIэхэр къагъэлъэгъонхэ залъэкIыгъэр.

Джырэ уахътэм диштэрэ псэолъэ дэгъу зэраригъэшIы­гъэм пае республикэм и ЛIышъхьэ зэрэфэразэхэр клубым хэт­хэм къаIуагъ ыкIи КъумпIыл Мурат къыратыгъ клубым ыцIэ зытетхэгъэ кофтэ хъагъэр. Джащ фэдэу Адыгеим и ЛIышъхьэ ишIухьафтын икъыдэхын тегъэ­псыхьэгъэ республикэ зэнэкъо­къу илъэс къэс зэхащэзэ ашIы­нэу спортсменхэм игъоу зэралъэгъурэр къаIуагъ. КъумпIыл Мурати ащ дыригъэштагъ ыкIи комитетым пшъэ­рылъ гъэнэфагъэхэр фишIыгъэх. НэмыкI шъолъырхэми якомандэхэм зэнэкъокъу ешIэгъухэр адызэхащэхэзэ ашIыным иамали тегущыIагъэх.

ШъушIэным пае: федеральнэ проектэу «Спортыр — щыIэныгъэм ишапхъ» зыфиIорэр пхырыщыгъэным къыдилъытэрэ лъэныкъохэм зыкIэ ащыщэу Мылылъэ унэр республикэм щагъэпсыгъ, сомэ миллион 262-рэ фэдиз псэуалъэм пэIухьагъ. Комплексэу «Ошъутенэм» имылылъэ шъоф метрэ 29х60-рэ зэрэхъурэр. Трибунэр нэбгырэ 301-мэ ателъытагъ, сэкъатныгъэ зиIэхэми афытегъэпсыхьэгъэ чIыпIэхэр ащ иIэх. Зэнэкъо­къухэр зэхащэнхэмкIэ, нэмыкI шъолъырхэм якомандэхэм ягъу­сэхэу тренировкэхэр зэдашIынхэмкIэ, джащ фэдэу кIэлэцIыкIу ыкIи ныбжьыкIэ зэнэкъокъухэр зэхащэнхэмкIэ ящыкIагъэр зэкIэ ащ къыщыдэлъытагъ.

АР-м и ЛIышъхьэ ипресс-къулыкъу