«Единэ Россием и НыбжьыкIэ Гвардие» боксымкIэ зэнэкъокъу ыкIи мастер-класс къалэу Луганскэ щызэхищэгъагъ.

ЗэлъашIэрэ спортсменым, гъэсэкIо IэпэIасэм егъэджэгъу зэрэдыряIэм кIэлэцIыкIухэр зэригъэгушхохэрэр, акIуачIэ зэрэзэхаригъашIэрэр къыхигъэ­щыгъ «Единэ Россием и НыбжьыкIэ Гвардие» ипащэ игуа­дзэу Артем Ермаковым.

— «Чемпионы — детям Донбасса» зыфиIорэ проектэу икIыгъэ илъэсым итыгъэгъазэ иапэрэ мафэхэм зигъэцэкIэн едгъэжьагъэр лъытэгъэкIуатэ. НахьыпэкIэ къызэрэтIогъагъэу, ащ къыщыдэлъытэгъэ Iофтхьабзэхэр зыщыкIогъэ чIыпIэхэм ахэхъо. Мариуполь щежьагъ, ащ Шахтерскэ къыкIэлъыкIуагъ, джы Луганск... Ткъош Запорожскэ ыкIи Херсонскэ хэкухэми къащыкIэлъэIух, шIокI имыIэу афэдгъэцэкIэщт, — къыIуагъ ащ.

Проектым кIэщакIо фэхъу­гъэхэм ащыщэу, УФ-м и Къэра­лыгъо Думэ идепутатэу Дмитрий Пирог къызэриIуагъэмкIэ, боксым имызакъоу, нэмыкI спорт лъэпкъхэмкIи зэнэкъо­къухэр зэхащэщтых.

— «НыбжьыкIэ Гвардиер» тигъусэу мазэм зэ ащ фэдэ Iофтхьабзэхэр зэхэтщэнхэм, спорт псэуалъэу ящыкIагъэхэр къафэтщэфынхэм, кIэлэцIыкIу­хэм тадеIэным, мастер-классхэр ядгъэлъэгъунхэм тыпылъ. ГущыIэм пае, мыл зытелъ площадкэ зыдэщыIэм хоккеимкIэ зэнэкъокъухэр щызэхэтщэнхэ тыгу хэлъ. Ащ фэдэ амал зыдэщымыIэхэм баскетболымкIэ, волейболымкIэ, самбэмкIэ, нэмыкIхэмкIэ ащызэхэтщэнэу тыфай. Теубытагъэ хэлъэу къэ­пIон плъэкIыщтыр проектыр зэрежьагъэр ыкIи къызэрэ­мыуцущтыр ары, — къыхигъэщыгъ ащ.

Шъугу къэдгъэкIыжьын, «Единэ Россием и НыбжьыкIэ Гвардие» депутатэу Дмитрий Пирог ныбжьыкIэ IофхэмкIэ, спортымкIэ ыкIи зекIо­нымкIэ ДНР-м, культурэмкIэ, спортымкIэ ыкIи ныбжьыкIэ IофхэмкIэ ЛНР-м яминистерст­вэхэр игъусэхэу «Чемпионы — детям Донбасса» зыфиIорэ проектым игъэцэкIэн ри­гъэжьагъ.