Мыекъуапэ изэхэт творческэ купэу «Ошъадэр» зызэхащэгъэ мафэм ихэгъэунэфыкIын фэгъэхьыгъэ зэхахьэр Пушкиным ыцIэ зыхьырэ унэм игъэкIотыгъэу щыхагъэунэфыкIыгъ.

«Ошъадэм» ихудожественнэ пащэу, Адыгэ Республикэм изаслуженнэ артисткэу, Чэчэн Республикэм искусствэ­хэмкIэ изаслуженнэ IофышIэшхоу Едыдж Викторие пчыхьэзэхахьэр зэрищагъ. Зэгъэпшэнхэр, зэфэхьысыжьхэр ышIыхэзэ, «Ошъадэм» ихэхъоныгъэхэр къыIотагъэх.

Мыекъуапэ инароднэ депутатхэм я Совет итхьаматэу Джарымэкъо Азмэт Мыекъуапэ иадминистрацие ипащэу Геннадий Митрофановым ыцIэкIэ «Ошъа­дэр» илъэси 10 зэрэхъугъэм фэшI фэгушIуагъ, рэзэныгъэ тхылъхэр артистхэм аритыжьыгъ.

Адыгэ Республикэм и Къэралыгъо Совет — Хасэм ыкIи республикэ общественнэ движениеу «Адыгэ Хасэм» ацIэкIэ Адыгэ Хасэм итхьаматэу ЛIымыщэкъо Рэмэзан зэхахьэм къыщыгущыIагъ. Едыдж Викторие артистхэм афэгъэхьыгъэ гущыIэ фабэхэр къыIуагъэх, щытхъу тхылъхэр аритыжьыгъэх.

Адыгэ Республикэм лъэпкъ культурэмкIэ и Гупчэ ипащэ игуадзэу Анцокъо Фатимэ «Ошъадэм» къыщытхъугъ, артистхэм яшIушIагъэ къыхигъэщыгъ, щытхъу тхылъхэр аритыжьыгъэх. Дугъ Айтэч зэхахьэм фэгъэхьыгъэ лъэпкъ шIэжь сурэтхэр дахэу зэришIыгъэхэм фэшI «тхьауегъэпсэу» раIожьыгъ.

КIэм лъэхъу

«Ошъадэр» кIэм сыдигъуи лъэхъу. Адыгэ фольклорым къыщыригъажьэзэ, къашъохэр къешIых, орэдхэр къеIох. Едыдж Викторие къызэрэхигъэщыгъэу, пэсэрэ лъэхъаным адыгэмэ аусыщтыгъэ орэдхэр непэрэ лъэхъаным диштэу зэхэтхынхэм фэшI «Ошъадэм» иоркестрэу «Бэгъэуджым» егъэжьэпIэшIу­хэр ышIыгъэх. Художественнэ пащэу, композиторэу Шэуджэн Рустам аранжировкэ Iофыгъохэм апылъ. Ащ зэригъэфэгъэ произведениехэр Москва, Къыблэм, Темыр Кавказым ащэIух.

Хъурэнэ Азэ Гощэмафэ фэгъэхьыгъэ орэдыр дахэу кIыригъэщыгъ. Ансамблэу «Синдикэм» лъэпкъ къашъоу къышIыгъэ­хэм гур аIэты. Художественнэ пащэу Едыдж Викторие ыгъэуцугъэ къашъохэу «ЗэфакIор», «Ислъамыер», фэшъхьафхэри лъэпкъ искусствэр къэзыгъэбаихэрэм ащыщых.

Къашъоу «Ислъамыер» ансамблэу «Синдикэм» зыми фэмыдэу къешIы. Нэбгырабэ зэрэхэлажьэрэм, къэ­шъуа­кIохэм шIыкIэу агъэфедэрэм узыIэпащэ.

Гъонэжьыкъо Мурат якIэщакIоу, «Ошъа­дэр» зызэхащагъэм къыщегъэжьагъэу хэт. Чэужъ Юлие, Сюзанна Шевченкэм, Быржь Суандэ, Нащэ Эммэ, нэмыкIхэм «Синдикэм» икъашъохэр яIэпэIэсэныгъэкIэ агъэдахэх.

Мэрэтыкъо Зубер Тыркуем, ЛIыбзыу Джантый Сирием къарыкIыжьыгъэх. Адыгабзэри, адыгэ къашъохэри зэрагъэ­шIагъэх, лъэпкъ искусствэм лъагъоу щыпхыращырэм егъэгушIох. Ныбджэгъу­шIухэр яIэ хъугъэхэу «Синдикэм» щэуджыых. «Синдикэр» зызэхащагъэм къыщегъэжьагъэу Надежда Шпак ансамблэм Iоф щешIэ, къэшъуакIохэм япащ.

«Бэгъэуджым» имафэхэр

Оркестрэу «Бэгъэуджым» ипащэу Шэуджэн Рустамрэ Шэуджэн Лилианэрэ пщынаох. ИскусствэмкIэ Темыр-Кавказ къэралыгъо институтыр Налщык къыщаухыгъ. ШыкIэпщынаоу ЛIыбзыу Шан Сирием къикIыжьыгъ. Искусствэм щызэлъашIэрэ ГъукIэ Замудин ыгъэсагъэмэ Шан ащыщ, «Синдикэм» хэтэу лъэпкъ къашъохэри дахэу къешIых.

Адыгэ Республикэм изаслуженнэ артистэу Къэбэхь Анзор шъонтырпау, къэшъуакIу. Театрализованнэ едзыгъохэм якъэшIын фэгъэсагъ. Адыгэ Республикэм культурэмкIэ изаслуженнэ IофышIэу Нэ­гъой Заур лъэпкъ музыкальнэ Iэмэ-псымэхэмкIэ ижъырэ мэкъамэхэр зэхахьэм щигъэжъынчыгъэх. Нарт орэдхэр, «Си Пакъ» зыфиIорэр, нэмыкIхэри къыIуагъэх.

«Ащэмэзыр» зэлъашIэ

Хъулъфыгъэ орэдыIо ансамблэу «Ащэмэзым» ихудожественнэ пащэу, Адыгэ Республикэм культурэмкIэ изаслуженнэ IофышIэу Бастэ Асыет артистхэм къатегущыIагъ. Шъэукъуй Айдэмыр, Беданэкъо Жьыут, Беданэкъо Алан, КIуращынэ Адам, Сапый Аскэр, ЛIыхъу­рэе Анзор пэсэрэ адыгэ орэдхэр, джырэ лъэхъан композиторхэм аусыгъэхэр зэхахьэм къыщаIуагъэх. «Ащэмэзыр» Темыр Кавказым, Къыблэм, Урысыем яфестивальхэм, зэнэкъокъухэм ахэлажьэ, щытхъуцIэхэр къыдехы.

ШIушIагъэр мэбагъо

«Ошъадэм» адыгэ шъуашэр дахэу зэрахьаным, орэд къаIоным, лъэпкъ къашъохэр къашIыным еджакIохэр фегъасэх.

Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ, Адыгэ Республикэм культурэмкIэ и Министерствэ иотдел ипащэу Шэуджэн Бэлэ зэхахьэм къыщыгущыIагъэх. «Ошъа­дэм» фэгушIуагъэх. Едыдж Викторие япащэу «Ошъадэм» иансамблэхэм лъэпкъ искусствэм хэхъоныгъэу фашIырэм мэхьэнэ ин иIэу алъытагъ.

Мыекъуапэ икъэлэ администрацие, АР-м и Правительствэ, Парламентым, лъэкI зиIэу культурэм IэпыIэгъу фэхъу­хэрэм «Ошъадэм» ипащэхэр афэразэх. Рагъэжьэгъэ Iофыр зэгъусэхэу лъагъэ­кIотэн ямурад.

ЕмтIылъ Нурбый.