Нэбгырэ 268-рэ хэлэжьагъ
Спорт ориентированиемкIэ Iофтхьабзэу «Зимний Кубок Парков» зыфиIорэм ия 3-рэ уцугъо Адыгеим икъэлэ шъхьаIэ щыкIуагъ.
Ащ кIэщакIо фэхъугъэх республикэ гурыт еджапIэу N 3-р, Адыгэ Республикэм ыкIи Мыекъуапэ физическэ культурэмрэ спортымрэкIэ якомитетхэр, спорт ориентированием ыкIи зекIоным яфедерациехэр.
Мы спорт лъэпкъым нахь зегъэушъомбгъугъэным, ащ пыщагъэхэм япчъагъэ нахьыбэ шIыгъэным, псауныгъэм игъэпытэнкIэ физическэ культурэм ыкIи спортым мэхьанэу яIэр къыткIэхъухьэрэ лIэужхэм агурыгъэIогъэным, спортсмен анахь лъэшхэр къыхэгъэщыгъэнхэм Iофтхьабзэр фэIорышIагъ. Джащ фэдэу Адыгеим ыкIи нэмыкI шъолъырхэм язэпхыныгъэ гъэпытэгъэным зэхэщакIохэм мэхьанэшхо ратыгъ.
Зэнэкъокъум хэлэжьагъэх Краснодар краим илIыкIохэри. Мыекъуапэ игурыт еджапIэу N 2-м аужырэ едзыгъор щыкIуагъ. ЗэкIэмкIи ащ нэбгырэ 268-рэ хэлэжьагъ. Ахэм кIэлэцIыкIухэри, зыныбжь хэкIотагъэхэри ахэтыгъэх, куп 17-у гощыгъагъэх.
Зэнэкъокъум ипэублэ ащ хэлажьэхэрэм картхэр аратыщтыгъэх, ахэм зэкIолIэнхэ фэе чIыпIэхэр арытыгъэх. Пшъэрылъэу щытымкIэ ахэр къагъотынхэ ыкIи хэушъхьафыкIыгъэ чипхэмкIэ агъэнэфэнхэ фэягъ.
Анахь гъогу кIыхьэу спортсменхэм къакIугъэр метрэ 2600-рэ мэхъу. Зэнэкъокъум дэгъоу зыкъыщагъэлъэгъуагъ республикэм икъэлэ шъхьаIэ щыщ Лев Коваленкэм, Мыекъопэ районым щыпсэурэ Алевтина Старицкаям, ветеран купым хэтыгъэ Ожъубанэкъо Хьазэртал. Ахэр ары текIоныгъэр зыфагъэшъошагъэхэр.