Урысыем гандболымкIэ изэнэкъокъухэм ахэлэжьэрэ «АГУ-Адыифыр» мы мафэхэм къалэу Звенигород икомандэу «Звезда» зыфиIорэм IукIагъ. ПэшIорыгъэшъ уцугъом иаужырэ ешIэгъоу типшъашъэхэм яIагъэр ашIуахьыгъ.

Звезда (Звенигород) — «АГУ— Адыиф» (Мыекъуапэ) — 40:26.

Тикомандэ щешIагъэхэр: Якупова, Баскакова, Дворцевая, Краснокутская, Никулина, Кириллова, Колодяжная, Морозова, Къэбж, Казиханова, Голунова, Краснова, Кожубекова.

Тикомандэ пэрытныгъэ щызыIыгъ Дарья Выгуржинскаяр мы мафэм ешIагъэп. Финал уцугъоу къэблагъэ­рэм нахь зыфигъэхьазырынэу тренерхэм ащ зырагъэгъэпсэфыгъ. ЗэIукIэгъур зэIухыгъэу кIуагъэ. ЦIыфэу къекIолIагъэхэм командэхэм Iэгуаор къэлапчъэм бэрэ зэрэда­дзагъэр алъэгъугъ ыкIи ащ осэшIу фашIыгъ. АщкIэ «Звезда» хэтхэм нахь дэгъоу зыкъагъэлъэгъуагъ. «АГУ-Адыифым» текIоныгъэр къыдихышъугъэп нахь мышIэми, я 11-рэ чIыпIэм къэнагъ, сыда пIомэ ыпэ ишъын зылъэкIыщтыгъэ «Луч» (Мос­ква) къытекIуагъ.

Финал уцугъом къыдыхэлъыта­гъэу командэхэм ешIэгъуи 10 яIэщт, я 8 —13-рэ чIыпIэхэм афэбэнэщтхэм пэшIорыгъэшъ едзыгъом щырагъэ­къугъэ очкохэр къафыдалъытэщтых.

Апэрэ ешIэгъур тикомандэ Мые­къуапэ щыриIэщт, мэзаем и 5-м «Балтийская заря» (Санкт-Петербург) IукIэщт.