Хэгъэгум гандболымкIэ изэнэкъокъоу суперлигэм щыкIо­рэм Мыекъопэ бзылъфыгъэ командэу «АГУ-Адыифыр» хэлажьэ.

2022 — 2023-рэ илъэс ешIэгъум гандбол клубхэм очко пчъагъэу рагъэ­къугъэм, чIыпIэу зыдэщытхэм шъуащы­тэгъэгъуазэ.

ЧIыпIэхэр

1. ЦСКА Москва — 40 2. «Ростов-Дон» Ростов-на-Дону — 32 3. «Астраханочка» Астрахань — 29 4. «Лада» Тольятти — 28 5. «Звезда» Звенигород — 24 6. «Кубань» Краснодар — 19 7. «Динамо» Волгоград — 19 8. «Ставрополье» Ставрополь — 16 9. «Университет» Ижевск — 14 10. «Феникс» Китай 11. «АГУ-Адыиф» Мыекъуапэ — 5 12. «Луч» Москва — 4 13. «Балтийская заря» С.-Петербург-2.

Мыекъопэ «АГУ-Адыифым» суперлигэм гъогогъуи 2 ящэнэрэ чIыпIэр къыщыдихыгъ, Европэм и Кубок икъыдэхын хэлэжьагъ. Мыекъуапэ щагъэсэгъэ пшъашъэхэр Урысыем ихэшыпыкIыгъэ командэ хэтхэу Олимпиадэ джэгунхэм, дунэе зэнэкъокъухэм апэрэ чIыпIэхэр къащахьыгъэх.

Виктория Калининам, Анна Кареевам, Анна Игнатченкэм, Инна Суслинам, Яна Усковам медальхэр къафагъэшъошагъэх, дунаим цIэрыIо щыхъугъэх. Адыгеим бзылъфыгъэ гандбол командэ щызэхэщэгъэным Джэнчэтэ СултIан кIэщакIо фэхъугъ. Ащ ыгъэсэгъэ пшъашъэхэр республикэм испорт нахь лъагэу къэIэтыгъэным, къэралыгъо гъэпсыкIэ иIэу Адыгеир зыпсэурэр илъэси 100 зэрэ­хъугъэм чанэу хэлэжьагъэх.

Урысыем, Адыгеим язаслуженнэ тре­нерэу Джэнчэтэ СултIан игъонэмысэу идунай ыхъожьыгъ. Спортым, Адыгеим ыгу къафытеозэ гъашIэр къыхьыгъ. Ащ ригъэжьэгъэ Iофыр Адыгеим и ЛIышъхьэу КъумпIыл Мурат, Правительствэм, Парламентым, гандбол клубэу «Адыифым» щыIэныгъэм щылъагъэкIуатэ.

Джырэ уахътэ «АГУ-Адыифыр» супер­лигэм щыкIорэ зэнэкъокъум гъэхъагъэу щишIырэр макIэ, арэу щытми, иешIакIэ зэрэхигъэхъощтым щэч хэлъэп. Людмила Баскаковар, регина Якуповар, Ангелина Куцеваловар, Алиса Дворцеваяр, Юлия Кожубековар, Диана Казихановар, Анна Красновар, Елизавета Краснокутскаяр, нэмыкIхэри «Адыифым» щешIэх, яIэпэIэсэныгъэ хагъахъо.

«Адыиф-2-м» иешIэкIо ныбжьыкIэхэм япащ тренерэу Яна Усковар. ЯтIонэрэ командэм къыхэкIыгъэхэ Дарина Никулинар, Къэбж Заремэ, Сельма Добар­джич, Софья Морозовар, фэшъхьафхэри суперлигэм хэт командэм аштагъэх.

Гандболым адыгэ пшъашъэхэр фигъа­сэхэ шIоигъуагъ Джэнчэтэ СултIан. Крас­нодар краим ихэшыпыкIыгъэ коман­дэ щешIэщтыгъ къэлэпчъэIутэу ЛIыбзыу Сусанэ. Джырэ уахътэ Джэнчэтэ СултIан ыцIэ зыхьырэ спорт еджапIэм ЛIыбзыу Сусанэ ипащ.

Кобл Зурет шъобжэу къытыращагъэр егъэхъужьы, зэнэкъокъухэм ахэлэжьэнэу тежэ. Къэбж Заремэ къэлапчъэм Iэ­гуаор анахьыбэрэ дэзыдзэрэмэ ащыщ. Нахь ныбжьыкIаIохэу Дэргушъао Даринэ, Дыды Эвелинэ, Бзэджэжъыкъо Заринэ, нэмыкI­хэм гандболым яшъыпкъэу зыфагъасэ. Пшъэшъэ сэнаущхэм спортышхом зыкъы­щызэIуахынэу, цIэрыIо хъунхэу афэтэIо.

— Адыгеим игандбол лъэпсэшIу ­ышIыгъ, — къытиIуагъ «Адыифым» итренер шъхьаIэу, Урысыем изаслу­жен­нэ тренерэу Александр Реввэ. — Джэнчэтэ СултIан Iоф дэзышIагъэхэм сащыщ, гъашIэм щысэшIу къыщытфэ­хъугъ… «Адыифым» иешIакIэ зэрэхигъэ­хъощтым тыпылъ, шIыкIэшIухэм талъэхъу. .