Зэнэкъокъум шъухэлажь!
Адыгабзэр зикIасэхэм апае зэнэкъокъоу «Сыбзэ сидунай» зыфиIорэр зэхащагъ. Илъэси 3-м къыщегъэжьагъэу илъэс 14-м нэс зыныбжьхэр мыщ хэлэжьэнхэу рагъэблагъэх.
Зэнэкъокъум усэ е рассказым ипычыгъо IупкIэу, зэгъэфагъэу укъеджэн фаеу къыделъытэ.
Iофтхьабзэм хэлажьэ зышIоигъохэм видеоролик тырахын фае. Ащ якъэбар кIэкI, ацIэ, алъэкъуацIэ, зыщеджэхэрэр, зыщыпсэухэрэр къыщаIотэщт ыкIи усэ е рассказ цIыкIум къыщеджэщтых. Видеор зыфэдэн фаер Адыгэ республикэ кIэлэцIыкIу тхылъеджапIэм исайтэу https://clck.ru/33KX7e зыфиIорэм ит. УпчIэ зиIэхэр зэхэщакIохэм ятелефонхэу 8(8772)56-00-67-м е 8(8772)57-17-46-м теонхэ алъэкIыщт.
КIэлэцIыкIухэм аныбжь елъытыгъэу купищэу гощыгъэщтых, куп пэпчъ апэрэ чIыпIищыр зэратыщтхэр осэшIхэм агъэнэфэщт. Илъэси 3-м къыщыублагъэу илъэси 6-м нэс ыкIи илъэси 7-м къыщыублагъэу илъэси 10-м нэс зыныбжьхэу текIоныгъэ къыдэзыхыхэрэм сомэ мини 5-м къыщегъэжьагъэу мини 10-м нэс аратыщт. Илъэс 11-м къыщыублагъэу илъэс 14-м нэс — сомэ мини 7 — мин 15 афагъэшъошэщт. Адыгабзэр зимыныдэлъфыбзэхэми зэнэкъокъум хэлэжьэнхэ амал яI.
Фондэу «ГУХЭЛЪ — GUKHEL» ыкIи Адыгэ республикэ кIэлэцIыкIу тхылъеджапIэр ары Iофтхьабзэм икIэщакIохэр. ИзэхэщэнкIэ АР-м культурэмкIэ и Министерствэ IэпыIэгъу къафэхъу.
Видеороликыр мэзаем и 21-м блэмыкIэу e-mail: konkurssybze0I@yandex.ru зыфиIорэм рагъэхьын фае. ТекIоныгъэ къыдэзыхыгъэхэр гъэтхапэм и 14-м, 2023-рэ илъэсым Адыгэ республикэ кIэлэцIыкIу тхылъеджапIэм щагъэшIощтых.