Адыгеим ыцIэкIэ Къэралыгъо Думэм идепутатэу Хьаса­нэкъо Мурат Мыекъопэ районымрэ поселкэу Камен­номостскэм дэт гурыт еджапIэмрэ ащыIагъ.

Мы гурыт еджапIэм чIэсхэу художественнэ самодеятельностымкIэ кружокхэм къякIуалIэхэрэм яIэпэIэсэныгъэ зынэсырэр хьакIэм рагъэлъэгъугъ, спортсмен ныбжьыкIэхэр алырэгъум щызэбэныгъэх.

Хьасанэкъо Мурат кIэлэеджакIохэм яупчIэхэм джэуап къызаретыжь нэуж сыд фэдэрэ лъэныкъокIи ахэм гъэхъа­гъэхэр ашIынэу, нахь загъэчанынэу, мурадышIоу яIэр къадэмыхъоу мыуцунхэу ариIуагъ. Джащ фэдэу гурыт еджапIэм иIофшIэн епхыгъэ Iофыгъо­­хэмкIи депутатыр кIэлэегъаджэхэм адэ­гущыIагъ.

Хьасанэкъо Мурат гурыт еджапIэм ипащэу Ольга Репниковам зэрэфэразэр риIуагъ, кIэлэеджакIохэм районым пэрытныгъэ щаIыгъынымкIэ Iофышхо зэрашIэрэр къыхигъэщыгъ. ГущыIэм пае, къыткIэхъухьэрэ ныбжьыкIэхэм патриотическэ пIуныгъэ дэгъу ягъэгъо­тыгъэнымкIэ ахэм Iофышхо зэрашIэрэр къыIуагъ.

— Партиеу «Единэ Россием» инароднэ программэ къызэрэщиIорэмкIэ, гъэсэныгъэр анахьэу мэхьанэшхо зэратырэ лъэныкъохэм ащыщ. Тинеущырэ мафи, тищыIэкIэ-псэукIи зыфэдэ хъущтхэр бэкIэ зэлъытыгъэр ныбжьыкIэхэм гъэсэныгъэу, шIэныгъэу ара­гъэгъотырэр ары. КIэлэеджакIохэм са­дэгущыIэ зэхъум ахэр зэрэчанхэм, зэрэнэутхэхэм, ягушъхьэлэжьыгъэрэ якультурэрэ зыкъягъэIэтыгъэным, спортым дэгъоу зэрапылъхэм гу алъыстагъ. Мы гурыт еджапIэм икIэлэеджакIохэм шIэныгъэ дэгъу зэрарагъэгъотыщтым сицыхьэ телъ. ЦIыфыгъэ шапхъэхэм, уи Хэгъэгу шIу плъэгъун зэрэфаем мыщ щафагъасэх, — къыIуагъ Хьасанэкъо Мурат.