Лъэпкъым ыпсэ исурэтых
Тыгъэгъазэм и 17-м щегъэжьагъэу и 24-м нэс КъокIыпIэм щыпсэурэ лъэпкъхэм яисскуствэкIэ Къэралыгъо музеим и Темыр-Кавказ къутамэ иIофышIэхэу Сулейман Фатимэ, Къуекъо Жаннэ, ХъокIо Ларисэ, АКъУ-м искусствэхэмкIэ иинститут идоцентэу Алла Соколовар Тыркуем шIэныгъэ-ушэтын экспедицием щыIагъэх.
Фундаментальнэ ушэтынхэм я Урысые Фонд игрант къырахыгъэу илъэситIум ехъугъэу Урысыемрэ Тыркуемрэ адыгэ сурэтышIэу ащылажьэхэрэм, искусствэм, культурэм гъэхъагъэ ащызышIыгъэхэм ятворчествэ зэфэхьысыжьхэр фашIы. Ахэм афэгъэхьыгъэ электроннэ энциклопедиер IофшIагъэм кIэух фэхъущт.
Проектыр агъэцэкIэфэ адыгэ сурэтышI 70-м ехъумэ ятворчествэ къатхыхьагъ, аушэтыгъ. Мызэгъэгум проектым дэлажьэхэрэр Къайсырэ ыкIи Самсун ащыIагъэх. СурэтышIхэу Осмэн Йылмаз, Эргун Бильги (Бзаджэ), Нэвзат Токъ, Юсыф Сонмез (Вэрэкъо), Зеки Бешто (Быщтэ), Мухьамэд Хьаткъо (Коч) яIофшIагъэхэр аушэты-гъэх.
Къайсырэ адыгэ чылэгъо 60 фэдиз къегъэтIысэкIыгъэу щыт. Ежь къалэм завод, фабрикэ зэфэшъхьафхэр дэтых. Тилъэпкъэгъу хэхэсхэр ахэм ащэлажьэх. Къайсырэ щыпсэурэ тилъэпкъэгъухэм Кавказ Хасэхэм я Конфедерациеу Анкара щызэхэщагъэм фэдэ яI. Зэпыугъом ыуж Хасэм иIофшIэн зэриублэжьыгъэм къыхэкIэу зэхащэгъэ мэфэкIым экспедицием хэтхэр къытефэнхэу хъугъэ. Къайсырэ КАФФЕД-м итхьаматэу Нуршах Озюрек (Iэгъум) гуфэбэныгъэ хэлъэу тиушэтакIохэм къапэгъокIыгъ, IэпэIасэхэу Хасэм къакIохэзэ Iоф зышIэхэрэм нэIуасэ афишIыгъэх.
«Тэ тиIэпэIасэхэм афэдэу, ахэми дышъэидагъэм, шъагъэ-уагъэхэм, шъом, тыжьыным, дышъэм адэлажьэхэрэр яIэх», — къеIуатэ Сулейман Фатимэ.
Къайсырэ къэтыхэфэ тиушэтакIохэр скульпторэу Осмэн Йылмаз (Хьаджэмыкъо) зыIуагъэкIагъ. Ар Къайсырэ университетым идоцент. Чорум 1965-рэ илъэсым къыщыхъугъ. Анкара дэт университетыр къыухыгъ. Истамбыл Мармара университетым магистратурэр къыщиухыжьыгъ.
— Осмэн сурэтышIэ хъунэу янэ-ятэхэр фэягъэхэп ыкIи къыхихыгъэ сэнэхьатым теукIытыхьэщтыгъэх, ары ежь къызэрэтфиIотагъэр, — хегъэунэфыкIы Сулейман Фатимэ. — Ау щытми, Осмэн дэгъу дэдэу еджагъ, ары пакIошъ апшъэрэ еджапIэр къыухи, сэнэхьатым зыхахьэм, икъэгъэлъэгъонхэр Чорум, Анкара, Китай ащыкIуагъэх. ИIэшIагъэмэ анахь къахэщыгъэр Мустафа Кемаль Ататюрк исаугъэтэу ышIыгъэр ары. Къайсырэ университетым ипарк ар дэт.
Джащ фэдэу ушэтакIохэм зигугъу къашIыгъэ сурэтышIхэм ащыщ Эргун Бильги (Бзаджэ). Ащи янэ-ятэхэр фэягъэхэп якIалэ сурэтышIэ хъунэу. ФилологиемкIэ факультетыр къыухи, илъэс пчъагъэрэ тыркубзэмкIэ кIэлэегъаджэу Iоф ышIагъ. Ащ емылъытыгъэу сурэтшIыныр чIидзыгъэп. Адыгэ музыкальнэ Iэмэ-псымэхэр зыIыгъ пшъашъэхэм, къушъхьэхэм, шыхэм ясурэтхэр бэу ышIыгъэх. Аужырэ иIофшIагъэхэр нарт эпосым фэгъэхьыгъэх. Сулейман Фатимэ къызэриIуагъэмкIэ, илъэс зытфыхкIэ узэкIэIэбэжьмэ, Бзаджэ Эргун исурэтхэм якъэгъэлъэгъон Налщык щыкIуагъ. АщкIэ IэпыIэгъу фэхъугъэр ХьашIуцIэ Мухьамэд. Илъэс 50-м ыныбжь нэсыгъэу Эргун Къайсырэ университетым сурэтшIынымкIэ ифакультет щеджэнэу амал иIэ хъугъэ. Иапэрэ къэгъэлъэгъон гъэрекIо тыгъэгъазэм и 25-м Къыркъалэ щыкIуагъ. ИсурэтипшI ащ къыщагъэлъэгъуагъ.
Къуекъо Жаннэ къызэрэтиIуагъэмкIэ, къалэу Самсун ушэтын IофшIэнхэмкIэ зыфагъэзэнэу ау къодыеу къыхахыгъэп. Тарихъ шIэныгъэлэжьхэм зэралъытэрэмкIэ, егъэзыгъэкIэ хэкум икIыжьыгъагъэхэм янахьыбэр къухьэм зыщырагъэкIыжьыгъагъэхэр Самсун еолIэрэ хы ШIуцIэ нэпкъыр арыгъэ. Къайсырэ ыуж ары зыдэкIуагъэхэр.
Тимузей иIофышIэхэр Самсун нэIуасэ зыщыфэхъугъэхэм ащыщ дизайнерэу Быщтэ Зеки. Ащ Коние дэт университетым филологиемкIэ ифакультет къыухыгъ. ИIэпэIэсэныгъэ лъэпкъ лъапсэ иI ыкIи непэрэ мафэм дештэ. 2017-рэ илъэсым Сэралп Мадинэ иIэпыIэгъоу Налщык къэгъэлъэгъон къыщызэIуихыгъагъ. Адыгеими щыIагъ, Еутых Асе ихьэкIагъ. Музыкальнэ Iэмэ-псымэ зэфэшъхьафхэм къарегъаIо, ахэр — пщынэр, Iупэпщынэр, контрабасыр. Зеки хы чIэгъы хъугъэ адыгэ къамэхэм ятеплъэ ежь зэрилъэгъоу, гъэшIэгъонэу ешIых. Къухьэм исхэу зичIыгу зыбгынэщтыгъэ адыгэхэу хы ШIуцIэм иорхэм ахэкIодагъэхэм якъамэхэр хы чIэгъы хъугъэх. Къэмэ Iапшъэр тэкъуагъэу, ежь къамэр улъыигъэу IэпэIасэм къегъэлъагъо, псым лIэшIэгъурэ ныкъорэм ехъугъэу зэрэхэлъыгъэм къыхэкIыкIэ. IэпэIасэм ылъэкъуацIэ темыдзагъэми, зэрэадыгэр иIэшIагъэмэ къахэщын фаеу елъытэ.
Сулейман Фатимэ къызэрэтфиIотагъэмкIэ, къухьэшхом исурэт зышIыгъэр Самсун щыпсэурэ адыгэ сурэтышIэу Хьаткъо Мухьамэд. Хыормэ «ябэнызэ» ащ илъагъо хышхом щыпхырещы. Лъэпкъ тхыпхъэу къухьэм тетым ибагъэ, ахэр къухьэм тебыбыкIыжьыхэрэм фэдэу сурэт зэришIыгъэм, хыорхэм ахэкIодэжьырэ шыухэм яныбжьыкъу шIуцIэу хигъэуцуагъэхэм адыгэ лъэпкъым итарихъ къырыкIуагъэр къыраIотыкIы. Хьаткъо Мухьамэд Коние пэблагъэу щыт къалэу Караман 1953-рэ илъэсым къыщыхъугъ. БэмышIэу сурэтшIынымкIэ апшъэрэ гъэсэныгъэр зэригъэгъотыжьыгъ. Ау ыгу фэщагъэу искусствэм зыфэлажьэрэр бэшIагъэ. ИсурэтхэмкIэ Самсун и Хасэ зычIэт унэр гъэдэхагъэ. Иунэу тимузей иIофышIэхэр зэригъэблэгъагъэхэм сурэт мин фэдиз ралъэгъуагъ. Ахэр дэпкъхэм апылъагъэх, мэкIайхэм атетых. «Мухьамэд итворчествэ тынэгу къыкIэуцуагъ!» — къаIуагъ ушэтакIохэм. Тырку усакIохэм, тхакIохэм ятхылъхэм апае Хьаткъо Мухьамэд сурэтхэр ышIэу бэрэ къыхэкIыгъ. Ежь исурэтхэм анахьэу къахэщырэр шыхэр ары.
Экспедицием хэлэжьагъэхэм къахьыжьыгъэ материалхэр зэхафыжьынхэ, зэфахьысыжьынхэ, электроннэ шапхъэм ралъхьажьынхэ фае. Мы илъэсым Урысыем ыкIи Адыгеим ясурэтышIхэм яэнциклопедие хьазыр хъущт.
Тэу Замир.