АкъылышIур гукIэгъум икъежьапI
Урысыем изаслуженнэ артистэу, Адыгэ Республикэм инароднэ артистэу, композиторэу, пщынаоу Лъэцэрыкъо Кимэ къызыхъугъэр щылэ мазэм и 16-м илъэс 80 хъугъэ.
АкъылышIур ыгъэшIоныр Лъэцэрыкъо Кимэ икIэсагъ. ЦIыфым нахь лъапIэ зи зэрэщымыIэр къыхигъэщызэ, ащ шIоу фишIэщтыр ищыIэныгъэ щыщэу ылъытэщтыгъ. Сэнэхьатэу къыхихыгъэм фэшъыпкъагъ.
«Ощынэмэ сипаIо зыщылъ», — Лъэцэрыкъо Кимэ къыIоу иныбджэгъумэ зэхахэу къыхэкIыщтыгъ. — Къэмылэжьыгъэр гъэкIодыгъошIу, ау къэмыухъумагъэр хэта зыгъэкIодыщтыр?
Осэпсым къуашъор щызыфыхэрэм Лъэцэрыкъо Кимэ зэращымыщыр цIыфхэм ашIэщтыгъ. ИгушIуагъо къыпфиIуатэ зыхъукIэ, апэ ынаIэ зытыридзэщтыгъэр общественнэ мэхьанэу иIэр зэрэлъыкIуатэрэр ары.
Гупшысэм илъагъохэр
Лъэцэрыкъо Кимэ 1943-рэ илъэсым, мэзаем и 16-м Псэйтыку къыщыхъугъ. Хэгъэгум зэошхоу щыкIорэм цIыфхэм рэхьат къаритыщтыгъэп. Зэш-зэшыпхъухэр 7 хъущтыгъэх. Кимэ аужырэ сабыигъ. Ятэ идунай зехъожьым илъэси 10-м итыгъ. Кимэ ышыпхъу нахьыжъэу Сарэ пщынэуагъ, джэгухэр ыгъэджэгущтыгъ.
ЗэкIэми анахьыжъэу Хьарунэ шыкIэпщынэм, пщынэм, къамылым апыщэгъагъ. Орэдышъохэр пщынэмкIэ къыригъаIохэзэ, лъэпкъ шIэжьым зэрэфэщагъэр Кимэ ыгу рихьыщтыгъ. Ежьыри музыкальнэ Iэмэ-псымэхэм зэрапыщагъэр икъоджэгъухэм алъыIэсыщтыгъ.
Мыекъопэ музыкальнэ училищым чIэхьагъ. Кимэ бэрэ къыIотэжьыщтыгъ директорэу Ахэджэго Щэбан ишIуагъэкIэ псынкIэу исэнэхьат зыфигъэсэныр къызэрэдэхъугъэр. Дзэ къулыкъур къызеухым, Мыекъуапэ къыгъэзэжьыгъ. Артист цIэрыIохэу Шъэожъ Розэ, Сэмэгу Гощнагъо, Жэнэ Нэфсэт, Анзорыкъо Чеслав, Хэшх Казбек, Бэджэ Дзэхъанэ, нэмыкI- хэр зыхэтыгъэхэ ансамблэу «Оридам» композиторэу Тхьабысымэ Умарэ зыхэкIыжьым, К. Лъэцэрыкъор ащ рагъэблэгъагъ. Адыгеим иартист анахь цIэрыIохэм уахэтыным, Iоф адэпшIэным К. Лъэцэрыкъом осэшхо фишIыщтыгъ.
«Налмэсым» зырагъэблагъэм
Ансамблэу «Налмэсым» ихудожественнэ пащэу Бэшкэкъо Мэсхьудэ зырагъэблагъэм, Лъэцэрыкъо Кими оркестрэм иIэшъхьэтетэу агъэнэфагъ. Урысыем ишъолъырхэр «Налмэсым» къыкIухьэхэзэ, Адыгеим итарихъ нахьышIоу зэрагъашIэ зэрэхъугъэм К. Лъэцэрыкъом иIахьышIу хэлъ.
«Налмэсым» пае зэригъэфэгъэ мэкъамэхэр, лъэпкъ композициехэр «Налмэсым» имызакъоу, нэмыкI ансамблэхэми ярепертуар хагъахьэх. Анахьэу ащ ыгъэунэфыгъэр ижъырэ адыгэ орэдхэр ашымыгъупшэнхэм фэшI музыкальнэ еджапIэхэм ахэр ащакIунхэ зэрэфаер ары.
ЕджапIэхэм ащакIух
Адыгэ Республикэм культурэмкIэ и Министерствэ, Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэр, Адыгэ Республикэм искусствэхэмкIэ иколледж, нэмыкIхэри кIэщакIо фэхъухэзэ Лъэцэрыкъо Кимэ фэгъэхьыгъэ зэнэкъокъухэр Адыгеим щызэхащэх. Адыгэ Республикэм искусствэхэмкIэ икIэлэцIыкIу еджапIэу К. Лъэцэрыкъом ыцIэ зыхьырэм ипащэу Анзорыкъо Марзет зэрилъытэрэмкIэ, зэнэкъокъухэм ямэхьанэ илъэс къэс нахь зыкъеIэты.
— КIэлэцIыкIухэр, ныбжьыкIэхэр апэ районхэм ащызэнэкъокъух, хагъэунэфыкIырэ чIыпIэхэр ахэм къащызыхьыгъэхэр Мыекъуапэ щызэIокIэх, — къеIуатэ Адыгэ Республикэм культурэмкIэ и Министерствэ иотдел ипащэу, Адыгеим культурэмкIэ изаслуженнэ IофышIэу Шэуджэн Бэлэ. — ИлъэситIум зэ зэнэкъокъур зэхэтэщэ. Лъэцэрыкъо Кимэ ытхыгъэ произведениехэр заулэрэ къыдэдгъэкIыжьыгъэх. ЗэлъашIэрэ композиторым, пщынаом къыригъаIощтыгъэ произведениехэр жъы хъухэрэп. КIэлэцIыкIу, нэмыкI еджапIэхэм ащэIух.
Фольклорым имэхьан
Лъэцэрыкъо Кимэ адыгэ фольклорым фэгъэхьыгъэу зэригъэфагъэр бэ. «ЦIыф лъэпкъым ыбзэр ыбзэгу» зыфаIорэ адыгэ гущыIэжъым Кимэ къытегущыIэзэ къыIогъагъэр сщыгъупшэрэп, — къеIотэжьы Адыгэ Республикэм культурэмкIэ изаслуженнэ IофышIэу Нэгъуцу Аслъан. — Кимэ искусствэм ыбзэкIэ цIыфхэм адэгущыIэщтыгъ».
К. Лъэцэрыкъом пщынэхэр ышIыжьыщтыгъэх. Адыгэ Республикэм культурэмкIэ и Министерствэ исурэт къэгъэлъэгъуапIэ Лъэцэрыкъо Кимэ ышIыгъэ шыкIэпщынэр лъэгъупхъэу чIэлъ. АР-м икIэлэцIыкIу ансамблэу «Тыжьын» зыфиIорэм ихудожественнэ пащэу, лъэпкъ музыкальнэ Iэмэ-псымэхэмкIэ IэпэIасэу ГъукIэ Замудин къытиIуагъ еджакIохэм Лъэцэрыкъо Кимэ ытхыгъэ произведениехэр зэрашIогъэшIэгъонхэр.
«Тыжьыныр» зэнэкъокъу зэфэшъхьафхэм ахэлажьэ. Дунэе зэнэкъокъоу «Адыгэ пшъашъ» зыфиIорэр мыгъэ Адыгеим зыщызэхащэм, «Тыжьыным» хэт пшъашъэхэм, кIалэхэм адыгэ орэдыбэ къырагъэIуагъ, кIэлэцIыкIухэм аготхэу шIэныгъэлэжьхэм, артистхэм, ны-тыхэм, нэмыкIхэм нэпэеплъ сурэтхэр атырахыгъэх.
Лъэцэрыкъо Кимэ иIофшIагъэхэм ащыщыбэ къымылъэгъужьыгъ нахь мышIэми, ишIушIагъэ лъэхъаным щыкIодыщтэп.
Оркестрэ псаум ычIыпI
Лъэцэрыкъо Кимэ концертхэм ахэлэжьэныр икIэсагъ. Адыгэ Республикэм изаслуженнэ артистхэу Шъэожъ Розэ, Анзорыкъо Чеслав, Нэхэе Тэмарэ, нэмыкIхэм къадитыгъэ концертхэр гъашIэм жъы щыхъущтхэп.
«Синан», «О унитIу», «Адыгэ хэку», фэшъхьафхэм уядэIузэ Нэхэе Тэмарэ къыIуагъэри гум рехьы.
— Лъэцэрыкъо Кимэ сыд фэдэрэ лъэныкъокIи ущытхъунэу щытыгъ. Оркестрэ псаум ычIыпIэу ар зылъытэщтыгъэхэм адесэгъаштэ.
Пщынэо цIэрыIоу Лъэцэрыкъо Кимэ фэгъэхьыгъэ зэхахьэхэр, ныбджэгъу зэIукIэгъухэр мы мафэхэм Адыгеим щыкIощтых. Ар къыдэтлъытэзэ, анахьэу тызыгъэгушIорэр иIофшIагъэ мэхьанэу иIэр зэрэлъыкIуатэрэр ары. «Адыгэ макъэм» иныбджэгъушIоу ар щытыгъ. Гъэзетеджэхэм пчыхьэзэхахьэхэр, зэIукIэгъу гъэшIэгъонхэр афызэхатщэхэ зыхъукIэ, Лъэцэрыкъо Кимэ къыкIэупчIэщтыгъэх, Кимэ зыхэлэжьэрэ концертхэм цIыфхэр нахьыбэу къакIощтыгъэх. Кимэ ыгу къытемыожьырэми, иIофшIагъэхэмкIэ къытхэт, тэгъэлъапIэ.
ЕмтIылъ Нурбый.