Федеральнэ проектэу «Дошкольное дзюдо» зыфиIорэм къыдыхэлъытагъэу кIэлэцIыкIу IыгъыпIэу N 21-м мы мафэхэм физическэ культурэмкIэ Iоф адашIэнэу аублагъ.

Проектыр щыIэныгъэм щыпхыращыным фэшI лъэныкъуиплIымэ зэзэгъыныгъэ зэдашIыгъ: Мыекъопэ къэралыгъо технологическэ университетыр, АР-м дзюдомкIэ и Федерацие, физическэ культурэмкIэ ыкIи спортымкIэ Комитетыр ыкIи кIэлэцIыкIу IыгъыпIэу N 21-р. Iоф­тхьабзэм изэхэщэнкIэ Урысыем дзюдомкIэ и Федерацие IэпыIэгъу къафэхъу.

Проектым инаучнэ пащэу, экономикэмкIэ факультетым идеканэу, Мые­къопэ къэралыгъо технологическэ университетым ипрофессорэу Галина Коноваловам гущыIэгъу тыфэхъугъ.

— «Дошкольное дзюдо» зыфи­Iорэ проектым къыдыхэлъытагъэу республикэм ит кIэлэцIыкIу IыгъыпIэхэм физическэ культурэмкIэ, дзюдомкIэ Iоф адэшIэгъэныр пшъэрылъ шъхьа­Iэу щыт. Мы федеральнэ проектыр зигукъэкIыр УФ-м и Президентэу В.В. Путиныр ары. ХэгъэгумкIэ ятфэнэрэ шъо­лъыр ар зыщыпхыращырэр. Мыекъопэ къэралыгъо технологическэ университетым кIэлэцIыкIухэм Iоф адэзышIэщт тренерхэм егъэджэнхэр ащыфызэхащагъэх. Анахь цIыкIу­хэм Iоф адэшIэгъэнымкIэ нэбгырэ 16 рагъэджэжьыгъ. Къы­хэзгъэщымэ сшIоигъу, медици­нэ институт зэрэтиIэм къыхэ­кIыкIэ проектым изэхэщэн нахь шIуагъэ къыхьыщт. НэмыкI шъолъырхэм ялъытыгъэ­мэ, медикэ-биологическэ уплъэ­кIунхэр тиIэщтых. Ыпэрап­шIэу кIэлэцIыкIухэм япсауныгъэ изытет зэрагъэшIэщт, вра­чым Iизын къытын фае ащ фэ­дэ IофшIэн кIэлэцIыкIум дызехьэгъэнымкIэ, — еIо тигущы­Iэгъу.

ЗипсауныгъэкIэ дагъо зимыIэ кIэлэцIыкIухэр спортым пыщэгъэнхэр, ахэм апкъышъол псыхьэгъэныр ары пшъэрылъ шъхьаIэу зэхэщакIохэм зыфагъэуцужьырэр. Тренер ныбжьыкIэхэу, спортымкIэ мастерхэу ШъэоцIыкIу Рустамрэ Тюльпэрэ Айдэмыррэ кIэлэцIыкIухэм Iоф адашIэ. Мыщ фэдэ сыхьатхэм шIуагъэ къахьымэ медицинэм феджэрэ студентхэм гъунэ лъафыщт.

Адыгеир – мы спорт лъэпкъым щыцIэрыIохэмкIэ баи. Щэч хэлъэп, зигугъу тшIырэ проектым ишIуагъэкIи спортышхом щыцIэрыIохэм япчъагъэ джыри нахьыбэ хъущт. ДЕЛЭКЪО Анет.