Бзылъфыгъэр ицуакъэ къегъэдахэ
Адыгэ бзылъфыгъэм илъэпкъ шъуашэ къэзыгъэдахэрэмэ пхъэцуакъэр ащыщ.
Республикэм и Лъэпкъ музей къыщызэIуахыгъэ къэгъэлъэгъоным адыгэ саем итарихъ ущегъэгъуазэ. ШIэныгъэлэжьэу Едыдж Батырай къыугъоигъэ сурэтхэр гурыIогъошIух. Пэсэрэ лъэхъаным адыгэмэ пхъэцуакъэр агъэлъапIэщтыгъ.
— Ижъырэ лъэхъаным пхъэцуакъэр адыгэмэ ашIы зыхъукIэ пхъэпсыр, ощыр, нэмыкIхэри зэрагъэфедэщтыгъэхэр цIыфмэ зэрагъашIэ ашIоигъоу лъэпкъ IэпэIасэхэм къяупчIых, — къытиIуагъ АР-м и Лъэпкъ музей иIофышIэу Сихьаджэкъо Иринэ. — Пхъэцуакъэхэр адыгэхэм ятарихъ шIукIэ къыхэнагъэх. Лъэпкъ искусствэм игъэкIотыгъэу щагъэфедэх.
Адыгеим иансамблэхэу «Налмэсым», «Ислъамыем», «Ошъутенэм», нэмыкIхэм яконцертхэм къыщышъохэрэ бзылъфыгъэхэм ижъырэ лъэпкъ цуакъэхэр ащыгъых. Къашъоу «Лъэпэтетыр» къызэрашIырэм уеплъызэ, тарихъым инэкIубгъохэм куоу уахэхьэ.
Урысыем и Къэралыгъо академическэ лъэпкъ къэшъокIо ансамблэу Игорь Моисеевым ыцIэ зыхьырэм ипащэхэр къелъэIухи, Урысыем, Абхъазым, Пшызэ язаслуженнэ артистэу, Адыгеим инароднэ артистэу Хъоджэе Аслъан къашъоу «Лъэпэтетыр» ыгъэуцугъ. Ансамблэ цIэрыIом иконцертхэм «Лъэпэтетыр» къащешIы.
ЛIэужхэр зэзыпхыхэрэ IэшIагъэхэм лъэпкъ искусствэр, шэн-хабзэхэр къаIуатэх. А. Урысым, В. Мастафовым, Л. Гумэм, фэшъхьаф IэпэIасэхэм яIофшIагъэхэр гъэшIэгъоных. Пхъэм, гъучIым, тыжьыным ахашIыкIыгъэ лъэпэтетхэр тызхэт лъэхъаным дештэх.
НахьыпэкIэ пхъэцуакъэр нысащэхэм, зэхэхьэ хэхыгъэхэм ахэлэжьэрэ бзылъфыгъэхэм щыгъыным къекIоу зыщалъэщтыгъ. Сатыум пылъ къырым къэндзалхэм, адыгэхэм, нэмыкI лъэпкъхэм къызэрякIурэм тетэу пхъэцуакъэр ящыIакIэ хэщагъэ хъугъагъэ. Илъэсхэр псынкIэу лъэкIуатэх, пхъэцуакъэм итеплъэ зэхъокIыныгъэхэр фэхъух.
ЕмтIылъ Нурбый.