ИшIушIагъэ гъашIэм иджэмакъ
Адыгэ Республикэм и Лъэпкъ музей щыкIогъэ зэхахьэр Урысыем изаслуженнэ артистэу, Адыгеим инароднэ артистэу Лъэцэрыкъо Кимэ къызыхъугъэр илъэс 80 зэрэхъугъэм фэгъэхьыгъагъ.
Лъэпкъ музеир загъэкIэжьыгъэм къыщегъэжьагъэу лъэпкъ зэхахьэхэр нахь игъэкIотыгъэу щызэхащэхэу рагъэжьагъ. Адыгэ хьакIэщхэр, адыгэ пшъашъэм фэгъэхьыгъэ зэхахьэхэр, нэмыкIхэри ащ щэкIох.
Адыгэ Республикэм и Лъэпкъ музей ипащэу Джыгунэ Фатимэ къызэриIуагъэмкIэ, адыгэ зэхахьэхэр зыщыкIощтхэ унэм Лъэцэрыкъо Кимэ фэгъэхьыгъэу апэрэ зэрэщызэхащэрэр. Цэй Сусанэрэ Нэгъуцу Аслъанрэ зэращэгъэ зэхахьэм К. Лъэцэрыкъом ехьылIэгъэ къэбар гъэшIэгъонхэр къыщаIотагъэх, къэгъэлъэгъонхэм къатегущыIагъэх.
Къэгъэлъэгъонхэр
Лъэцэрыкъо Кимэ иIэшIагъэхэр гъэшIэгъоных. ШыкIэпщынэр, унагъом щагъэфедэхэрэ цацэхэр, джэмышххэр, фэшъхьафхэри непи гум рехьых. Адыгэ Республикэм исурэтышIэу ГъукIэ Замудин К. Лъэцэрыкъом ишыкIэпщынэ зэхахьэм къызыщегъэлъагъом, ашIогъэшIэгъонэу еплъыгъэх.
Адыгэ Республикэм культурэмкIэ иминистрэ игуадзэу Кушъу Светланэ къыIуагъ Лъэцэрыкъо Кимэ иIофшIагъэ осэ ин зэрэфашIыгъэр. Ащ ытхыгъэ тхылъэу адыгэ пщынэм къегъэIогъэным фэгъэхьыгъэр икIэрыкIэу къыдагъэкIыжьыгъ. Адыгэ Республикэм итхылъеджапIэхэм, кIэлэцIыкIу IыгъыпIэхэм ар зэрагъэгъоты.
Чэмышъо Гъазый къызэриIуагъэу, К. Лъэцэрыкъом илъэсыбэрэ а тхылъым Iоф дишIагъ, IофшIагъэу иIэр щыIэныгъэм къыщэлъагъо.
ЕплъыкIэхэр
Зэхахьэм апэу къыщыгущыIагъэу, Адыгэ Республикэм культурэмкIэ изаслуженнэ IофышIэу, сурэтышI-модельер цIэрыIоу СтIашъу Юрэ анахьэу къыхигъэщыгъэр Кимэ тилъэпкъ ыгъэлъапIэу, упчIэжьэгъу ашIэу зэрэщытыгъэр ары. ЦIыфышIу къодыягъэп, лъэхъаным идэхагъэ къыIуатэу, лъэпкъым фэлажьэу псэугъэ.
Дунэе Адыгэ Хасэм итхьаматэ иупчIэжьэгъоу МэщфэшIу Нэдждэт Абхъазым, Къэрэщэе-Щэрджэсым, Адыгеим ятворческэ куп хэтэу Тыркуем щыIагъ. Шъхьэлэхъо Абу япащэу зэхахьэм хэлэжьэгъагъ. Лъэцэрыкъо Кимэ япщынаоу Истанбул, Бурсэ, нэмыкIхэм ащыIагъэх. Къуаджэхэм адэсхэм пщынэ макъэу ащагъэIугъэр непэ къызнэсыгъэм ащыгъупшэрэп.
А зэIукIэм хэлэжьагъ сурэтышI цIэрыIоу Бырсыр Абдулахь. Ащ къызэриIуагъэмкIэ, Лъэцэрыкъо Кимэ фэгъэхьыгъэ зэхахьэр гъашIэм иджэмакъэ щыщ хъугъэ. Адыгэ Республикэм изаслуженнэ журналистэу Хъот Замрэт лъэпкъ шIэжьым илIыкIоу ар ылъытагъ. К. Лъэцэрыкъом фэгъэхьыгъэу Хьатикъое Адам, Куфэнэ Щамсэт, нэмыкIхэм яеплъыкIэхэри гум рихьыгъэх.
Анахь къыхагъэщырэр
ШIэныгъэлэжьэу Алла Соколовам къыIэтыгъэ Iофыгъом мэхьэнэ ин иI.
Адыгеим мэфэкI гъэшIэгъонэу щашIырэр бэ. «Адыгэ пщынэм и Маф» зыфиIорэр илъэс къэс зэхащэзэ ашIынэу къыIуагъ.
Урысыем, Абхъазым язаслуженнэ артистэу, Адыгэ Республикэм инароднэ артистэу Нэхэе Тэмарэ къыхигъэщыгъ Лъэцэрыкъо Кимэ исаугъэт Адыгеим щыгъэуцугъэн фаеу. Зэхахьэр зезыщэрэ Нэгъуцу Аслъан къыIуагъ республикэ общественнэ движениеу «Адыгэ Хасэм» Iофыр ыпшъэ зэрэралъхьэрэр.
Барцо Руслъан, Шэуджэн Рустам, Лъэчэ Альберт, Къэлэкъутэкъо Инвер, нэмыкIхэуи К. Лъэцэрыкъом ригъэджагъэхэм пщынэ мэкъамэхэр къырагъэIуагъэх.
Iофтхьабзэм хэлэжьэгъэ хирургэу Жэнэ Аскэр, шIэныгъэлэжьэу Мамый Руслъан, IофшIэным иветеранхэу Индрысэ Налбый, шыкIэпщынэм къезыгъэIуагъэхэу ГъукIэлI Дианэрэ Лъэцэрыкъо Даринэрэ, пхъэкIычаоу ГъукIэ Замудин, нэмыкIхэм пчыхьэзэхахьэр къагъэдэхагъ. Лъэцэрыкъо Кимэ ишъхьэгъусэу Зурэ зэхахьэм хэлажьэхэрэм «тхьашъуегъэпсэу» къариIожьыгъ.
ЕмтIылъ Нурбый.