«Адыгабзэр къэлэ пчэгухэм ащыдгъэIущт»
«Адыгэ макъэм» иредакцие ихьакIэр Ацумыжъ Рустам. Режиссер, актер, Адыгэ Республикэм искусствэхэмкIэ изаслуженнэ IофышI, Урысые Федерацием итеатральнэ IофышIэхэм я Союз хэт.
2007-рэ илъэсым искусствэхэмкIэ колледжэу Тхьабысымэ Умарэ ыцIэ зыхьырэр къыухыгъ. Нэужым культурэмкIэ ыкIи искусствэхэмкIэ Краснодар къэралыгъо университетым щеджагъ, Константин Райкиным сценическэ искусствэмкIэ иапшъэрэ еджапIэ, УФ-м итеатральнэ IофышIэхэм я Союз ия 11-рэ дунэе гъэмэфэ театральнэ еджапIэу А. Колягиным зэхищагъэр къыухыгъэх. АР-м иурыс драматическэ театрэу А. Пушкиным ыцIэ зыхьырэм Iоф щишIагъ, искусствэхэмкIэ колледжэу У. Тхьабысымэм ыцIэ зыхьырэм щыригъэджагъэх. 2017-рэ илъэсым Тэхъутэмыкъое районым культурэмкIэ игъэIорышIапIэ ипащэу агъэнэфагъ. 2019-рэ илъэсым Ахэджэго Мэджыдэ ыцIэ зыхьырэ ныбжьыкIэ драматическэ театрэр зэхищагъ. 2022-рэ илъэсым АР-м и Лъэпкъ театрэу Цэй Ибрахьимэ ыцIэ зыхьырэм художественнэ пащэ фашIыгъагъ, мазэм къехъугъэу АР-м итеатральнэ объединение ипащэу Iоф ешIэ.
ИкIыгъэ илъэсым икIэух АР-м и Лъэпкъ театрэу Цэй Ибрахьимэ ыцIэ зыхьырэр зызэхащагъэр илъэс 85-рэ зэрэхъугъэр игъэкIотыгъэу хагъэунэфыкIыгъ. Пчыхьищэ зэкIэлъыкIоу анахь спектакль шIагъоу театрэм щагъэуцугъэхэм ащыщэу «Шыу мафэр», «Псэлъыхъохэр» къыщагъэлъэгъуагъэх, мэфэкI театральнэ пчыхьэзэхахьэр ахэм кIэух афэхъугъ. Ацумыжъ Рустам пэщэ IэнатIэм зытехьэм Лъэпкъ театрэм еплъыхэрэм апашъхьэ апэрэу джащыгъум къихьэгъагъ ыкIи театрэр цIыфкIуапIэу, лъэпкъым идышъэ кIэн иухъумакIоу, шэн-хабзэхэм якъэгъэлъэгъуапIэу, ныбжьыкIэхэм гъэсэпэтхыдэ къызщыхахын алъэкIыщт чIыпIэу хъуным зэрэкIэхъопсырэр, ежь театрэм иIофышIэхэмкIэ ащ фэдэу хъунымкIэ алъэкI къызэрамыгъэнэщтым ягугъу къыщишIыгъагъ. ИлъэсыкIэу къихьагъэм зэшIуихынэу ыгъэнэфэгъэ Iофтхьабзэхэр сыд фэдэха? Мы упчIэр зэкIэм апэу Рустам фэдгъэзагъ.
— Адыгэ усэм фэгъэхьыгъэ пчыхьэзэхахьэхэр Лъэпкъ театрэм зэхищэхэзэ ышIыщт. Апэрэр блэкIыгъэ илъэсым икIэух, тыгъэгъазэм и 29-м, зэхэтщэгъагъ. Ежь театрэм иактерхэр арых ныIэп ащ хэдгъэлэжьагъэхэр — ублапIэм, егъэжьэгъум тэр-тэрэу тиамалхэр зыфэдэхэр, тызыфаер тыушэтыжьыгъ. Пчыхьэзэхахьэр шIулъэгъуныгъэм иусэ фэдгъэхьыгъ. Ным, сабыим, чIыопсым, бзылъфыгъэм — шIулъэгъур бэмэ афэгъэхьыгъэн ылъэкIыщт, ахэм афэгъэхьыгъэ усэхэм тиартистхэр къяджагъэх. Пчыхьэзэхахьэр гуфэбэныгъэ хэлъэу кIуагъэ, гуIэтыпIэу ащ хахыгъэр зыдаIыгъэу илъэсыкIэм, зыгъэпсэфыгъомэ ауж, къыдэкIыжьыгъэх.
Сыфай усэ пчыхьэзэ-хахьэхэр театрэм къычIэсщынхэшъ, Мыекъуапэ ичIыпIэ зэфэшъхьафхэм, гущыIэм пае, КIэрэщэ Тембот исаугъэт дэжь, Шъхьэгуащэ ипсыхъо Iушъоу агъэкIэжьыгъэм ащырезгъэкIокIынхэу.
Адыгабзэр къэлэ пчэгухэм ащыдгъэIущт. НыбжьыкIэхэр бэу къызэтщэлIэнхэм мэхьанэшхо иI, ежьхэм абзэкIэ ахэм уадэгущыIэн фай, якIэсэ чIыпIэхэр къыдыхэтлъытэзэ зэIухыгъэ шIыкIэм тетэу зэхахьэхэр дгъэпсыщтых.
— «Адыгэ макъэр» къызыдэкIырэр мыгъэ илъэси 100 хъущт. МэфэкI шапхъэмэ адиштэу общественнэ движениеу «Адыгэ Хасэмрэ» гъэзетэу «Адыгэ макъэмрэ» тызэгъусэу мазэм зэ хьакIэщхэр зэхатщэхэзэ тшIынэу зэдэтштагъ. ТызыгъэгумэкIырэ Iофыгъо зэфэшъхьафхэм — къалэм итеплъэу зэхъокIыныгъэшIухэр зыфэхъурэр зэрэтыухъумэрэм, лъэпкъ IэпэIасэхэм ашIырэ Iэпэщысэхэр тицIыфхэм IэкIэхьэгъошIу афэшIыгъэным, бзэм, шэн-хабзэхэм якъэухъумэн, нэмыкIхэми тарыгущыIэн, Iофыгъомэ хэкIыпIэу афэхъун ылъэкIыщтхэм якъыхэгъэщын тыдэлэжьэн тимурад. Апэрэ хьакIэщ зэхэсыгъор щылэ мазэм и 27-м Адыгэ Хасэр зычIэт унэм щызэхэтщэщт. Тызэрэзэтефагъэр тигухэлъхэмкIэ сшIогъэшIэгъон, сыда пIомэ апэрэ зэIукIэгъур адыгэ усэмрэ адыгэ ижъырэ орэдымрэ афэдгъэшъошэщт. А хьакIэщ-зэIукIэгъур Хасэри, театрэри, гъэзетри тызэхэтэу, къыддеогъаштэмэ, тэжъугъэшI.
— Къыжъудесэгъаштэ. Сыд фэдэрэ Iофи игъунапкъэхэр нахь зэIухыгъэ хъумэ, нахь дэгъу. ЦIыфыбэ къызэтщалIэ къэс нахь гъэшIэгъон хъущт.
— Спектаклэу къэжъугъэлъэгъощтхэм, жъугъэуцущтхэм ашъхьэ къипхымэ, гъэзетеджэхэм ашIогъэшIэгъоныщт.
— ХэзгъэунэфыкIмэ сшIоигъу пстэуми шIу алъэгъурэ Мамый Ерэджыбэ ипьесэ техыгъэ спектаклэу «Псэлъыхъохэр», загъэуцугъэм щегъэжьагъэу ия 500-рэ къэгъэлъэгъон, мэзаем и 7-м къызэрэттыщтыр. Апэрэу ар 1960-рэ илъэсым сценэм къыщагъэлъэгъуагъ. Зыхьэ Заур, Кукэнэ Мурат, Зыхьэ Мэлайчэт, Кушъу Светлан — жъогъо артист купым мы спектаклыр къызишIырэр мыгъэ илъэс 25-рэ хъущт. «Псэлъыхъохэр» еджэпIэ лабораторие фэдэу, ныбжьыкIэ артистхэр ащ пхырыдгъэкIыхэзэ тшIыныр тимурад. Джащ фэдэу итхъухьагъэмэ ащыщ спектаклэу «Кавказский меловой круг» зыфиIорэр адыгабзэкIэ зэрэщытэу дгъэуцужьыныр. Гъэтхапэм и 27-м — Театрэм и Дунэе мафэ къэмысызэ, къытхэмытыжь актерхэм афэгъэхьыгъэ шIэжь зэхахьэхэр зэхэтщэнхэр тимурад. Игъонэмысэу зидунай зыхъожьыгъэхэу, «ЛГИТМиКым» — ленинград студием щеджагъэхэм ахэтыгъэхэу Афыпсыпэ щыщхэм шIэжь зэхахьэхэр афэтшIыщтых. Лъэпкъ театрэм ыгъэуцугъэ спектакль дэгъухэр зэкIэ тыугъоижьыщтых, Iоф адэтшIэщт.
— Театральнэ объединениеу узипащэм сыд фэдэ пшъэрылъа иIэхэр?
— Лъэпкъ театрэм нэмыкIэу Урыс драматическэ театрэри ащ хэт. ТIуми гъунэ алъысфыщт. Режиссерхэр зэзэгъыныгъэкIэ сштэхэзэ спектакльхэр дгъэуцущтых. Урыс театрэм ирепертуари тыхэплъэщт.
— Рустам, Тэхъутэмыкъое районым къиунэгъэ ныбжьыкIэ театрэу о зэхэпщагъэм сыда рыкIощтыр?
— Ащ джыдэдэм ипащэр Шалэ Рустам. Театрэм зэкIэмкIи актери 8 хэт. Лъэпкъ театрэм иIофшIэн ахэр къыхэзгъэлажьэхэмэ сшIоигъу. Фэдэ зэпхыныгъэхэм мэхьанэшхо яI. ХэзгъэунэфыкIынэу сыфай республикэм и ЛIышъхьэу КъумпIыл Мурат театрэм иIофхэм зэрагъэгумэкIырэр, къызэрэткIэупчIэрэр, къызэрэддеIэрэр. Ащ кIуачIэ къытеты. Джы зыуж сихьэмэ сшIоигъор сэнаущыгъэ зыхэлъ ныбжьыкIэхэм якъыхэгъэщын.
— Опсэу, Рустам, уахътэ къыхэбгъэкIи редакцием хьакIэу укъызэреблэгъагъэмкIэ. ТихьакIэщхэм тащызэIукIэн, театрэхэм ашIырэ гъэхъагъэхэм афэгъэхьыгъэ къэбархэр къэттхыжьыным тафэхьазыр!
— Тхьашъуегъэпсэу, театрэр шIу зылъэгъухэрэм сыдигъокIи тыкъяжэ!
ДэгущыIагъэр Тэу Замир.