Адыгэ Республикэм атлетикэ онтэгъумкIэ ихэшыпыкIыгъэ командэ хэтхэу Бзэсэжъ Ас­лъанрэ Артем Горловымрэ Урысыем и Кубок икъыдэхын фэгъэхьыгъэ зэнэкъокъум зыфагъэхьазыры.

— Урысыем ихэшыпыкIыгъэ коман­дэ хэтых Бзэсэжъ Аслъанрэ Артем Горловымрэ, — къытиIуагъ Адыгэ Республикэм атлетикэ он­тэгъумкIэ испорт еджапIэу Чыр­жьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан. — Москва хэкум икъалэу Рузэ тиспортсменхэр кIуагъэхэу яIэпэIэ­сэныгъэ хагъахъо. Бзэсэжъ Аслъан Кощхьаблэ щыщ. Адыгэ Республикэм изаслуженнэ тренерэу Сихъу Аслъанрэ тренерэу Сихъу Рэмэзанрэ агъасэ. Артем Горловым итренерыр Тэхъутэмы­къое районым щыщэу Роман Казаков.

2022-рэ илъэсым Адыгеим испорт­смен анахь дэгъухэу Адыгэ Респуб­ликэм физкультурэмкIэ ыкIи спортымкIэ и Комитет къыхихыгъэхэм Артем Горловымрэ Бзэсэжъ Ас­лъанрэ ащыщых.

Артем Горловыр 2022-рэ илъэсым къалэу Тулэ Урысыем иныбжьыкIэхэм язэнэкъокъоу щыкIуагъэм хэлэжьагъ. Урысые Федерацием ирекорд гъогогъуи 6 Тулэ щигъэуцугъ, хэгъэгум апэрэ чIыпIэр къыщыдихыгъ.

Бзэсэжъ Аслъан Урысыем и Кубок ыкIи Урысыем изэнэкъокъу ятIонэрэ чIыпIэхэр къащихьыгъ. Белоруссием дунэе зэIукIэгъоу щы­кIуагъэм тыжьыныр къыщыфагъэшъошагъ.

Адыгэ къэралыгъо университетым физкультурэмрэ дзюдомрэкIэ и Ин­ститут Бзэсэжъ Аслъан щеджэ, спор­тым ищыIэныгъэ рипхын имурад.

Мэзаем и 6-м къалэу Грознэм Урысыем атлетикэ онтэгъумкIэ и Кубок къыдэхыгъэным фэгъэхьыгъэ зэнэкъокъур щыкIощт. Адыгеим испортсменхэм яухьазырыныгъэ тапэкIи хагъэхъонэу, хэгъэгум ыкIи дунэе зэнэкъокъухэм гъэхъагъэхэр ащашIынэу афэтэIо.