Лъэпкъым икIэн къыухъумэщт
Ерокъо Бишер Шам къыщыхъугъ. 1990-рэ илъэсым яунагъокIэ Къэбэртэе-Бэлъкъарым, Налщык, къэкощыжьыгъагъэх. Къиныгъо зэфэшъхьафхэм апкъ къикIэу 1995-рэ илъэсым Ерокъохэм яунагъо Шам ыгъэзэжьын фаеу хъугъэ, ау илъэсибл зытешIэм, 2002-рэ илъэсым, ятIонэрэу хэкужъым къэкIожьыгъэх ыкIи мызыгъэгум щыгупсэфыгъэх.
Бишер сатыушIынымкIэ Къэбэртэе-Бэлъкъарым ит унэе институтыр къыухыгъ. Саудовскэ Аравием, Иорданием, Тыркуем охътэ кIэкIхэм Iоф ащишIэнэу хъугъэ. Нэужым ежь иунэе медиа-компание зэхещэ. Iофтхьэбзэ зэфэшъхьафхэм ярегъэкIокIын, ятехын Iоф дашIэ. Унагъо иI, ишъхьэгъусэу Симаз хэкум къэзыгъэзэжьыгъэ Быжьхэм ялIакъо щыщ, пшъэшъитIу зэдапIу.
Бишер ежь истудие иамалхэр ыгъэфедэзэ адыгэ къэшъуакIохэр, орэдыIохэр зыхэлэжьэрэ концертхэм ятехын зэрэдэлажьэрэм икъэбар Темыр Кавказым щыIугъ. Щылэ мазэм мэфэкI зыгъэпсэфыгъо мафэу къыхэфагъэхэм Iофтхьэбзэ зэфэшъхьафхэр иушъхьагъоу ар Адыгеим къэкIуагъ. Компаниеу «Руфа-Тур» ипащэщтыгъэу Би-бэ Мурат псаоу щыIагъэмэ, ыныбжь мы мазэм и 5-м илъэс 65-рэ хъущтыгъэ. Ащ фэгъэхьыгъэ шIэжь фильмэу Ерокъо Бишер илъэситIум тырихыгъэм икъэгъэлъэгъон-лъэтегъэуцо Бибэ Мурат ишъэогъухэм, игупсэхэм апае унагъом щыщхэм зэхащэгъагъ. Ежь Бишери пчыхьэзэхахьэм къырагъэблэгъагъ.
КъыкIэлъыкIорэ мафэм Бишер гущыIэгъу тыфэхъугъ, тапэкIэ пшъэрылъэу зыфигъэуцужьыхэрэм защыдгъэгъозагъ:
— Бишер, сыд фэдэ лъэныкъохэр ара джыри уздэлэжьэнэу къыхэбгъэщыхэрэр? Сыд джыдэдэм унаIэ зытетыр?
— Тилъэпкъ ихабзэ, икультурэ, иIэшIагъэхэр икъоу къэгъэлъэгъуагъэхэп, ахэм афэгъэхьыгъэ фильмхэр тесхынэу сыфай. Шъыпкъэ, адыгабзэкIэ Iоф зышIэрэ телевидениехэу Къэбэртэе-Бэлъкъарми, Къэрэщэе- Щэрджэсми, Адыгеими арытхэм ащ фэдэ къэтынхэр яIэх. Ау хэз фэмыхъоу, гущыIэм пае, Iэпэщысэхэр зытштэрэм, ублапIэм щегъэжьагъэу пкъыгъор хьазыр охъуфэ ишIын зэрэлъыкIуатэрэм фэгъэхьыгъэ фильмхэр макIэх. Эфир уахътэр афикъурэп, нэмыкI ушъхьагъухэр къэуцух. Сэ фильмым уахътэу текIодэщтымрэ икIыхьэгъэщтымрэ анахьэу икъоу къэгъэлъэгъогъэныр, къиIотыкIыгъэныр, тикультурэ, тихабзэхэр ухъумэгъэнхэр, тауж къикIыхэрэм ащ фэдэ фильмхэмкIэ ар ядгъэшIэныр пшъэрылъэу зыфэсэгъэуцужьы. Медиа-энциклопедие фэдэу проектыр хъунэу сыфай.
А гупшысэр зыдэсIыгъэу арджэн, шъо «пIуаблэ» шъоIо, зэрашIырэм фэгъэхьыгъэу апэрэ техыгъохэр сшIыгъэх. IутIэныр темэным къызыщыхахырэм щегъэжьагъэу — икIыхьагъэ, игъумагъэ, зыщыхахырэ уахътэр, зэрагъэгъушъырэр, IутIэныр зэтезыщхэщт станокым зэрэрагъэкIурэр, тхыпхъэ-сурэтыр зэрэхахырэр, гурытымкIэ тхьамэфитIум къыкIоцI Iоф зэрэдашIэрэр тесхыгъэх. Джы изэкIэлъыкIуакIэ сымыукъоу ар зэхэзгъэуцожьыщт.
— А зы чIыпIэм зэкIэ щытеоха?
— ПIуаблэм ишIын Къэрэщэе- Щэрджэсми Къэбэртэе-Бэлъкъарми ащытесхыгъ. IутIэныр Къэбэртэе-Бэлъкъарым итемэн чIыпI къызхэтхыгъэр. Ежь пIуаблэм Iоф зэрэдашIэрэр Дер Вячеслав ипщыпIэ хьакIэщэу Къэрэщэе-Щэрджэсым итым щытетхыгъ. ПIуаблэм ишIын къэзыгъэлъэгъуагъэр зэлъашIэрэ IэпэIасэу Мэстафэ Вячеслав.
— Ащ сыд къыкIэлъыкIощтыр?
— Ащ ыуж АдыгеимкIэ зыкъэзгъэзэнэу сыфай. Кушъэ, Iанэ зышIырэ IэпэIасэхэр мыщ бэу щыIэх. Гостэкъо Руслъан зыIузгъэкIагъ. IэпэIэсэ хьалэмэт, цIыф шIагъу. ИпщыпIэ лъэшэу сыгу рихьыгъ, пхъэм дэгъоу Iоф дешIэ. Нэгъуцу Аслъани, ГъукIэ Замудини саIукIагъ. Замудин музыкальнэ Iэмэ-псымэхэм Iоф зэрадишIэрэр сшIогъэшIэгъон, къыIотэнэу, къыгъэлъэгъонэу ышIэрэр бэ. Нэгъуцу Аслъани цIыф зэIухыгъ, IэпэIэсэ шIагъу. АцIэхэр Iугъэу адыгэ дунаим мыхэр щызэлъашIэх.
Джащ фэдэу адыгэ Iашэм, адыгэ шъуашэм, тикъашъохэм афэгъэхьыгъэ фильмхэр тесхын симурад. Адыгеим, Къэбэртэе-Бэлъкъарым, Къэрэщэе-Щэрджэсым, хы ШIуцIэ Iушъом щыпсэурэ шапсыгъэхэм, хэхэс адыгэхэм адэжь сыкIозэ сиIофшIэнхэр лъызгъэкIотэщтых.
— Тыдэ къыщыбгъэлъэгъощтха уифильмхэр?
— ЗэкIэмэ апэу дунэе фестиваль зэфэшъхьафхэм анэзгъэсынхэ симурад. АрэшI нэмыкI лъэпкъхэм адыгэхэм якультурэ зыфэдэр, дунаим тызэрэтетыр. Шъэрэ зэхэпхыным нахьи зэ плъэгъуным ишIогъэшхо къэкIо. ТиныбжьыкIэхэм апай мы проектыр. Сыфай фильмэу сшIыщтхэр кинотеатрэхэм ыпкIэ хэмылъэу къащызгъэлъэгъонэу. ТыркубзэкIэ, арапыбзэкIэ, инджылызыбзэкIэ зэдзэкIыгъэ хъунхэу. Къэралыгъо зэфэшъхьафхэм къащыдгъэлъэгъон тлъэкIынэу. МэлакIэ лIэрэ цIыфыр Iэнэ шыгъэм зэрэпэтIысхьэрэм фэдэу мы фильмхэр тилъэпкъэгъухэми, нэмыкI лъэпкъхэми ашIогъэшIэгъоныщт.
— Спонсор горэхэр IэпыIэгъу къыпфэхъунхэу укъагъэгугъагъа?
— Спонсорхэм илъэс 15 хъугъэу сяжэ. Уахътэр макIо, цIыф IэпэIасэхэм япчъагъэ хэкIы, пандемием иуахътэ бэ зидунай зыхъожьыгъэр. Ащ нахьыбэрэ зыми тежэщтэп. Сэр-сэрэу систудие иамалхэмкIэ тымыгузажъоу, зы пкъыгъом ишIын къэбгъэлъэгъоным пае тебгъэкIодэн фэе мэфэ пчъагъэр фэдгъэшъуашэзэ тетхыщт. Мыр зы илъэсэп, илъэситIоп, илъэс пчъагъэрэ Iоф зыдэсшIэщт проект. Джы едгъэжьэгъэ къодый. Лъэпкъым тишIуагъэ горэ едгъэкIыныр типшъэрылъ шъхьаI!
— Тхьэм шъуимурадхэр къыжъудегъэхъух! ПроектыкIэм «Гъогу маф!» етэIо!
— Тхьашъуегъэпсэу.
Тэу Замир.