Пщынэр къыгъэгущыIэщтыгъ
Пщынэм къизыгъэпшIыкIутIукIыщтыгъэ Мызэгъ Юсыф Хьаджбирам ыкъом фэгъэхьыгъэгъэ шIэжь пчыхьэзэхахьэр искусствэхэмкIэ Тэхъутэмыкъое еджапIэм гъэшIэгъонэу щыкIуагъ. Егъэджэн IофымкIэ ветеранэу, Тэхъутэмыкъое музыкальнэ еджапIэм ипэщагъэу Пщыпый Аскэр Рэмэзан ыкъом игукъэкIыкIэ ар зэхащагъ.
Пщынэо Iазэмрэ ащ иунагъорэ афэгъэхьыгъэ очеркэу район гъэзетэу «Согласием» къихьагъэм зеджэр ары ащ фэдэ мурад хъулъфыгъэм зишIыгъэр.
Тэхъутэмыкъое къоджэ администрацием инахьыжъхэм я Совет хэтхэр, районым культурэмкIэ иIофышIэхэр, Мызэгъ лIакъом щыщхэр пчыхьэзэхахьэм къырагъэблэгъагъэх.
Iофтхьабзэр зезыщагъэхэм пщынэо Iазэм щыIэныгъэ гъогоу къыкIугъэр къэзэрэугъоигъэхэм кIэкIэу къафаIотагъ. Юсыф 1914-рэ илъэсым мэкъумэщышIэ унэгъо къызэрыкIом къихъухьагъ. Я 3-рэ классыр къызеухым, унэгъо хъызмэтым изехьанкIэ янэрэ ятэрэ IэпыIэгъу афэхъоу ыублагъ, кIэлэ Iэтахъоу колхозым щылажьэу ригъэжьагъ. Юсыф ышыпхъоу Чабэ пщынэуагъ. Адыгэ мэкъамэу ащ къыхыригъадзэхэрэм кIалэр аумэхъыщтыгъ. НахьыбэрэмкIэ Юсыф джэгум зыкIакIощтыгъэр адыгэ пщынэм къырагъаIохэрэм ядэIунэу ары. РадиомкIэ къатырэ адыгэ мэкъамэхэми ар игуапэу ядэIущтыгъ. ПщынэеуакIэ зэригъэшIэнэу кIалэм зытыреубытэм, ышыпхъу ипщынэ мэкъамэ горэхэр къыхыригъадзэу зигъэсагъ. Пасэу унагъо ышIагъ, къоу къыфэхъугъэм Къамболэт фаусыгъ.
Хэгъэгу зэошхор къызежьэм, къуаджэм щыщхэу къэралыгъор къэзыухъумэнэу апэу дащыгъэхэм ар ахэфагъ. Фронт зэфэшъхьафхэм псэемыблэжьэу ащызэогъэ, къэралыгъо тыныбэ къызыфагъэшъошэгъэ Юсыф уIагъэхэр телъэу, ылъакъо фыкъуагъэу ядэжь къыгъэзэжьыгъ.
Джыри ар заозэ, 1942-рэ илъэсым ишышъхьэIу мазэ фашистхэр Тэхъутэмыкъуае къыдэхьэгъагъэх. Къоджэдэс нахьыжъхэм агу къызэрэкIыжьырэмкIэ, зэхъокIыныгъэу чэщым къэхъугъэхэм гу алъызымытэыгъэ Мызэгъ Хьаджбирам иунэ къикIи, нэмыцхэм аубытыгъэ лъэныкъомкIэ кIоу ежьагъ. Къызэтеуцонэу нэмыцхэр хъулъфыгъэм къекууагъэх. Ау къыраIуагъэм къикIырэр къызыгурымыIогъэ адыгэ хъулъфыгъэр къызэтеуцуагъэп. Нэмыцхэр шхончыкIэ еохи, ар хагъэфагъ.
Юсыф ядэжь къызегъэзэжь нэуж ишъхьэгъусэрэ ежьыррэ зэбгъодэкIыжьынхэу хъугъэ. Фыкъогъэ лъакъом лъэшэу къызэрэфыригъашIэщтыгъэм къыхэкIэу колхозым щылэжьэжьын зымылъэкIыщтыгъэ хъулъфыгъэм зи ымышIэу унэм исынэу къыригъэкIугъэп. ИныбжьыкIэгъум ыгу рихьыщтыгъэ пщынэеоным икIэрыкIэу зыIэпищэжьыгъ, иIэпэIэсэныгъэ нахь хигъахъоу ыублагъ. Юсыф ятIонэрэу унагъо ышIэжьыгъ, икъуаджэ дэс Шэрамыкъомэ япхъу шъхьэгъусэу къыхихыгъ.
Пщынаом иапэрэ гъэхъагъэхэм гу алъызытагъэр икъоджэгъухэр ары. ЕтIанэ нэмыкI къуаджэхэми ар рагъэблагъэ, джэгухэм, зэнэкъокъухэм ахэлажьэ хъугъэ. А лъэхъаным адыгэ пщынаохэм язэнэкъокъухэу тихэку щызэхащэщтыгъэхэм Мызэгъ Юсыф бэрэ щатекIоу къыхэкIыгъ. Пщынэм ащ къыхыригъэдзэрэ мэкъамэхэм хэку радиомкIэ цIыфхэр арагъэдэIущтыгъэх. Зищытхъу чыжьэу Iугъэ, пщынэр къэзыгъэгущыIэщтыгъэ Юсыф уиджэгу пфызэрищэныр насыпыгъэкIэ зыфалъэгъужьыщтыгъ. Лъытэныгъэшхо зыфашIыхэрэр къызэдашъохэ зыхъукIэ ар пчэгум къихьэти, зэрэфэлъэкIэу пщынэр зэкIищыщтыгъ, къыригъэIорэ мэкъамэм дежъыужьыщтыгъ.
СССР-м изаслуженнэ летчик-ушэтакIоу Мызэгъ Владимир КIэмгуе ыкъом 1995-рэ илъэсым Урысыем и ЛIыхъужъыцIэ къыфагъэшъуашэ зэхъум летчикым иIахьылищ, Юсыфи ахэм зэрахэтэу, Москва кIогъагъэ. Ахэм джэгоу Владимир фашIыгъэр бэмэ агу къинэжьыгъ, Москва дэсхэри пчэгум къихьэхэзэ джащыгъум къэшъогъагъэх.
Юсыфрэ Захьирэтрэ сабый 11 зэдапIугъ. Апэрэ шъузым дигъотыгъэ Къамболэт чырбыщзэтелъхьэ Iазэу щытыгъ, игъашIэ кIако зэрэхъугъэр гукъау. Сулейман Ермэлхьаблэ дэтыгъэ автодорожнэ техникумыр къыухыгъ, почтэм фельдъегерэу щылэжьагъ. Хьазрэт водителэу Краснодар Iоф щишIагъ. Щамсудин Тэхъутэмыкъое мэз хъызмэтшIапIэм токарэу щылэжьагъ. Краснодар инефтегазовэ профтехучилищэ щеджагъ, джы къызнэсыгъэм Тэхъутэмыкъое газ участкэм слесарэу Iут. Байзэт сатыриплI хъурэ усэхэр зэхилъхьанэу, нарэхэр къыIотэнэу икIэсагъ. Теуцожь мэз хъызмэтшIапIэм и Тэхъутэмыкъое къутамэ бэшIагъэу мэзпэсэу ар щэлажьэ.
Пхъу нахьыжъэу Бирамхъан почтальонэу Iоф ешIэ. Гурыт еджапIэм джыри чIэсызэ, гитарэм еоу ащ зигъэсэгъагъ. КультурэмкIэ Унэу Тэхъутэмыкъуае дэтым иорэдыIо ансамблэ хэтыгъ. Ащ илъфыгъэхэри ипхъорэлъфхэри гитарэм еох, орэд къаIо. Къадыр чэщым къызэрэхъугъэм пае ятIонэрэ пхъум Къадырхъан фаусыгъ. Культурэмрэ искусствэхэмрэкIэ университетэу Краснодар дэтыр ащ къыухыгъ. Джыдэдэм культурэмкIэ Унэу Козэт дэтым ипащ, Тэхъутэмыкъое районым ис бзылъфыгъэхэм я Совет итхьамат.
Аслъан Тэхъутэмыкъуае дэтыгъэ универмагым ищакIоу щытыгъ. Джыдэдэм ышэу Щамсудин игъусэу газ участкэм слесарэу щэлажьэ. Къадырхъан ыуж къэхъугъэ пшъашъэм Сэфэрхъан фаусыгъ. Северскэ культпросветучилищыр ащ къыухи, культурэмкIэ Унэу БжыхьэкъоякIэм дэтым илъэсыбэрэ ипэщагъ, Iофтхьэбзэ гъэшIэгъоныбэ зэхищагъ. Мызэгъхэм япхъу нахьыкIэу Дарихъан зэрыгыкIэхэрэ машинэхэр къыдэзгъэкIырэ предприятием технологэу щэлажьэ.
КIэлэ нахьыкIэу Юрэ искусствэхэмкIэ училищэу Мыекъуапэ дэтыр къыухыгъ, Адыгеим лъэпкъ къашъомкIэ и Къэралыгъо академическэ ансамблэу «Налмэсым» хэтыгъ. ЗиIэпэIэсэныгъэ хэзыгъахъо зышIоигъогъэ кIалэм КГИК-м хореографиемкIэ иотделении къыухыгъ. Зэнэкъокъоу «Премьера» зыфиIорэм рагъэблагъи, тихэгъэгу ичIыпIэ зэфэшъхьафхэм, Италием, Испанием, Португалием, Францием, Марокко, Швейцарием, Югославием, Германием, Англием ащыкIогъэ концертхэм ахэлэжьагъ, икъэшъуакIэ агу зэрэрихьырэм ишыхьатэу цIыфхэр бэрэ ащ Iэгу къыфытеощтыгъэх.
Зэзэгъыныгъэ зэрадишIыгъэм тетэу Юрэ Тыркуем икъалэу Стамбул хореографэу щылэжьагъ. Ащ кIэлэцIыкIухэр латиноамериканскэ, кавказ къашъохэм афигъасэщтыгъэх. Тыркуем иуниверситет зэфэшъхьафхэм, А. Санат иунэе еджапIэ, къэшъокIо куп пэрытэу «Анадолу Атэш» Iоф адишIагъ. Джыдэдэм Юрэ Стамбул дэт техническэ университетым иконсерваторие щэлажьэ. Охътэ тIэкIу къызэрэфыдафэу Тэхъутэмыкъуае къэкIо. Тырку гущыIэ зырызхэр ижабзэ къызэрэшIухафэрэр шIомытэрэзэу щхызэ адыгабзэм зыретыжьы.
Мызэгъ Юсыфрэ Захьирэтрэ ядунай захъожьыгъэр бэшIагъэ. Ау лъэпсэ дахэу адзыгъэр ялъфыгъэхэми, ахэм къатекIыжьыгъэхэми лъагъэкIотагъ. Юсыф пщынэм къыхыригъэдзэрэ мэкъамэхэу Адыгэ радиом тыритхагъэхэм пчыхьэзэхахьэм хэлэжьагъэхэр ягуапэу ядэIугъэх. Мызэгъхэм япхъорэлъфэу Хьатит Ерстэм ипщынэеуакIи ахэм агу рихьыгъ. Ятэ фэгъэхьыгъэ усэм Къадырхъан урысыбзэкIэ къеджагъ. ИскусствэхэмкIэ еджапIэм имузыкальнэ купэу «Адыгэхэр» зыфиIорэм икъэгъэлъэгъонхэм пчыхьэзэхахьэр къагъэбаигъ.
Къоджэ ефэндэу ХъокIо Анзауррэ Тэхъутэмыкъое районым иадминистрацие ипащэ ыцIэкIэ мы администрацием иIофхэр зезыгъэкIорэ Хьатит Симэрэ Iофтхьабзэм къыщыгущыIагъэх. Къоджэдэсхэм Мызэгъхэм лъытэныгъэ зэрафашIырэр ахэм къаIуагъ, шIоу щыIэр къадэхъунэу афэлъэIуагъэх.
Мызэгъ Юрэ Тыркуем зэрэщыIэу Iофтхьабзэм хэлажьэхэрэм къадэгущыIагъ. Ятэ зэращымыгъупшэрэр къэчыхьэзэхахьэм хэлэжьэгъэ пстэуми «тхьашъуегъэпсэу» къариIуагъ, псауныгъэ пытэрэ щыIэкIэ-псэукIэ дэгъурэ яIэнэу къафэлъэIуагъ. Мызэгъ лIакъом щыщхэм адыгэ хъулъфыгъэу къашъорэм истатуэткэ шIухьафтынэу музыкальнэ еджапIэм ратыгъ. Къоджэдэсхэм пчыхьэзэхахьэр лъэшэу агу зэрэрихьыгъэр, сурэтэу атырахыгъэм шIукIэ бэрэ ар агу къызэригъэкIыжьыщтыр нэрылъэгъугъ.
АкIэгъу Разиет.
Тэхъутэмыкъуай.