ФэгъэкIотэныгъэ зиIэ автокредитым ипрограммэ икIыгъэ илъэсым агъэкIэжьи, зэхъокIыныгъэ гъэнэфагъэхэр фэхъугъэх. 2023-рэ илъэсми ар лъагъэкIотагъ.

Ащ къытырэ амалхэр хэта зыгъэфедэн зылъэкIыщтхэр ыкIи сыд фэдэ машинэхэр чIыфэкIэ къэпщэфын плъэкIыщтха? Мы упчIэхэм джэуапхэр къяттыжьыщт. Ащ пае интернетым къыщыхаутыгъэ къэбар зэфэ­шъхьафхэр дгъэфедагъэх.

Урысыем щаугъоигъэ машинакIэр къэпщэфынымкIэ фэгъэкIотэныгъэ зиIэ автокредитыр зыгъэфедэн зылъэ­кIыщт цIыф купхэм ахагъэхъуагъ. Мыщ епхыгъэ программэр джы афэIорышIэ дзэ къулыкъушIэхэу частичнэ мобилизацием хэфагъэхэм, ахэм яунагъохэм арысхэм, джащ фэдэу уIэшыгъэ кIуачIэхэм къулы­къур ащызыхьыгъэ пенсионерхэр. Ащ ыпэкIэ мы программэм хахьэщтыгъэх гъэсэныгъэм ыкIи медицинэм епхыгъэу Iоф зышIэхэрэр, зыныбжь имыкъугъэ зы сабый нахь нэмыIэми зэрыс унагъохэр. Шъолъырэу зыщыпсэухэрэм емылъытыгъэу мы купхэм ахахьэхэрэм процент 20 — 25-рэ федэ хэлъэу автомобилыкIэ ащэфын алъэкIыщт.

«Fresh Auto» зыфиIорэ автосалонхэм кредитованиемкIэ ыкIи страхованиемкIэ яподразделениехэм япащэу Ольга Бондаревам къызэриIуагъэмкIэ, сомэ миллионитIум шIомыкIэу зыосэ автомобильхэу «УАЗ», «ГАЗ», «LADA», электромобильхэу «Evolute» зыфиIохэрэр ыкIи «Haval», «Hyundai», «Kia», «Renault» зыфиIохэрэм ащыщхэр фэгъэкIотэныгъэ зиIэ ахъщэ чIыфэкIэ къэпщэфышъущтых.

— Ащэрэм ибагъэ нахьыбэ хъунымкIэ къэралыгъо программэм шIуагъэ къызитыщтыр автомобилыкIэхэр зэрэмакIэм иIофыгъо урысые щакIохэм зыдагъэзыжьыкIэ ары. Мы уахътэм бэдзэршIыпIэм сомэ миллионитIу зыосэ автомобиль къыщыбгъотыныр зэрэкъиныр къыдэплъытэзэ, къа­шIыщт машинэхэм язэмылIэужыгъуагъэ зебгъэушъомбгъун фае, — къыхигъэхъо­жьыгъ Ольга Бондаревам.

Компание купхэу «АвтоСпецЦентр» зыфиIорэм финанс фэIо-фашIэхэмкIэ идепартамент ипащэу Дмитрий Мольковым зэрилъытэрэмкIэ, автомобильхэм ауасэ нахь зыщыхахъорэ лъэхъаным, ахэр зыщэфы зышIоигъохэм япчъагъэ нахьыбэ хъуным фэгъэкIотэн зиIэ автокредитым ипрограммэ фэIорышIэ. Ау автобэдзэрым ишIогъэшхо къекIыщтэп. Ар къызхэкIырэр урысыем къыщыдагъэкIырэ автомобилыкIэхэм япчъа­гъэ нахь макIэ зэрэхъугъэр ыкIи IэкIыб машинэхэр тикъэралыгъо щызыугъоищтыгъэхэм яIофшIэн къызэрэзэтырагъэуцуагъэр ары.

Автомобильхэр зыщэфы зышIоигъохэм япчъагъэ хэхъоным мы программэр зэрэфэIорышIэщтым имызакъоу, автопаркыр гъэкIэжьыгъэным фытегъэпсыхьэгъэн фае.

— Программэм зырагъэушъомбгъуным иIофыгъо къызэтеуцуагъ. Ащ пае, «параллельнэ импортым» къыдыхэлъытагъэу Урысыем къыращэрэ автомобилыкIэхэр, джащ фэдэу трейд-ин шIыкIэкIэ (мыщ ыпэкIэ бэдзэршIыпIэм ар ща­гъэфедэщтыгъ) атырэ автомобилыжъхэр мыщ хэгъэхьэгъэнхэ фае, — еIо Д. Мольковым.

Программэу зигугъу къэтшIырэр фэгъэкIотэныгъэ зиIэ процент 20-м къыхиубытэхэрэм афэгъэхьыгъ, процент 25-р зытелъытагъэр КъокIыпIэ Чыжьэм ишъо­лъырхэм ащыпсэухэрэр ары. Джащ фэдэу Урысыем къыщыдагъэкIырэ электрокархэр фэгъэкIотэныгъэ процент 35-рэ иIэу, ау сомэ мин 625-м мынахьыбэу, ащэфынхэ алъэкIыщт.

Къэзыгъэхьазырыгъэр Iэшъынэ Сусан.