Лъэс кIоныр зикIасэхэм апае зэхащэгъэ мара­фонэу «Гъатхэм тыпэгъокIы» зыфиIорэр блэкIы­гъэ зыгъэпсэфыгъо мафэхэм зэфашIыжьыгъ. Ар щылэ мазэм 16-м Мыекъуапэ щырагъажьи, мэфэ 14-рэ кIуагъэ.

Республикэм икъэлэ шъхьаIэ имызакъоу, Адыгеим ирайонхэм ялIыкIохэри ащ хэлэжьагъэх. Ахэм пшъэрылъэу апашъхьэ щытыгъэр мафэ къэс лъэбэкъу мини 10 (километри 7,5-рэ фэдиз) акIуныр ары. Шъхьадж зыфэе лъэс­рыкIо лъагъор ежь къыхихын амал иIагъ.

Iофтхьабзэр зэрэкIорэм ренэу лъыплъагъ Мыекъопэ къэлэ администрацием физическэ культурэмкIэ ыкIи спортымкIэ и Ко­митет. ЗэхэщакIохэм эфир зан­кIэхэр зэхащэщтыгъэх. Чэщ-зымафэм къыкIоцI лъэбэкъу мини 10 зымыкIугъэхэр зэнэкъокъум хэзыщтыгъэх. Ау ащ фэдэу нэ­бгыри 121-мэ къахэкIыгъэр 23-рэ ныIэп. Iофтхьабзэм хэлэжьагъэ­хэм анахьыбэр Мыекъуапэ щэ­псэух, илъэс 33-м щегъэжьагъэу 42-м нэс аныбжь. Марафоным хэлэжьэгъэ анахьыжъым илъэс 72-рэ ыныбжь, анахьыкIэр илъэси 8 хъугъэ.

— Мы Iофтхьабзэм сигуапэу сыхэлэжьагъ. Мафэм лъэбэкъу мини 10 пкIуныр къинышхоп, ащ сыхьатрэ ныкъорэ ныIэп ищы­кIагъэр. Мыщ фэдэ екIолIакIэм ишIуагъэкIэ цIыфым ипсауныгъэ нахь пытэ мэхъу, — къыIуагъ Мыекъопэ къэлэ администрацием физическэ культурэмкIэ ыкIи спортымкIэ и Комитет ипащэ.

Марафоныр дэгъоу зыкIугъэ пстэуми дипломхэр афагъэшъошагъэх, джащ фэдэу АР-м и Олимпийскэ Совет ыгъэнэфэгъэ шIухьафтынхэр нэбгырэ 50-мэ аратыжьыгъэх.

Бзылъфыгъэхэм я Дунэе ма­фэ ехъулIэу мыщ фэдэ Iофтхьабзэ джыри зэхащэщт.