ЦIыфым анахь зэман дахэу, тхъагъоу иIэр ицIы­кIугъор ары.

Уянэ-уятэхэм яжьау учIэтэу, дунаир мамырэу, щыIэныгъэ гъэшIэгъон горэ уапэ илъ пшIошIэу, гугъэ дахэр угу илъэу — джары цIыфым ицIыкIугъор, иныбжьыкIэгъур зыфэдэр. Джэгу горэ чылэм дэт зы­хъукIэ жъи, кIи екIущтыгъэх. Пщынаом пщынэр «къыгъэгущыIэу», пхъэкIычаохэр де­жъыу­хэу, адыгэ къэшъо зэфэшъхьаф­хэр къашIыхэ зыхъукIэ тшIогъэ­шIэгъонэу тяплъыщтыгъ. Ар тэ мэхьэнэ ин зиIэ мэфэкIышхо горэу къытщыхъущтыгъ.

Орэдыжъхэу «Си Пакъ», «Си Мэмэт», «Зизу иорэд», «Табу» цIыфмэ ащыгъупшэжьыгъэхэу, тарихъым къыхэнагъэхэу ары зэрэслъытэщтыгъэр. Ау къы­зэрэсшIомышIэу къычIэкIыгъ.

Ансамблэу «Ошъутенэм» иконцертэу Къэралыгъо филармонием къыщигъэлъэгъуагъэм сеплъынэу хъугъэ. Пшъашъэхэр лъэпэ-лъагэхэу, пкъыищыгъэ дахэхэу, шIыкIашIохэу; кIалэхэр адыгэ лIым (ищыкIагъэ зыхъукIэ) жьым фэдэу зипхъуа­тэу, лIыгъэ пытагъэр хэлъэу, лIыблэнагъэр зэрихьэу зэрэ­щытыгъэм иобраз уапашъхьэ къырагъэуцо. Амакъэхэр зэди­штэу, адыгэ шъошэ дахэхэр ащыгъхэу, орэдэу къаIорэм къы­дашъохэзэ, орэдыжъхэу тя­тэжъ-тянэжъхэм ялъэхъанэхэм къаIощтыгъэхэр зэхытагъэхы­гъэх.

СицIыкIугъом, синыбжьыкIэгъум къыгъэзэжьыгъэм фэдэу сыгу гушIом зэрихьэу, непэрэ мафэм гумэкIыгъоу щыIэхэр сщигъэгъупшагъэу, гушIор сыгу илъэу сыкъычIэкIыжьыгъ. Орэдыжъым ыпсэ къыпыз­гъэ­кIэжьыгъэу, непэ псэурэ цIыф­хэм, ныбжьыкIэхэм агу нэсэу, къаIонхэ, едэIунхэ, къыдэшъонхэ алъэкIынэу амал къязытыгъэр Адыгэ хэкум, Урысыем ыкIи IэкIыб къэралыгъохэм ащы­псэурэ адыгэхэм зэлъашIэрэ композиторэу, орэдыIоу, АР-м искусствэхэмкIэ язаслуженнэ IофышIэшхоу, ансамблэу «Ошъу­тенэм» ипащэу ХьэкIэко Алый. Алыйрэ ишъхьэгъусэу Асерэ орэдыIо купыр зэдырагъаштэу, зы унэгъо зэгурыIожь фэдэу зэращэ.

Орэдыжъмэ ямызакъоу, «Ошъу­тенэм» ирепертуар джырэ уахътэм диштэрэ орэд­хэри хэтых. Ахэр зытхыхэрэр Хьэ­кIэко Алый. Орэдэу «Адыгэ бзылъфыгъ» зыфиIорэр сыдым ымыуас! Бзылъфыгъэр ыгъэ­лъапIэу, ыгъэлъагэу, гупшысэ куу хэлъэу идахэ къыщиIуагъ. Мы орэдыр адыгэ бзылъфыгъэм игимнэу сэ сэлъытэ.

Артист сэнэхьатыр къызэрыкIоп. Сэнэхьатэу къыхэпхыгъэу, уищыIэныгъэ зэпхыгъэр лъэшэу шIу плъэгъун фае. Урыс балеринэ цIэрыIоу Галина Улановам ыIогъагъэм, «Надо любить балет, а не себя в нем», зэкIэри къе­Iуатэ. Артистым образэу къы­гъэлъагъорэм шъыпкъэныгъэшхо фыриIэу, пшIошъ ыгъэхъоу, гум къынигъэсэу къышIы зыхъукIэ, ар артист шъыпкъ.

Ансамблэм хэтхэу Алевтина Кобазевам, Мэкъоо Маринэ, Мамхыгъэ Маринэ, ХьэцIэцIэ Ми­ланэ, Хьазэщыкъ Мосэ, Юрий Конжиным, Жарэкъо Руслъан ясэнэхьат шIу зэралъэгъурэр нэрылъэгъу. Ау сэ лъэшэу сшIогъэшIэгъоныгъэр, къахэзгъэщынэу сызыфаер Юрий Кон­жиныр ары. Урыс кIалэм зэкIэ адыгэ орэдхэр къадеIо. Ащ орэ­дыжъэу «Адыиф» къызэриIорэр зэхэпхын фае, ымэкъэ дахэкIэ, адыгэбзэ къабзэкIэ, къыIорэм имэхьанэ къызэрэгурыIорэр къыхэщэу.

Ижъырэ зэманхэм къары­кIэу ащ фэдизэу зэзыгъафэу, зыгъа­шIоу, псэ къыпызыгъакIэу, орэдыжъхэр къытэнэзыгъэсыжьхэу, ящыIэныгъэ лъызыгъэкIуатэрэм осэ ин фэпшIын фаеу сэлъытэ. Алый псауныгъэ пытэ иIэу, игу­псэхэм адэтхъэжьэу, игухэлъ дахэхэр къыдэхъухэу, илъэпкъ ыгъэдахэу, зипэщэ коллективым итворчествэ хэхъо зэпытэу, игъашIэ кIыхьэ хъунэу сыфэ­лъаIо.

ХьэцIэцIэ Хьалимэт.