Адыгеим ибаскетбол командэу «Динамо-МГТУ-м» мы илъэсыкIэу къихьагъэм апэрэ ешIэгъухэр иIагъэх. ДэкIыгъо ешIэгъуи 4-у иIагъэм зы текIоныгъэ къащыдихыгъ.

Мыекъуапэ икомандэ мы илъэ­сымкIэ иапэрэ ешIэгъуитIу къалэу Магнитогорскэ щыкIуагъ, чIыпIэ командэу «Металлургым» IукIагъ. Апэрэ ешIэгъум бысымхэм текIоныгъэр къыдахыгъ, пчъагъэр 86:72. ЯтIонэрэм «Динамо— МГТУ-р» нахь щылъэшыгъ, пчъа­гъэр 68:59.

Челябинскэ щыкIогъо ешIэгъуи­тIур тикомандэ къыфэкъиныгъэх, мыщ яплъынхэу цIыф бэдэдэ къякIолIагъ. ЕшIэгъуитIури бысымхэм ахьыгъ — 77:67 ыкIи 78:44.

«Динамо-МГТУ-м» ешIэгъу 20 иIагъ, джырэ уахътэм я 3-рэ чIыпIэм щыт. Шъугу къэдгъэкIы­жьын, зэкIэмкIи мы купым команди 8 хэт. «Динамо-МГТУ-м ыпэ итых Ростов-на-Дону ыкIи Челябинскэ якомандэхэр.

Джыри ешIэгъуи 8 къэнагъ, мэзаем и 3 — 4-м «Динамо— МГТУ-р» къалэу Ростов-на-Дону щешIэщт.