Адыгэ Республикэм и Къэралыгъо академи­ческэ лъэпкъ къэшъокIо ансамблэу «Налмэ­сым» ипчыхьэзэхахьэу «БлэкIыгъэр джырэ лъэ­хъаным» зыфиIорэр Мыекъуапэ щыкIуагъ.

«Налмэсым» иконцертхэр къызыщитырэ унэм тIысыпIэ нэкI иIэжьыгъэп. Лъэпкъ ис­кусствэр зышIогъэшIэгъонхэм урысхэр бэ хъухэу, къэндзалхэр, тирайонхэм, Краснодар краим, нэмыкIхэм къарыкIыгъэхэр щытлъэгъугъэх.

— Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм, Урысыем ис лъэпкъ­хэм яискусствэрэ якультурнэ кIэнрэ я Илъэс афэгъэ­хьыгъэ концертхэр мыгъэ Моск­ва гъогогъуищэ, Монголием, Киргизием, Белоруссием, Урысыем игупчэ шъолъырхэм, Къы­блэм, Темыр Кавказым къащыттыгъэх. Адыгеим икъуа­джэхэм тащыIагъ, — къыти­Iуагъ «Налмэсым» ихудожест­веннэ пащэу, Урысыем, Абхъазым, Пшызэ язаслуженнэ артистэу, Адыгеим инароднэ артистэу Хъоджэе Аслъан.

«Налмэсым» концерт программэ зэфэшъхьафи 6 иI. Тыдэ кIуагъэми искусствэ лъагэм диштэрэ лъэпкъ къашъохэр къе­гъэлъагъох, адыгэ музыкэр егъэжъынчы.

«ШIуфэс къашъу», «Тыргъэтау», «ЗэфакIу», нэмыкIхэри «Налмэсым» къышIыгъэх. Теат­рализованнэ едзыгъом щыщэу псым ыпашъхьэ щыс пшъашъэ­хэм яIэдэб, ядэхагъэ гур зыфащэ. Сэе фыжьхэр ащыгъэу псым икъэргъуагъэ агъэшIагъоу къыпщэхъу, пшъашъэхэм ягу­пшысэ шъэфхэри къызэфаIуатэх, къашъом хелъасэх.

«Тыргъэтаом» адыгэ бзылъфыгъэм иобраз, Iашэр къыштэныр къызыхэкIыгъэр, фэшъхьаф­хэри хэолъагъох, лъэпкъ къа­шъоу ныбжьыкIэхэм къашIырэм шэн-хабзэхэм нахь куоу уахещэ.

«ШIуфэс къашъор» гъашIэм, адыгэ хабзэм къапкъырэкIы. Лъэпкъ къашъохэр гум къы­лъэ­Iэсых. Адыгэ шъуашэм идэхагъэ пчэгум щызезыхьэрэ ар­тистхэм уагъэгушхо. Адыгэ Iанэм ибаиныгъэ, щыгъу-пIастэр хьакIэм зэрэпагъохырэм, фэшъхьафхэм лъэпкъым итарихъ, тызыхэт лъэ­хъаныр къаIуатэ. ЛIэужхэр зэзыпхырэ культурэм цIыфыр зэрипIурэр къыхэогъэщы. Урысыемрэ Адыгеимрэ якъэралыгъо быракъхэр къашъом хэгъэщагъэхэу пчыхьэзэхахьэм щыбыбэтагъэх.

IофшIэгъэ дэгъухэр иIэу «Нал­мэсыр» 2023-рэ илъэсым пэ­гъокIыгъ. Ти ЛIышъхьэу КъумпIыл Мурат, Правительствэм, Парла­ментым, искусствэр зы­шIо­гъэ­шIэгъонхэу къылъыплъэ­хэрэм афэраз.

Тыгъэр тшъхьащытэу чIыр къекIокIыфэ «Налмэс-налкъу­тэр» дунаим тетыщт. Опсэу, тилъапIэу «Налмэсыр»!

ЕмтIылъ Нурбый.