ИлъэсыкIэ мэфэкIыр хэбзэ гъэнэфагъэкIэ хигъэунэфыкIэу унагъоу щыIэр бэ. Ащ итамыгъэ шъхьаIэу елкэр шъхьадж зэрэфаеу егъэкIэра­кIэ, зым джэгуалъэхэр пелъхьэх, адрэм IэшIу-IушIухэмкIэ егъэдахэ. ТIо­псэ районым ит къуаджэу Гъуакъо дэс Коблхэм яилъэсыкIэ мэфэкI чъыг фэдэ зыпарэми зэримыIэр нафэ.

Советскэ Союзым и ЛIыхъужъэу Тхьагъушъэ Исмахьилэ ыцIэ зыхьырэ къоджэ еджапIэм къызэрэщытфаIотагъэмкIэ, дзюдомкIэ чемпионхэу, Урысыем изаслуженнэ тренерэу С. Поповым ыгъасэхэрэ Кобл зэшыпхъухэу Фатимэрэ Русетэрэ спорт зэнэкъокъухэм къащахьыгъэ медальхэмкIэ, тын зэфэшъхьафхэмкIэ ар гъэкIэрэкIэгъагъэ.

Джыри мыгъэ зэшыпхъухэм елкэм палъхьащтхэм медалыкIэхэр къа­хагъэхъуагъ. ГущыIэм пае, ­илъэс 13 зыныбжь Фатимэ дзюдомкIэ зэ­нэкъокъоу ЦIэмэз къэзыухъумэгъэ лIыхъужъхэм яшIэжь фэгъэхьыгъагъэм, шъолъыр проектэу «Школьная лига самбо» зыцIэм къыщыдэлъы­тэгъэгъэ зэнэкъокъум, «Осенние старты» зыфиIорэм текIоныгъэр къа­щыдихыгъ, къалэхэу Ермэлхьаблэ, ЦIэмэз, Краснодар, Анапэ, Шъачэ ащыкIогъэ зэнэкъокъухэм джэрз медальхэр къащихьыгъэх. Илъэс 16 зыныбжь Русетэ Пшызэ шъолъыр икIэлэеджакIохэр зыхэлэ­жьэгъэхэ я XI-рэ Спартакиадэм, дзюдомкIэ зэнэкъокъоу Ермэлхьаблэ щызэхащэгъагъэм ящэнэрэ чIы­пIэхэр ащиубытыгъэх.

Унагъом спортымкIэ гъэхъагъэу иIэхэм иIахь ахилъхьанэу зегъэхьазыры Кобл зэшыпхъухэм анахьыкIэу, илъэси 3 зыныбжь Даринэ. Ар джыри къэхъугъагъэп янэ-ятэхэм кимоно зыфарагъэдым. Енэгуягъо Кобл зэшъхьэгъусэхэу Руслъанрэ Маринэрэ джыри зы елкэ агъэ­хьазырынэу хъункIэ, жъым чIыпIэ нэкI иIэжьэп.

НЫБЭ Анзор.