Къэралыгъо щытхъуцIэр къалэжьыгъ
УФ-м культурэмкIэ и Министерствэ иунашъокIэ «Лъэпкъ творчествэм изаслуженнэ куп» зыфиIорэ щытхъуцIэр къыфагъэшъошагъ фольклорнэ-этнографическэ купэу «Ащэмэзым».
Ащ фэгъэхьыгъэ унашъо щылэ мазэм и 10-м 2023-рэ илъэсым къыдэкIыгъ.
Купым ихудожественнэ пащэр – АР-м культурэмкIэ изаслуженнэ IофышIэу, педагогикэ шIэныгъэхэмкIэ кандидатэу Бастэ Асиет.
«Ащэмэзыр» 2005-рэ илъэсым зэхащэгъагъ. 2012-рэм культурэм имуниципальнэ учреждениеу творческэ зэхэт купэу «Ошъадэм» ар хэхьагъ, зэнэкъокъу, фестиваль зэфэшъхьафхэм ядипломхэр пчъагъэрэ къыдихыгъэх.
«Лъэпкъ творчествэм изаслуженнэ коллектив» зыфиIорэ щытхъуцIэр куп 46-мэ икIыгъэ илъэсым къафагъэшъошагъ. Ащ кIэлъэIухэу къэралыгъом ишъолъыр 60-мэ якупхэм УФ-м культурэмкIэ и Министерствэ 2022-рэ илъэсым зыфагъэзэгъагъ.
ЩытхъуцIэмкIэ «Ащэмэзым» иартистхэми, ихудожественнэ пащэу Бастэ Асиети тигуапэу тафэгушIо!