Драматическэ театрэм ирежиссерэу, сценическэ искусствэм иапшъэрэ еджа­пIэу К.Райкиным ыцIэ зыхьырэм актер IэпэIэсэныгъэмкIэ икафедрэ икIэлэегъаджэу Констанин Мишиныр мы тхьамафэм Мыекъуапэ щыIагъ, Адыгеим итеатрэхэм яактерхэм мастер-классхэр адишIыгъэх. Москва къикIыгъэ хьакIэр къезгъэблэгъагъэр АР-м итеатральнэ объединение ихудожественнэ пащэу Ацумыжъ Рустам.

Мэфитфым артистхэм аIэкIэлъ бзэр нахь псы­хьэгъэнымкIэ, пкъыр нахь уфэ-упцIэ шIыгъэнымкIэ шIыкIэ-амалэу щыIэхэм яшъэфхэр режиссер Iэпэ­Iасэм къаригъэлъэгъугъэх. Ащ фэдэ десэ гъэшIэгъонхэм АР-м и Лъэпкъ театрэ, Урыс драматическэ театрэм, Камернэ музыкальнэм ыкIи Тэхъутэмыкъое ныбжьыкIэ театрэм яартистхэр ахэлэжьагъэх.

«Непэ цIыфхэм азыфагу гаджетхэр, дунэе хъытыухэр къыдэхьагъэх, — иеплъыкIэкIэ къыддэгощагъ Константин Мишиныр. — Сэ сызэреплъырэмкIэ, цIыфыр зэIухыгъэ зышIырэр зэпхыныгъэхэр ары. Актер сэнэхьатым ипшъэрылъ шъхьаIэр — цIыфыгум нэсыныр, къыгъэущыныр ыкIи ар гъэцэкIагъэ хъуным пае мафэ къэс актерыр зыдэлэжьэ­жьын, иIэпэIэсэныгъэ хигъэхъон фае».

Ежь Константин Мишиным ГИТИС-р къыухыгъ, спектаклэ 30 фэдиз ыгъэ­уцугъ, роль пчъагъэ къы­шIыгъ. М.Лермонтовым и «Мцыри» ыгъэуцугъ ыкIи роль шъхьаIэр къыщи­шIыгъ. Белоруссием щыкIогъэ фес­тивалэу «Белая Вежа» зыфиIорэм хъулъфыгъэ роль анахь дэгъу къышIыгъэу щалъытагъ. У. Шекс­пир итрагедиеу «Ромео и Джульетта» зыцIэр мыгъэ Казахстан щигъэуцущт.

«Лъэпкъ театрэхэр яшэн­кIэ, янэшанэхэмкIэ къахэщых. Адыгеим иартистэу сыздэлэжьагъэхэм шIэныгъэу ясхьылIагъэм фэдиз кIуачIэ къахэкIы­жьыгъ, ар зэхэсшIагъэ. СшIогъэшIэгъонэу Iоф адэс­шIагъ, сакIырыплъыгъ. Зэфэхьысыжь сшIыгъэ зэ къэкIогъур зэрэмакIэр. Мэ­лылъфэгъу мазэм мастер-классхэр лъызгъэ­кIо­тэнхэу джыри Адыгеим сыкъэкIощт. АщкIэ Ацумыжъ Рустам сезэгъыгъ. Мы мафэхэм адыгэ культурэм хэщагъэ сыхъугъ. ТыгъэкъокIыпIэ лъэпкъхэм якъэралыгъо музей и ­Те­мыр-Кавказ къутамэу Мые­къуапэ дэтым, АР-м и Къэралыгъо филармоние сащэгъагъ, АР-м лъэпкъ къашъомкIэ икъэралыгъо академическэ ансамблэу «Налмэсым» къытыгъэ концертым сыщыIагъ. Адыге­им икультурнэ щы­IэкIэ-псэукIэ бэкIэ нахь гъэшIэгъон Москва нахьи. Джащ фэдэу мы мафэхэм къысшIошIыгъ. Адыгэ ­лъэпкъ культурэр зэрэбаир гъэнэфагъэ», — хигъэунэфыкIыгъ Москва къикIыгъэ режиссерым.

Къэралыгъо гупчэм Iоф щызышIэрэ режиссерхэр къырагъэблагъэхэзэ ти­актерхэм яIэпэIэсэныгъэ хъагъэхъоныр АР-м и Лъэпкъ театрэ, Урысыем итеатральнэ IофышIэхэм я Союз икъутамэу Адыгеим щызэхэщагъэм егъэ­джэн шэпхъэ хэхыгъэу яIэ­хэм ащыщ. Союзым итхьа­ма­тэу, УФ-м изаслуженнэ артистэу Зыхьэ Заур къы­зэриIорэмкIэ, ащ фэдэ зэIукIэгъухэр жьыкъэщэгъу къабзэ фэдэу артистхэм афэхъух, къагъэбырсырых, яIэпэIэсэныгъэ нахь къагъэущы, творчествэм зыкъыIэтынымкIэ амалышIу­хэм ащыщ:

«Сэ Урысыем итеатраль­нэ IофышIэхэм я Союз икъутамэу Адыгеим щызэхэщагъэм сызэрипащэм имызакъоу, Союзым исек­ретариатэу Москва щылажьэрэм сыхэт. Илъэс къэс мыщ фэдэ мастер­-классхэр тиартистхэм афы­зэхэтэщэх, ащ имызакъоу, мылъкукIэ IэпыIэгъу тафэхъу. Сценическэ зекIонымкIэ ГИТИС-м икафедрэ ипащэу Айдар Закировыр гъэрекIо ти­театрэ къэтщэгъагъ. Пандемием ыуж артистхэм нахь зыкъашIэжьынымкIэ ащ адишIыгъэ десэхэм яшIогъэшхо къэкIуагъ».

Театральнэ объедине­нием ихудожественнэ пащэ Лъэпкъ театрэм иIофхэмкIэ игуадзэу, актерэу Жъудэ Аскэрбый 2021-рэ илъэсым нэбгырэ 23-рэ хъухэу Ялтэ зэрэкIогъагъэхэр, зызэрагъэпсэфыгъэм да­кIоу, яIэпэIэсэныгъэ хэ­зыгъэхъогъэ егъэджэнхэм зэрахэлэжьагъэхэр игуапэу къыхигъэщыгъ:

«Урысыем итеатральнэ IофышIэхэм я Союз икъутамэу Адыгеим щызэхэ­щагъэм ишIуагъэкIэ мыщ фэдэ дэкIыгъохэр зэшIо­хыгъэ мэхъух. Ялтэ творчествэм и Унэу дэтым Москва къикIыгъэ режиссерхэм мастер-классхэр къыщытфашIыгъагъэх. Гъэ­рекIо зэхэтщэгъэгъэ фес­тивалэу «Кавказский мело­вой круг» зыцIэм «Хъулъ­фыгъэ роль анахь дэгъу» зыфиIорэ лъэныкъомкIэ къыщыхагъэщыгъэ артистэу Хьаудэкъо Азэмат мыгъэ джащ фэдэу Москва дгъэ­кIощт. Театрэ анахь инхэм яспектаклэ анахь дэгъухэм ащяплъынэу амал иIэщт».

Мэзаем и 27-м Урысыем итеатральнэ IофышIэ­хэм я Союз и Совет хэтхэм зэхэсыгъо яIэщт. Зы­хьэ Заур ащ хэлэжьэщт, мы илъэсымкIэ рахъухьэрэ Iофыгъохэр ащ къыщынэ­фэщтых.

Тэу Замир.