Мыекъуапэ сам­бэмкIэ, дзюдомкIэ ибэ­нэпIэ еджапIэ лъапсэ фэзы­шIыгъэу, СССР-м иза­служеннэ тренерэу Кобл Якъубэ имузееу Адыгэ къэралыгъо уни­верситетым физ­куль­турэмрэ дзюдомрэкIэ и Институт чIэтым зэ­­хэхьэ гъэшIэгъон щы­кIуагъ.

Адыгэ Республикэм изаслуженнэ тренерхэу Бастэ Сэлым, Нэпсэу Бислъан, пшъашъэхэм ятренерэу Мерэм Саидэ агъэсэрэ кIэлэцIыкIухэу илъэси 7 — 8 зыныбжьхэр Кобл Якъубэ ыцIэ зыхьырэ музеим къэкIуа­гъэх. Нэрылъэгъу IэпыIэгъухэм, сурэт­хэм ашIогъэшIэгъонэу яплъы­гъэх.

СССР-м изаслуженнэ тренерэу, я XX-рэ лIэшIэгъум Урысыем дзюдомкIэ итренер анахь дэгъоу Кобл Якъубэ къызыхъугъэ мафэм фэгъэхьыгъэ зэхахьэм къыщыгущыIагъ Адыгэ къэралыгъо университетым физкультурэмрэ дзюдомрэкIэ и Институт ипащэу Ахътэо Руслъан.

Шапсыгъэ къуаджэу ШIоикъо щапIугъэ Кобл Якъубэ физкультурэмрэ дзюдомрэкIэ Институтыр къызэIухыгъэным кIэщакIо фэ­хъугъ.

СамбэмкIэ спортым имастер 55-рэ, дзюдомкIэ — 66-рэ, спортымкIэ дунэе класс зиIэ мастер 15, дзюдомкIэ, самбэмкIэ 10, СССР-м спортымкIэ изаслуженнэ мастери 5 Я. Коблым ыгъэсагъэх. ШIэныгъэлэжь хъущтхэм IэпыIэгъу афэхъугъ.

Олимпиадэ джэгунхэм дышъэ медалыр къащызыхьыгъэ Вла­димир Невзоровыр, Олимпиадэ джэгунхэм дзюдомкIэ ящэнэрэ чIыпIэр къащыдэзыхыгъэ Емыж Арамбый, дунаим дзюдомкIэ ичем­пионэу Лъэцэр Хьазрэт, фэшъхьафхэу бэнэпIэ алырэгъум Кобл Якъубэ щигъэсагъэхэм Адыгеим ищытхъу дунаим лъагэу щаIэтыгъ.

Музеим къыщагъэлъэгъорэ сурэтхэу спортсменхэм, тренер­хэм, Кобл Якъубэ ищыIэныгъэ афэгъэхьыгъэхэм Бастэ Сэлымэ, Мерэм Саидэ, Нэпсэу Бислъан къатегущыIагъэх, дзюдом фагъэсэрэ кIэлэцIыкIухэм яупчIэхэм джэуапхэр аратыжьыгъэх.

КIэлэегъэджэ шIэныгъэхэмкIэ докторэу, профессорэу Кобл Якъубэ общественнэ Iофхэм чанэу ахэлажьэщтыгъ. ИшIушIагъэкIэ, гукIэгъоу хэлъыгъэмкIэ зэрагъэлъапIэрэр кIэлэегъаджэ­хэм, тренерхэм музеим къыщаIотагъэр кIэлэцIыкIухэм ащыгъу­пшэжьыщтэп.