Анахь дэгъуи 5-м ахэфагъ
Адыгэ Республикэм и ЛIышъхьэу КъумпIыл Мурат «Поем на кухне всей страной» зыфиIорэ зэнэкъокъоу Урысыем ителевидение и Апэрэ канал щызэхащэгъагъэм текIоныгъэр къыщыдэзыхыгъэ фольклорнэ-этнографическэ ансамблэу «Ащэмэзым» фэгушIуагъ «Лъэпкъ творчествэм изаслуженнэ куп» зыфиIорэр къызэрэфаусыгъэм фэшI.
— Мэфищым кIогъэ зэнэкъокъум «Ащэмэзым» тигъэгушIуагъ. ИIэпэIэсэныгъэкIи, артистхэм ясэнэхьатхэмкIи осэ ин къафашIыгъ, — къыIуагъ КъумпIыл Мурат. ОсэшI купым хэтыгъэу, тхакIоу Лариса Рубальскаям анахьэу къыхигъэщырэр «Ащэмэзым» орэд къыIозэ яIэпэIэсэныгъэ къызэрагъэлъэгъуагъэр ары.
Команди 5 анахь дэгъоу къыхахыгъэхэм Адыгэ Республикэм икъэралыгъо ансамблэу «Ащэмэзыр» ащыщ.
Москва, Санкт-Петербург, КъокIыпIэ Чыжьэм, нэмыкIхэм къарыкIыгъэхэм пщэрыхьапIэм щагъэжъэгъэ шхыныгъохэр къагъэлъагъощтыгъэх. Адыгеим къызынэсыхэм, Валдис Пельш псынкIэу къыIуагъэм тыгу къыIэтыгъ.
— Адыгэ къуаем нэмыкIэу Адыгеим сыда джыри къишъухыгъэр? — къыIуагъ В. Пельш.
Адыгэ кIалэхэу Беданыкъо Жьыут, КIуращынэ Адам, ЛIыхъурэе Анзор гуубатэм къыщегъэжьагъэу шхыныгъохэм къатегущыIагъэх. Сапый Аскэр адыгэ къуаем еплъыкIэу фыриIэр къыIотагъ.
Анахьэу тэ къыхэдгъэщырэр зы. ЗэкIэ мэфэкIым хэлажьэхэрэм Адыгеир ашIэ. Адыгэ къуаер, нэмыкIхэри агъэлъапIэх. Нэм ылъэгъурэр гум шъхьапэ зэрэфэхъурэм къыпкъырыкIыхэзэ, тиIанэ телъ шхыныгъохэм защагъэгъозагъ.
Къэбэртэе-Бэлъкъарым иансамблэу «Абрекхэм» тилъэпкъ ишхыныгъохэр къагъэлъэгъуагъэх. Ащ дакIоу адыгабзэкIэ лъэпкъ мэкъэмэ чаныр къаIуагъ, адыгэ макъэр агъэIугъ.
Узэгъусэмэ узэрэлъэшыр, Къэбэртэе-Бэлъкъарым, Адыгеим яныдэлъфыбзэ зы лъапсэ зэриIэр тиансамблэхэм къагъэлъэгъуагъ, адыгэ лъэпкъ къашъохэр, адыгэ мэкъамэхэр мэфэкI зэхахьэм щагъэIугъэх. Зэкъош республикэхэм яадыгэ Iанэхэр, лъэпкъ къашъохэр зэкIэми анахь дэгъугъэхэу плъытэ хъущт.
— ШIоу щыIэр къадэхъунэу, мамыр щыIакIэр яIэу псэунхэу ИлъэсыкIэ мэфэкIым хэлэжьагъэхэм афэтэIо, — къытиIуагъ «Ащэмэзым» ихудожественнэ пащэу, АР-м культурэмкIэ изаслуженнэ IофышIэу Бастэ Асыет.