Кавказ шъолъырхэм ямузыкальнэ каналэу «Я 9-рэ волна» зыфиIорэм Илъэсы­кIэм фэгъэхьыгъэ къэтынэу джырэблагъэ щызэхащагъэр шIукIэ тыгу къинэжьыщт.

Къэбэртэе-Бэлъкъарым, Адыге­им, Къэрэщэе-Щэрджэсым яартист цIэрыIохэр концертым хэлэжьагъэх. Урысыем, Къэбэртэе-Бэлъкъарым, Къэрэщэе-Щэрджэсым, Адыгеим яна­роднэ артистэу Тутэ Заур иорэд къэIуакIэ тихэгъэгу имыза­къоу, IэкIыб къэралхэм ащашIэ.

Кавказым щыцIэрыIох Хьа­жьырэкъо СултIан, Апэнэс Асте­мир, Сэкъурэ Ольгэ, нэмыкI­хэри. Адыгеим изаслуженнэ артистхэу Быщтэкъо Азэматрэ Дзыбэ Фатимэрэ шIулъэгъу орэдыр къызэдаIуагъ. Быщтэкъо Азэмат Адыгэ хэкум ехьылIэгъэ орэдыр мэкъэ IэтыгъэкIэ ыгъэжъынчыгъ.

Урысыем иэстрадэ щызэлъа­шIэу, Адыгеим, Къэбэртэе-Бэлъ­къарым язаслуженнэ артисткэу Къэзэнэ Сэтэнае ижъырэ адыгэ орэдхэм тамэ зэрари­тырэр зэхахьэм къыщигъэлъэ­гъуагъ.

Адыгеим, Къэбэртэе-Бэлъ­къарым, нэмыкI республикэхэм янароднэ артисткэу, тиреспуб­ликэ иныбджэгъушIоу Сэкъурэ Ольгэ «Мэзэгъо чэщыр», фэшъхьафхэри зэхахьэм щигъэ­Iугъэх.

Къэбэртэе-Бэлъкъарым, Адыге­им, фэшъхьаф шъолъыр­хэм яартист цIэрыIоу Нэфышъэ Чэримэрэ ащ игъусэ пщынаоу, Адыгэ Республикэм и Къэралыгъо академическэ къэшъокIо ансамблэу «Налмэсым» хэтыгъэ Псыблэнэ Муратрэ мэфэкI зэхахьэр къагъэбаигъ. ЗэлъашIэрэ артистхэм адыгэ орэдхэм кIуа­чIэу, пIуныгъэ мэхьанэу яIэр къагъэлъэгъуагъ.

Адыгабзэм, шэн-хабзэхэм, адыгэ орэдым щыIэныгъэм чIы­пIэу щыряIэм зызэриушъомб­гъурэм Нэфышъ Чэримэ IупкIэу, зэгъэфагъэу къытегущы­Iагъ.

М. Гъубжьэм игущыIэхэм ате­хыгъэу У. Тхьабысымэм ыусы­гъэ орэдэу «Бэрэчэт босыныр» Ч. Нэфышъэм концертхэм бэрэ къащеIо. Адыгеим икомпозитор цIэрыIоу Тхьабысымэ Умар инэмыкI орэдхэри мэфэкI зэхахьэм къыщаIуагъэх.

Адыгеим, Къэбэртэе-Бэлъ­къарым язаслуженнэ артистэу Апэнэс Астемир Жэнэ Къы­рымызэрэ Сэмэгу Гощнагъорэ зэ­даусыгъэу «Адыгэхэм яхабзэ джащ фэд» зыфиIорэр къыхи-­ дзи, мэфэкI пчыхьэзэхахьэм хэлэжьагъэхэм лъагъэкIотагъ. Тиартистхэм дунаим иконцерт къэтыпIэ хэхыгъэхэр агъэдэ­хэнхэ алъэкIыщтэу тэлъытэ.

Адыгэхэм ятарихъ, шэн-ха­бзэхэр, яискусствэ къизыIотыкIыгъэ пчыхьэзэхахьэм Хьацае Тимур кIэщакIо фэхъугъ. Ащ изэ­фэхьысыжьхэм ащыхигъэу­нэфыкIыгъ адыгэр адыгэу дуна­им зэрэтетыр искусствэм ыбзэкIэ къэтIотэн зэрэтлъэкIырэр.

Зэкъош республикэхэм яшIу­шIагъэхэр тхакIохэм, компо­зиторхэм, артистхэм тапэкIи щы­Iэныгъэм нахь лъагэу щаIэтыщт. 2023-рэ ИлъэсыкIэм гъэ­хъагъэу тиIэхэм ахэдгъэхъонэу Тхьэм телъэIу.

ЕмтIылъ Нурбый.