Хы ШIуцIэ Iушъом Iус шапсыгъэхэм якIэлэцIыкIу творческэ купхэм заушъомбгъу, ягъэхъагъэхэм ахагъахъо.

Пандемие илъэситIум ахэм ятворческэ проектхэр онлайн шIыкIэм тетэу пхыращыгъэх, уахътэр агъэ­хьау­лыягъэп. Шъачэрэ ТIо­псэ районымрэ яадыгэ артист цIыкIухэм етIупщыгъэу Iоф зыдашIагъ, ярепертуар зырагъэушъомбгъугъ, номерыкIэхэр агъэ­хьазырыгъэх. Къяплъыщтхэм зэрафэзэщыгъэхэри нафэ.

Ащ фэдэу сэнаущыгъэ зыхэлъ тиныбжьыкIэхэм Iоф адэзышIэхэрэм ацIэ къесIомэ сшIоигъу. Ахэр: Дэгу Рустам (ансамблэу «Черкесиер», Ныджэ­псыхъу), Хъущт Фатим («Адыгэхэр», ПсышIуап), Тхьэгъушъэ Марыет («Жъо­гъобын», КодэшъхьапI), Тэрчкъо Муратрэ Бибэ­рэ («Шапсыгъ», ПсышIуап), Нэгъуцу Сур («Дышъэ кIэн», Агуяп), Цундышк Марзыет («Шапсыгъэ инэфылъэхэр», Агуй-Шапсыгъ), Ацумыжъ Маргарит («Талисман», Псыбэ), Шъхьэлэхъо Мурдин («Псынэпс», Псыбэ), КIошъэ Сафыет («Одышъ», ПсышIуап), КIу­рэщынэ Марин («Дышъэ къам», ЦIэпс).

Анахьэу узыгъэгушхорэр IэпэIэсэныгъэу тикIэлэ­цIыкIухэм, зихэхъогъухэм, ныб­жьыкIэхэм ахэлъым, ясэнаущыгъэ осэ ин къызэрафашIырэр ары. Гущы­Iэм пае, гъэмафэу кIуа­гъэм Краснодар краим и Хэбзэихъухьэ ЗэIукIэ и Рэ­зэныгъэ тхылъ къыфагъэшъошагъ Дэгу Рустам. Ар АдыгеимкIэ къуаджэу Кощхьаблэ щыщ. Охътэ зэфэшъхьафхэм художест­веннэ купэу «Дышъэ къа­мэм» хэтыгъ. Къырагъэ­блэгъагъэу адыгэ культу­рэм и Гупчэ Iоф щишIагъ, 2014-рэ илъэсым къыщегъэжьагъэу культурэм и Гупчэу «Юность» зыфиIоу поселкэу Ныджэпсыхъо дэтым икIэлэцIыкIу ансамб­лэу «Черкесием» ипащ.

Купым шъолъыр, Урысые ыкIи дунэе зэнэкъокъу­хэм текIоныгъэу къащихьыгъэр пшIы пчъагъэ мэхъу. Мы илъэсым лъэпкъ зэфэшъхьафхэм къахэкIыгъэ кIэлэцIыкIухэмрэ зихэхъогъухэмрэ зыхэт ансамблэр Дунэе фестивалэу «Союз талантов России» зыфиIо­рэм хэлажьи, ащ и Гран-при къырихыгъ.

Краснодар краим истаницэу Динскоим искусст­вэмкIэ ыкIи творчествэмкIэ я IV-рэ Урысые зэнэкъо­­къоу щызэхащэгъагъэми Дэгу Рустам зипэщэ купым ащ фэдэ тын къыщихьыгъ. Лъэпкъ къашъохэмкIэ анахь дэгъоу ар къыщыхахыгъ. КъэкIощт илъэсым игъэтхэ­пэ мазэ ансамблэр зызэхащагъэр илъэси 10 хъущт.

Динскоим щыкIогъэ зэ­нэкъокъум анахь дэгъоу къыщыхахыгъэхэм ахэ­фагъ Псыбэ икIыгъэ купэу «Талисман» зыфиIорэри. Ижъы­рэ адыгэ къашъоу «Уджыр» къызэрашIыгъэм пае апэрэ шъуашэ зиIэ Диплом ащ къыфагъэшъошагъ.

Купым ипащэу Ацумыжъ Маргаритэ Псыбэ щыщ. ИскусствэхэмкIэ Адыгэ рес­публикэ колледжэу Мыекъуапэ дэтыр къызеу­хым ыуж зэлъашIэрэ къэшъокIо ансамблэу «Налмэ­сым» хэтыгъ. ИлъэсиблыкIэ узэкIэIэбэжьмэ культу­рэм и Унэу Псыбэ дэтым щызэхащагъ зипэщэ «Талисманыр». Ар ТIопсэ районым дэгъоу щашIэ. 2019-рэ илъэсым культу­рэхэм я Урысые фестиваль дипломкIэ къыщыхагъэ­щыгъ, мызэу, мытIоу рэзэ­ныгъэ ыкIи щытхъу тхылъхэр къыфагъэшъошагъэх.

Мы илъэсым игъэтхэпэ мазэ культурэм ыкIи ис­кус­ствэм алъэныкъокIэ гъэ­хъа­гъэхэр зышIыгъэхэр къызщыхахыгъэ зэнэкъо­къум «Творческэ купым ипэщэ анахь дэгъу» зыфаIорэ цIэр къыхьыгъ куль­турэм и Унэу Агуяпэ дэтым иансамблэу «Дышъэ кIэным» ихудожественнэ пащэу Нэгъуцу Сурэ.

Ар Агуй-Шапсыгъэ къыщыхъугъ. 2007-рэ илъэсым къыщыублагъэу «Шапсыгъэ инэфылъэхэр» зыфиIорэ купым хэтыгъ, 2017-м къы­щегъэжьагъэу культурэм зыщыпылъхэ, гъэпсэфыгъо уахътэр зыщагъэкIорэ Гупчэу икъуаджэ дэтым ыкIи «Дышъэ кIэным» япащ. 2021-рэ илъэсым «ЩысэтехыпI» зыфиIорэ цIэр ансамблэм къыхьыгъ, ТIопсэ районым икIэлэ­цIыкIу купхэмкIэ анахь дэ­гъоуи къыхахыгъ.

Зызэхащагъэр илъэс 50 зыщыхъугъэм джыри зы текIоныгъэ къыхьыгъ ­лъэпкъ ансамблэу «Шапсыгъэм». Тэрчкъо Муратрэ Бибэрэ агъэсэрэ купым Шъачэ щы­кIогъэ я II-рэ Дунэе фе­стиваль-зэнэкъокъоу «Му­зыка ветра» зыфиIорэм лъэныкъо зэфэшъхьафищымкIэ дипломхэр къыщихьыгъэх. Джащ фэдэу артист ныбжьыкIэхэм 2022-рэ илъэсым щыIэщт Дунэе зэнэкъокъу-фестивальхэу «Кубок Гран-при» ыкIи «Ку­бок России» зы­фи­Iо­хэрэм яфиналхэм ахэ­лэжьэнхэу ахъщэ зэ­рылъ сертификат къаратыгъагъ.

Хъущт Фатимэ зипэщэ купэу «Адыгэхэр» зыфи­Iорэм Мыекъуапэ щызэхащэгъэгъэ Дунэе фестиваль-зэнэкъокъоу «Адыгеим ижъогъожъыехэр» зыфиIорэм ящэнэрэ шъуашэ зиIэ диплом къыщыратыгъ, Шъачэ щыкIогъэ фестивалэу «Морской бризым» Гран-при къыщырихыгъ.

Iоныгъо мазэм «Адыгэ­хэм» хореографиемкIэ я XXI-рэ Дунэе олимпиадэм апэрэ чIыпIэр къыщихьи, дышъэ медаль къыфагъэшъошагъ. Я XXIV-рэ фес­тиваль-зэнэкъокъоу Шъа- чэ щыкIуагъэми наградищ къыщихьыгъ. Ижъырэ ­адыгэ къашъохэу «Удж», «ЛъэпэчIас» зыфиIохэрэр къызэрашIыгъэхэм пае апэ­рэ шъуашэ зиIэ дип­ломхэр, «Лъэпэрышъом» пае ятIонэрэ шъуашэ зиIэ диплом къахьыгъэх.

НЫБЭ Анзор.