Урысые Федерацием и Президентэу Владимир Путиныр кIэтхэжьыгъ шэкIогъум и 16-р самбэм и Мафэу гъэнэфэгъэным фэгъэхьыгъэ Указым.

«Мы спорт лъэпкъыр зэлъягъэшIэгъэ­нымкIэ ыкIи хэхъоныгъэ ащ егъэшIы­гъэнымкIэ, ныбжьыкIэхэр нахьыбэу сам­бэм фэщэгъэнхэмкIэ унашъом ишIуа­гъэ къэкIонэу сэлъытэ.

Тэ талъэныкъокIэ самбист ныбжьыкIэхэм ящыкIэгъэ амалхэр зэкIэ ягъэгъотыгъэнхэм иIоф лъыдгъэкIотэщт. Тиреспубликэ спортымкIэ хэбзэ гъэнэфагъэхэр иIэ хъугъэх, тренер лъэшхэр, джащ фэдэу тихэгъэгуи дунаими ясамбистхэр зыкIырыплъынхэ чемпионэу макIэп тиIэр.

Пстэуми апэу спортсмен ныбжьыкIабэ Хьасанэкъо Мурат кIырэплъых: ти­чIыпIэгъу цIэрыIо самбэмкIэ дунаим гъогогъу 11-рэ ичемпион хъугъэ, дунаим и Кубок гъогогъуи 8-рэ къыфагъэшъошагъ, Европэм гъогогъуи 7-рэ, Уры-сыем гъогогъу 19-рэ ячемпион хъугъэ, ар Урысыем спортымкIэ изаслуженнэ мастер, медалэу «Адыгеим и Щытхъузехь» зыфиIорэр къыфагъэшъошагъ, тиреспубликэ ыцIэкIэ УФ-м и Къэралыгъо Думэ идепутат. Хьасанэкъо Мурат ишIухьафтын афэгъэшъошэгъэным фэгъэхьыгъэ Урысые турнирхэр зэхащэнхэр хабзэ хъугъэ, бэмышIэу Мыекъуапэ щыкIуагъэр ахэм зыкIэ ащыщ.

Адыгеим спорт мэфэкI ыкIи зэнэ­къокъу инхэр щызэхэщэгъэнхэмкIэ самбэм и Мафэ зичэзыу ушъхьагъу дэгъу зэрэхъущтым сицыхьэ телъ!» — къаригъэхьагъ КъумпIыл Мурат исоциальнэ нэкIубгъохэм.