Тамэ ареты, къытлъэIэсы
Лъэпкъ хъызмэтхэмрэ IэшIагъэхэмрэ Iоф адэзышIэрэ Нэгъуцу Аслъан Адыгэ Республикэм культурэмкIэ и Министерствэ исурэт къэгъэлъэгъуапIэ зэIукIэгъу гъэшIэгъон щыриIагъ.
Сурэт къэгъэлъэгъуапIэм ипащэу, Адыгэ Республикэм инароднэ сурэтышIэу Бырсыр Абдулахь зэхахьэр зэрищагъ. Нэгъуцу Аслъан Адыгеим имызакъоу, Къыблэм, Темыр Кавказым, тилъэпкъэгъухэр зыщыпсэухэрэ хэгъэгухэм ащызэлъашIэ. АР-м и Лъэпкъ музей Iоф щешIэ, унэе IофшIапIэу «Нанэм» ипащ. Пэсэрэ адыгэхэм яIэшIагъэхэр цIыфхэм алъигъэIэсыжьыным пылъ. Адыгэ Iанэр, кушъэр, унагъом ищыкIэгъэ пкъыгъохэр А. Нэгъуцум ешIых. ИкIэлэгъум нарт къэбархэм защигъэгъуазэщтыгъ, ансамблэм хэтэу лъэпкъ къашъохэр къышIыщтыгъэх. Адыгэхэм ямузыкальнэ искусствэ гукIэ зэрэфэщагъэр щыIэныгъэм щытэлъэгъу.
Дунэе Адыгэ Хасэм ипрезидент иупчIэжьэгъоу МэщфэшIу Нэдждэт зэIукIэгъум щыхигъэунэфыкIыгъ А. Нэгъуцум лъэныкъуабэ къызэлъиубытызэ лъэпкъ искусствэм зэрэфэлажьэрэр.
Адыгэ музыкальнэ Iэмэ-псымэхэу пщынэтIаркъор, пхъэкIычыр, шыкIэпщынэр, нэмыкIхэри ышIыгъэх. ШыкIэпщынэм ибзэпсхэр артистхэм «къагъэгущыIэхэ» зыхъукIэ, А. Нэгъуцур мэгушIо, иIофшIагъэ уасэ зэрэфашIырэм гушхоныгъэ къыхелъхьэ.
— Нэгъуцу Аслъан тиныбджэгъушIу, тигуапэу IэпыIэгъу тыфэхъу, — къеIуатэ Хьатикъое Адам. — IофшIапIэу «Нанэм» лъэпкъ IэпэIасэхэм яIофшIагъэхэм якъэгъэлъэгъонхэр щызэхащэх. Адыгэхэм я ИлъэсыкIэ щагъэмэфэкIы. Адыгэ Республикэм ихэбзэ къулыкъушIэхэр, шIэныгъэлэжьхэр, искусствэм щыцIэрыIохэ Дзыбэ Мыхьамэт, Быщтэкъо Азэмат, ЛIыбзыу Аслъан, ансамблэхэу «Абрекхэр», «Мыекъуапэ инэфылъэхэр», фэшъхьафхэри зэIукIэгъухэм ахэлажьэх. Адыгэ быракъыр пчэгум щагъэбыбатэ.
СтIашъу Юрэ, Едыдж Мэмэт, Дугъ Айтэч, ШъэуапцIэкъо Сэфэр, Чэтыжъ Аслъан, Чэтэо Ибрахьим, нэмыкIхэм анахьэу анаIэ зытырадзагъэр лъэпкъым илIэужхэр зэпхыгъэнхэм А. Нэгъуцур зэрэдэлажьэрэр ары. Нысхъапэхэр ешIых, саер, цыер ныбжьыкIэхэм ащыгъэу къегъэлъагъох. Ипшъашъэ тыришIыкIыгъэ сурэтым гупшысэ хэхыгъэхэр рипхыгъэхэу А. Нэгъуцум къытиIуагъ.
Шэн-хабзэхэр
Зыхьэ Заурбый артист цIэрыIу, Iэпэжьыхьэ Светланэ хэбзэ къулыкъушIэу илъэсыбэрэ щытыгъ, Даур Руслъан кIэлэегъэджэ IофшIэным иветеран. Адыгэ кIэлэцIыкIухэу тирайонхэм къарыкIыгъэхэр «Нанэм» зэрэщызэIукIэхэрэм ахэр къытегущыIагъэх. ЕджакIохэм адыгабзэр, шэн- хабзэхэр зэрагъэшIэнхэмкIэ А. Нэгъуцум къыдэхъугъэр бэ. Псэ зыпыт зэхахьэхэм яшIуагъэкIэ кIэлэцIыкIухэм яшIэныгъэхэм ахагъахъо, ныбджэгъушIу зэфэхъугъэх. КIэлэегъаджэхэр, студентхэр, журналистхэр, цIыф цIэрыIохэр кIэлэцIыкIухэм аIуагъакIэх, лIыхъужъ ыкIи лэжьэкIо щытхъум япхыгъэ чIыпIэхэр, музейхэр, спорт псэуалъэхэр, къушъхьэхэр арагъэлъэгъух. Республикэ общественнэ движениеу «Адыгэ Хасэм» хэтхэр зэIукIэгъухэм якIэщакIох. Тхьаматэу ЛIымыщэкъо Рэмэзан, Хэсашъхьэм хэтхэу ЦIыкIушъо Аслъан, Къуижъ Къэплъан, Хъот Юныс, Тэу Аслъан, фэшъхьафхэр А. Нэгъуцум IэпыIэгъу фэхъух.
Гум къыхихырэ Iофыр нахь IэшIэхэу лъэкIуатэ. Нэгъуцу Аслъан IэпэIасэм иегъэджэн сурэт къэгъэлъэгъуапIэм щызэхищагъ. ПхъэкIычхэр зэхахьэм щашIыгъэх. Урысхэм, адыгэхэм пхъэкIычым «ишъэфхэр» зэрагъэшIагъэх.
Орэдым зеIэты
«Ошъадэм» иансамблэу «Ащэмэзым», Адыгэ Республикэм изаслуженнэ артисткэу Даутэ Сусанэ зэIукIэгъум орэдхэр къыщаIуагъэх. Адыгэ Республикэм культурэмкIэ изаслуженнэ IофышIэу, полицием икъулыкъу иветеранэу Абыдэ Хьисэ лъэпкъ шIэжьым къытегущыIагъ, А. Нэгъуцум къыщытхъугъ, лъэпкъ орэдыр зэхахьэм щигъэжъынчыгъ.
— ЗэхэщакIохэм, зэIукIэгъум хэлэжьагъэхэм лъэшэу сафэраз. Ситворчествэ кIэу хэзгъэхьан слъэкIыщтхэм сягупшысэ, — къытиIуагъ Адыгэ Республикэм культурэмкIэ изаслуженнэ IофышIэу, Адыгэ Хасэм и Хэсашъхьэ хэтэу Нэгъуцу Аслъан. —Сятэжъ, сиIахьылхэм сызыщагъэгъуазэщтыгъэ лъэпкъ Iофхэр сшIогъэшIэгъоных.
ЕмтIылъ Нурбый.