Мамырныгъэм инэпэеплъэу
Щынэ зымышIэрэ Лащын, нарт лIыхъужъэу Саусэрыкъо, синдхэм япачъыхьэу Гекатей, ащ ишъхьэгъусэу Тыргъэтао, бзылъфыгъэ-дзэкIолIэу, пачъыхьэ гуащэу Риневус яшъуашэхэр зэлъашIэрэ IэпэIасэу СтIашъу Юрэ иколлекцие хэтых. Мыхэм непэ ягугъу къэтшIынэу зыкIэхъурэр дзэкIолI шъуашэхэшъ ары.
ЛIыгъэрэ псэемыблэжьныгъэрэ къахэщы, зыщызылъэрэр орэхъулъфыгъ, орэбзылъфыгъ ищыIэныгъэ шъыпкъагъэм, зэфэныгъэм, мамырныгъэр къэухъумэгъэным апэIуигъэхьанэу хьазыр. Ары мыхэм тарихъэу апылъри.
СурэтышI пэпчъ ежь зыщыщ лъэпкъым ыпашъхьэ пшъэдэкIыжь ин щехьы. СтIашъу Юрэ ар ыгукIи, ыпсэкIи зэхишIэзэ итворческэ лъагъо рыкIуагъ. Ащ иIэшIагъэхэм осэ ин къафашIыгъ Д. Лихачевым ыцIэ зыхьырэ институтэу лъэпкъ кIэным дэлажьэрэм иIофышIэхэм. IэпэIасэм къыфатхыгъэ рэзэныгъэ тхылъым мыщ фэдэу къыщеIо: «Узщыщ лъэпкъым, къэралыгъом, зэрэдунаеуи тштагъэми, шIулъэгъуныгъэ зэрафыуиIэм уиIэшIагъэхэр яшыхьат. Уишъуашэхэм гупшысэ къабзэр ахэлъ. Лъэпкъ шэн-хабзэр ахэолъэгъукIы. Кавказыр, адыгэ ыкIи нэмыкI цIыф лъэпкъыбэу тикъэралыгъо щыпсэухэрэр къыпфэрэзэнхэ фае уиIэшIагъэхэмкIэ лъэпкъ зэхашIэр зэрэбгъэбаирэм, дунаим дэхагъэр, мамырныгъэр, зэгурыIоныгъэр зэрапхырыпщырэм апае».
IэпэIасэм лъэпкъ культурэм иобразхэмрэ исюжетхэмрэ итворчествэ бэу щегъэфедэх. ИшъуашэхэмкIэ дунаим тет цIыфхэм адэгущыIэ. Юрэ анахьэу мэхьанэ зэритырэр ахэм ятеплъэ изакъоп. ЦIыф лъэпкъым итарихъ зэщызыгъэкъорэ кIочIэ бзаджэм зэрэфырикъущтым ицыхьэ телъэу ащ пэуцунэу щыIэ амалхэр иIэшIагъэхэмкIэ къегъэлъагъох. Адыгэ лъэпкъ шъуашэу ышIыхэрэм зэкIэми лъэпкъым къырыкIогъэ гъогур ахэолъэгъукIы. Философие гупшысэ куу ахэлъ. Лъэхъанымрэ лIэужхэмрэ зэрепхых, ахэр зэрэзэдэлажьэхэрэр, гущыIэгъу зэрэзэфэхъухэрэр къегъэлъагъо, шъхьафитхэу, щынэр амышIэу непэрэ дунаим хегъахьэх, лъэбэкъу пытэхэр арегъэдзых.
СтIашъу Юрэ ищыIэныгъэкIи итворчествэкIи къызфаджэрэр зы — лъэпкъхэм культурнэ зэфэшъошэ еплъыкIэхэр зэфыряIэныр, ялъэпкъ кIэн къаухъумэныр, мамырзехьэ хъунхэр ары. Лъэпкъ пэпчъ зыми хэмыкIокIэрэ нэшэнэ гъэнэфагъэу хэлъхэр къызэтырагъэнэжьынхэу дунаим тет цIыф пстэуми ар къяджэ.
Юрэ итворчествэ нэIуасэ фэхъухэрэм гуетыныгъэ къахелъхьэ, щыIэныгъэм дэхагъэу хэлъыр нахь зэхарегъашIэ. Ащ иIофшIагъэхэм дунэе, къэралыгъо ыкIи шъолъыр къэгъэлъэгъуапIэхэр къагъэкIэрэкIагъ. Модельер IэпэIасэм ишъуашэхэм къэралыгъо зэфэшъхьафыбэм ягъунапкъэхэр зэпачыгъэх. Мыекъуапэ дэт музеим чIэт къэгъэлъэгъонэу Юрэ иIэшIагъэхэр зыхахьэрэр сыдигъокIи зэIухыгъ.
«Джырэблагъэ дзэм къулыкъу щызыхьынэу щыт кIэлакIэхэр, нэбгырэ 20 фэдиз хъухэу, Краснодар къыращыхи музеим къащэгъагъэх. Сигуапэу ахэм сиIэшIагъэхэр язгъэлъэгъугъ. ДзэкIолI шъуашэу коллекцием хэтхэм сынаIэ атезгъэтыгъ, ясщэлIагъэх. КIэухым «ТекIоныгъэм исаугъэт» зыфиIорэ адыгъэ шъошэ плъыжьэу бзыу тамэхэр зыпытыр язгъэлъэгъугъ. Имэхьанэ анэзгъэсыгъ. ТыдэкIи щыIэ заохэр уцужьынхэшъ, мамыр щыIакIэр дунаим тетыныр ситворчествэ сатырэ плъыжьэу зэрэпхырысщырэр къафэсIотагъ. Пачъыхьэ гуащэу Риневус идзэкIолI шъуашэ мэхьэнэ шъыпкъэу иIэм аужырэ хьарыфкIэ къебгъэжьэнышъ, укъызэкIакIозэ укъеджэщт. Ар — «Сувенир»! Джары дзэкIолI шъуашэр дунаим зэрэтетынэу щытыр, сувенир къодыеу ары!» — къеIуатэ СтIашъу Юрэ. IэпэIасэм ифилософие дзэкIолI шъуашэм къыпкъырэкIышъ, зэрэдунаеу мамырныгъэм фещэ! «ИлъэсыкIэу къихьащтым тыдрэ чIыпIи щымамырынэу Тхьэм телъэIу, ащ фэдэу хъуным сыщэгугъы!» — еIо Юрэ. Ащ итхьэлъэIу тэри детэгъаштэ.
Тэу Замир.