Культурэм и Унэу Улапэ дэтым илъэсищ хъугъэу «Сыбзэ — сибаи­ныгъ!» зыфиIорэ зэнэкъокъур щызэхащэ.

Проектыр зигукъэкIыр культурэм и Унэ ипащэу Мэрщэнэ Сусан. Адыга­бзэкIэ усэ къеджэнымкIэ зыщызэнэкъокъухэрэ мэфэкIыр кIэлэеджакIохэм гуIэтыпIэ афэхъу.

«Дышъэ тандж» ыцIэу Тэхъутэмыкъое районым щызэхащэрэ зэнэкъокъум зэ тыхэлэжьэнэу хъугъэ, — къеIуатэ Сусанэ. —Ар зытэлъэгъум, «нэмыкI рай­он тыкIозэ усэ тыкъе­джэн нахьи, тэри ащ фэдэ зэнэкъокъу кIэлэцIыкIухэм апае зэхэтщэшъунба» тIуи, ыуж тихьагъ. Район администрацием культурэмкIэ и ГъэIорышIапIэ къыддыригъэштагъ. 2019-рэ илъэ­сым къыщегъэжьагъэу ар ретэгъэкIокIы. КIэлэцIыкIу­хэр ныдэлъфыбзэм нахь фэщэгъэнхэм, культурэм, бзэм арыгушхонхэм тегъэ­псыхьагъэу зэнэкъокъур афызэхэтэщэ, илъэсиблым къыщыублагъэу хэлажьэ зышIоигъохэр зэкIэ етэ­гъэблагъэх. Уракъэ Алый фэдэу ежь-ежьырэу усэхэр зытхыхэрэри къа­хэкIых».

Сусанэ къызэриIуагъэм­кIэ, апэрэ зэхэщэгъум зэ­нэкъокъум кIэлэеджэкIо 42-рэ хэлэжьэгъагъ. 2020-рэ илъэсым, пандемием иуахътэ, зэнэкъокъур он­лайн шIыкIэм тетэу кIуагъэ. Ащ емылъытыгъэуи кIэ­лэеджэкIо нэбгырэ 30-м ехъу ащи хэлэжьагъ.

Илъэс къэс зэнэкъо­къум нахь зеушъомбгъу, усэ къеджэным орэд къэ­Iонри къыхэхъуагъ. Зэнэ­къокъур едзыгъуиплIэу гощыгъэ. Ныбжьым елъытыгъэу зэнэкъокъурэ сабыйхэр куп-купэу агощых. Мыгъэрэ Iофтхьабзэр къызэIузыхыгъэр Цышэ Ренат, ащ илъэсих ыныбжь. Зэнэкъокъугъэ купхэм ыныбжьыкIэ кIэлэцIыкIур ахэмыфагъэми, мэфэкIыр дахэу къызэIуи­хыгъ. Адыгеим къэралыгъо гъэпсыкIэ зиIэр илъэ­си 100 зэрэхъугъэм фигъэшъуашэу тиреспубликэ фэгъэхьыгъэ усэм езбырэу къеджагъ.

Зэнэкъокъум фашIыгъэ зэфэхьысыжьхэмкIэ, илъэсиблым къыщыублагъэу илъэсипшIым нэс зы­ныбжьхэр зыхэт купымкIэ хэушъхьафыкIыгъэ чIыпIэхэр къэзыхьыгъэхэр Хъунэ Ясин, Бахъукъо Тамерлан ыкIи Нэхъушъ Эллана.

Орэд къэIонымкIэ къахагъэщыгъэхэр Дэгужъые Сабир, Брыцу Ролан, Пар­цекян Анна.

Илъэс пшIыкIузым къы­щыублагъэу илъэс пшIыкIущым нэс зыныбжьхэмкIэ текIоныгъэр зыфагъэшъошагъэхэр Кэсэе Даян, Хъоткъо Даян, Бысыдж Самир.

Зэнэкъокъум еплъыгъэ­хэм яшIухьафтын хэу­шъхьафыкIыгъэхэр фагъэ­шъошагъэх Къушъхьэ Азидэ, Тухтэрэ Нэфсэт ыкIи Дэхъужь Ислъам.

«Красногвардейскэ районым культурэмкIэ и Гъэ­IорышIапIэ кIэлэцIыкIоу зэнэкъокъум хэла­жьэхэрэм сыдигъокIи шIу­хьафтынхэр къаретых, — игуапэу хегъэунэфыкIы Мэрщэнэ Сусанэ, — но­утбукхэр, планшетхэр, смарт­-сыхьатхэр, пауэрбанкхэр — непэрэ дунаим сабыйхэм якIэсэ Iэмэ-псымэ закIэх, ахэм IэшIу-IушIухэри ягъусэжьых. ХэушъхьафыкIыгъэ шIу­хьафтынхэу адыгэ тха­кIо­хэм, усакIохэм ятхылъхэр аратых».

А зэпстэур сабыйхэм агу къенэжьы, еджэным нахь кIегъэгушIух, ныдэлъ­фыбзэм фэщагъэ шIыгъэн­хэмкIэ мыщ фэдэ Iофтхьабзэхэм яшIогъэшхо къэкIо.

Тэу Замир.