Адыгэ Республикэм футболымкIэ изэIухыгъэ кIымэфэ зэнэкъокъу изичэзыу ешIэгъухэр непэ щыIэщтых. Мы Iофтхьабзэр зызэхащэрэр илъэс 50-м къехъугъ.

Хабзэ зэрэхъугъэу, футбол ешIэгъухэр стадионэу «Юностым» щыкIощтых. Зэпэгъунэгъоу щыт ешIапIэхэм ащызэIукIэщтых ветеранхэм (илъэс 40-м ехъугъэхэр) ыкIи апэрэ лигэм хэхьэрэ командэхэр.

Анахьэу унаIэ зытебдзэн фаер ветеранхэм язэIукIэгъухэр ары, сыда пIомэ ахэм аужырэ я 7-рэ тур яIэщт. Зэнэкъокъухэм команди 8 ахэлажьэ. Ахэм ащыщхэм хагъэунэфыкIырэ чIыпIэхэр къыдахынхэмкIэ гугъапIэ яIэжьэп. ТекIоныгъэр къыдихыгъах командэу «Лъэпкъ гвардием идзэхэр» (ВНГ) зыфиIорэм. Купым ятIонэрэ чIыпIэр щызыIыгъ командэм ар очкоуи 3-кIэ ыпэ ит ыкIи къыте­кIуагъэхэми апэрэ чIыпIэм къэнэ.

Командэхэу «Звезда», «Джокер» ыкIи «Делотехника» зыфиIохэрэм къэнэгъэ хагъэунэфыкIырэ чIыпIитIум афэбэнэщтых. Ахэм акIуачIэ зэфэдиз, арышъ, ятIонэрэ ыкIи ящэнэрэ чIыпIэхэр къыдэзыхыщтхэр къэшIэгъуае.

Командэхэм очко пчъа­гъэу рагъэкъугъэр:

ВНГ — 16, Звезда — 13, Джокер — 12, Делотехника — 11, Молзавод — 7, Фыщт — 4, Еджэркъуай — 3, Штурм — 2.

Щылэ мазэм и 28-м зэIукIэщтхэр:

ВНГ — Джокер, Фыщт — Еджэркъуай, Штурм — Молзавод, Делотехника — Звезда. Апэрэ купым хэтхэр непэ зэ­IукIэщтых, зэкIэмкIи ахэм ешIэгъу 12 зырыз яIэнэу щыт. Пстэуми лъэшэу апэ ишъыгъэх зэлъашIэ­хэрэ командэхэу «Ошъутэн» ыкIи «Спортмастер-2» зыфиIохэрэр. Ошъутенэр очкоуи 2-кIэ ыпэ ит, ау командэхэр зэдешIэнхэу къапыщылъ. Арышъ, «Спортмастер-2-р» апэрэ чIыпIэм уцун ылъэкIыщт. Я 10-рэ турым командэхэр зэIукIэщтых, джащы­гъум нахь лъэшыр къэнэфэщт.

Апэрэ лигэм щешIэрэ командэхэм очко пчъагъэу рагъэкъугъэр:

Ошъутен — 24, Спортмастер-2 — 22, Легион — 13, Тульскэр — 13, МФОК-у «Ошъутен» — 13, Кавказ — 12, Спортмастер — 12, Юг-Авто — 9, Делотехника — 7, Сокол — 7, СШОР-2007 — 3, СШОР-2008 — 0, Альянс — 0.

Я 9-рэ турым зэIукIэщтхэр:

Юг-Авто — Альянс, МФОК-у «Ошъутен — Кавказ, Легион — Сокол, Спортмастер-2 — Спортмастер, СШОР-2008 — Тульскэр, Делотехника — СШОР-2007. Шъугу къэдгъэкIыжьын, апшъэ­рэ лигэм хэтхэм язэIукIэгъухэр блэкIыгъэ тхьамафэм аухыгъэх, текIоныгъэр къыдихыгъ командэу «Урожай» зыфиIорэм. Ащ ешIэгъуи 7-у иIагъэм текIоныгъи 7 къащыдихыгъ.

Адыгэ Республикэм футболымкIэ изэIухыгъэ кIымэфэ зэнэ­къокъу зэкIэмкIи командэ 29-рэ хэлажьэ.

ЗэхэщакIохэм спортыр зышIогъэшIэгъонхэр зэнэкъокъухэм яплъынхэу рагъэблагъэх.