Къорэлъфыр джыри зэрэсабыир мыгъуащэу упчIэ зэпымыужь:

— Нан, сыдигъуа сыкъызы­хъугъэр, ошIа? — ишъыпкъэ тIэкIу Iушыжъыем.

— СэшIэ адэ, боу къыосIон, сиIубыжъый, — ыпсэ дигъэшIорэ сабыим щыгушIукIэу еIо янэжъ. — КIымэфэ жэкIэфыр къэсынкIэ мэфитIу иIэу ары, дунаир тидунаеу тыгушIогъагъ.

Асхьад цIыкIум IэхъомбитIур чIеутIуанкIэ, къыIушIыкIырэр мыухыжь:

— ТIур марыба? — къэупчIэ ыIэпэ цIыкIухэр къыгъэлъа­гъохэзэ.

— Ары, силал, — еIо джыри инанэ.

— Нан, жэкIэфыр сыда адэ? — гурымыIуагъэр зэхифы, зэригъашIэ шIоигъу.

— ЖэкIэфыр ос фыжьыбзэр арыба, сурэт… — къыIощтыр нанэм къыримыгъэухэу кIэлэ­хъур къэпсынкIэ.

— СэшIэ, сэшIэ, — къэгузажъо, — къэсшIэжьыгъ ащ ыцIэр — Новый год! — ежь­-ежьырэу къыIуагъэмкIэ зыфэ­рэзэжьэу, диван шъабэм гуапэу зыхедзэ.

— Осы, осы, осы! — ыIозэ, джы орэдышхо къеIо.

Нанэри сабый дахэм щэгу­шхукIы.

— Новый годым ыцIэр Илъэ­сыкI, хъупхъэ дэд, — гурегъаIо. — ИлъэсыкIэр пчъэIум къызщыIухьэрэ шъыпкъэм укъэхъугъ. Елкэ чъыг бырэбэ шхъонтIабзэхэр тыдэкIи щагъэкIэракIэх, ори уятэрэ уянэрэ пчыхьашъхьэ къызэрэсыжьхэу елкэшхор пфагъэдэхэщт, джэголъэ шIэтхэр ори адыпыплъэщтых (шъэожъые такъырым гушIом ынэхэр къы­хэщыжьыхэрэп), уиныбджэгъу цIыкIухэри къэтщэнхэшъ, тыпсаумэ, о уиIуагъэу, уидень рожден, бгъэмэфэкIыщт. IэшIоу, Iэ­шIоу сышъуфэпщэрыхьан, си­кIэлэхъужъ дах! Тхьачэт кIэпцышхор къыожэба о.

Сабый гъэшIуагъэр тхьа­гъэпцI цIыкIоу янэжъ къеупчIы:

— Нан, шоколади сфэпшIыщта?

— Еплъ мы шъхьахъумытIэ цIыкIур зэрэбэджэжъыем, шоколадхэр уимэмэ цIыкIу зэ­щымыщыбэу къыпфихьыщтых, Iэе дэд.

— Сипапи сидень рожденкIэ шоколадхэр къысфихьыщтха? — ыIозэ, ышхыгъахэм фэдэу ыIупс едырыжьы.

— Сыда, Асхьад, шоколад тучан къызэIупхыщта? — еIошъ нэнэжъыр есэмэркъэоу мэщхы, ащ иджэнакIэ зырищэкIыгъэу шъэожъыери зэтеутэу мэщхы. — Уипапи Iаджи къыпфихьыщт, ау анахь гъэшIэгъоныр къыпфэзыхьыщтыр ЛIыжъ Щтыргъу­кIыр ары.

— Хэт пIуагъа? — шъэожъые джэгулэр «ЛIыжъ ЩтыргъукI» ыIозэ, тхъэжьэу дэпкIае, къепкIэхы.

— ЛIыжъ ЩтыргъукIыр хэта, нан, къысаIу? — иупчIэн зэпигъэурэп Асхьад.

— ЛIыжъ ЩтыргъукIыр Илъэ­сыкIэ мэфэкIышхом изещакIу, ихэгърэй, ипщ; ащ иIалъмэкъ джадэ шIухьафтыныбэ илъ, зэкIэ кIэлэцIыкIухэм апай, ишъуашэ кIэракI, ыжакIэ кIыхьэ, ышъхьаци, ынапци фыжьыбзэх, цIыфышIу, кIэлэцIыкIухэр зэкIэ лъэшэу икIасэх, арышъ, къэкIонышъ, къышъотэщт, къыжъудэгощэщт! — еIо янэжъ.

— Хьау, нан, пшIэрэп, — къэгузэжъуагъ ыкIи къыIуагъэм къезэгъырэп шъэожъыер. — ЛIыжъ ЩтыргъукIыр Щэбан ары. — КIэлэцIыкIу IыгъыпIэм Iут шофер кIэлэ шъонтIэушхом ыцIэ къыреIо.

— Мыщ ыIорэр?! — егъэшIагъо нэнэжъым.

— ОшIа, нан, — ишъыпкъэ тIэкIу джы къорэлъф цIыкIум, ащи егъэдаIо инанэ. — Щэбанэ пальто плъыжьышхуи, паIуи, бэщышхуи, зэкIэ, зэкIэ къы­фащэфыгъэх. Ахэр зыщилъэнхэшъ, Iалъмэкъышхор шIохэ­лъагъэу елкэр къытигъэкIухьэмэ, орэд къыддиIозэ, шIухьафтынхэр къытфигощыщтых.

— А синанэ гущ, а зэкIэ о тыдэ щыпшIэра? — зэхихыгъэр нанэм егъэшIагъо.

— Нан, пшIэрэба, Щэбанэ папэ идруги, къысфиIотагъ!

— Ащ ышIагъэр, ащ ышIа­гъэр! — нанэр пэгубжыкIы. — КIэлэ бетэмал, ащ фэдэр аIуата?! Сыда джы мэфэкIым гъэшIэ­гъонэу хэлъыжьыщтыр? МыдыкIэ Асхьад дунаир фи­къужьырэп:

— Нан, джы ори къэпшIагъэ­ба ЛIыжъ ЩтыргъукIыр? Щэбанэ — ЛIыжъ ЩтыргъукI, Щэбанэ — ЛIыжъ ЩтыргъукI! — ыIозэ унэр шъэожъыем къыречъы­хьэкIы, ичэф мэкъэ лъэш унэр зэтыречы.

Сабый нэфыпсым зэфэдэкIэ дунаим зыхегуащэ, жъи кIи, цIыкIуи ини зыпэплъэрэ ИлъэсыкIэри гуапэу типчъэIумэ къа­Iохьэ.

Мамырыкъо Нуриет.