МэщбэшIэ Исхьакъ агъэлъэпIагъ
Урысыем IофшIэнымкIэ и ЛIыхъужъэу, Адыгеим, Къэбэртэе-Бэлъкъарым, Къэрэщэе-Щэрджэсым янароднэ тхакIоу МэщбэшIэ Исхьакъ КъБР-м и ЛIышъхьэу КIокIо Казбек ригъэблэгъагъ, «Къэбэртэе-Бэлъкъар Республикэм ия 100-рэ илъэс» зыфиIорэ бгъэхалъхьэр къыфигъэшъошагъ.
ЗэIукIэгъум хэлэжьагъ Дунэе Адыгэ Хасэм и Тхьаматэу Сохърэкъо Хьаути.
Къэбэртэе-Бэлъкъарым илъэпкъ усакIоу Кайсын Кулиевыр къызыхъугъэр илъэси 105-рэ зэрэхъугъэм фэгъэхьыгъэ шIэжь пчыхьэзэхахьэм МэщбэшIэ Исхьакъ хэлэжьагъ. Къэбэртэе-Бэлъкъарым щыпсэухэрэм зэкIэми зиусэхэр ашIэрэ тхакIом ыкIи усакIом ишIэжь зэригъэлъэпIагъэм пае КIокIо Казбек МэщбэшIэ Исхьакъ зэрэфэразэр къыкIигъэтхъыгъ.
«Графиня Аиссе» зыфиIорэ фильмэу МэщбэшIэ Исхьакъ ироманэу «Айщэт» техыгъэр къызэрэдэкIыгъэмкIэ, ар къэралыгъом ичIыпIэ зэфэшъхьафхэм къащагъэлъэгъуагъ, КIокIо Казбек тхакIом къыфэгушIуагъ. Фильмым зэлъашIэрэ урысые актерхэр хэлэжьагъэх, роль шъхьаIэр къэзышIыгъэр Къэбэртэе-Бэлъкъарым къыщыхъугъэу, театрэм ыкIи кином яактрисэу Мамрышэ Светлан. Айщэт ицIыкIугъор къэзышIыгъэр Адыгеим щыщэу ЯхъулIэ Даян. Ежь итхыгъэкIэ фильмыр техыгъэ зэрэхъугъэр МэщбэшIэ Исхьакъ КIокIо Казбек къыфиIотагъ. Урысые культурэм МэщбэшIэ Исхьакъ иIахь зэрэхилъхьэрэмкIэ зэрэфэразэр КIокIо Казбек къыриIотыкIыгъ, псауныгъэ иIэу джыри IофшIэгъабэ фызэшIокIынэу ар тхакIом флъэIуагъ.
«Фильмым зеплъыхэ ужым пресс-конференциер зэхащэгъагъ, — къытфиIотагъ МэщбэшIэ Исхьакъ, — ар техыгъэ зэрэхъугъэм, Iоф зэрэдашIагъэм, Айщэт ирольхэр, ицIыкIугъорэ иныбжьыкIэгъурэ, къэзышIыгъэхэм якъыхэхын зэрэкIуагъэм къыкIэупчIагъэх. ЗэкIэ къафэсIотагъ. Агу рихьэу фильмым еплъыгъэх, залым чIыпIэ нэкI имыIэу цIыфхэр чIэсыгъэх. Тарихъым зыцIэ къыхэнэгъэ адыгэ бзылъфыгъэм, Европэм, Францием, регентствэм илъэхъан мы-хъо-мышIагъэу цIыфхэм къахафэщтыгъэхэр ыумысэу, ицIыфышъхьэ икъэбзагъэ къыгъэгъунэу, обществэу зыхэтыгъэм пэуцугъэ Айщэт фэгъэхьыгъэ фильмыр джы щыIэ зэрэхъугъэр мэхьанэшхо зиIэ Iофыгъу. Ар лIэужхэм къафэнэщт».
Адыгэ лъэпкъым ихахъо фэлэжьэрэ цIыф цIэрыIохэм ясатырэ МэщбэшIэ Исхьакъ ыцIэ зэрэхэхьащтыр зэхахьэм хэлэжьагъэхэм хагъэунэфыкIыгъ. ТхакIом зэрэфэразэхэр, фильмыр агу зэрэрихьыгъэр къаушыхьатэу бэрэ Iэгу фытеуагъэх.