Таурыхъымрэ къэмыугупшысыгъэ щыIэныгъэмрэ
Адыгэ Республикэм шIэныгъэхэмкIэ иIофышIэшхоу, Адыгеим искусствэхэмкIэ иIофышIэшхоу, тарихъ шIэныгъэхэмкIэ кандидатэу, археологэу ЛэупэкIэ Нурбый икъэгъэлъэгъонэу «От мифов к реальности» зыфиIорэр Краснодар дэт музееу «Особнякъ» зыфиIорэм мы мафэхэм къыщызэIуахыгъ.
Ащ фэгъэхьыгъэ зэхахьэм къыщызэрэугъоигъэх Нурбый ригъэджагъэхэр, иIофшIэгъухэр, хэбзэ IофышIэхэр, ЛэупакIэм итворчествэ уасэ фэзышIыхэрэр.
Адыгеим ихабзэ ыцIэкIэ къэзэрэугъоигъэхэм закъыфигъэзагъ Адыгэ Республикэм иофициальнэ лIыкIоу Краснодар краим игубернатор дэжь щылажьэрэм игуадзэу АкIэгъу Арамбый. Творчествэмрэ шIэныгъэмрэ зэголъхэу гъэхъагъэхэр ащыпшIынхэ зэрэплъэкIыщтым ишыхьатэу ЛэупэкIэ Нурбый ищыIэныгъэ зэрэщытым ащ къыкIигъэтхъыгъ, иIофшIагъэхэм тхьамэфитIум Краснодар щыпсэухэрэмрэ ихьакIэхэмрэ пэблагъэ зызэрэфашIышъущтымкIэ къафэгушIуагъ.
ЛэупакIэм чIыопсым ибаиныгъэ уасэ фэпшIын зэрэплъэкIыщтым бэкIэ зэрэфигъэсагъэр игущыIэхэм къащыхигъэщыгъ Урысыем ихудожникхэм я Союз хэтэу, IэпэIасэу Еутых Асе, икъэгъэлъэгъон икъызэIухынкIэ сурэтышIым ар къыфэгушIуагъ. Асе къызэриIуагъэмкIэ, Нурбый ынэхэмкIэ чIыопсым еплъынэу зэригъэшIагъ ыкIи ащ уфэсакъын зэрэфаер щыIэныгъэмкIи, иIофшIэнкIи къышъхьэпагъ. ХъымыщкIэй Нурбый щитхыгъэгъэ IофшIэгъэ зэхэубытагъэхэр сурэтышIым шIухьафтын къызэрэфишIыгъагъэхэр Еутых Асе къыIуагъ ыкIи ахэр и Дышъэ гъэтIылъыпIэ къыщигъэлъэгъонхэм зэрэфэхьазырыр къыхигъэщыгъ.
«УитворчествэкIэ гупшысэ дахэхэр къэогъэущых, шъо зэмлIэужыгъо дахэхэр огъэфедэх. УиIофшIагъэхэм тарихъ мэхьанэ зиIэ цIыфхэр, пкъыгъохэр къащыогъэлъагъох. УшIэныгъэлэжь, уархеолог, ащ уитворчествэ зыфэдэ къэмыхъугъэ лъэуж къытырелъхьэ», — къыщыхигъэщыгъ игущыIэ «Адыгэ Хасэм» исовет хэтэу Ацумыжъ Юсыф. ЛэупэкIэ Нурбый икъэгъэлъэгъон мэзэе мазэм и 4-м нэс Краснодар щыкIощт.