Футбол клубэу «ШэхэкIэй» зыфиIорэм къалэу Шъачэ ичемпионатэу джырэблагъэ зэха­щэгъагъэм тыжьын ме­даль къыщихьыгъ.

Неущырэ мафэмкIэ гугъэ ин­хэр къэ­зытэу, ау джыри зигугъу бэрэ амышIыщтыгъэр илъэс заулэкIэ нахьыпэкIэ пэ­рытныгъэр зыIыгъыгъэхэр къыз­щыщынэрэ командэ хъугъэ.

Джы «Шэ­хэкIэйхэу» текIоны-гъэм сыдигъокIи тегъэпсыхьагъэхэм уапэшIуекIоныр зэрэмыпсынкIэр футболистхэм зэ­кIэми ашIэ. Командэм хэтэу ыкIи итренерэу, спортымкIэ мастерэу Кобл Мэдинэ зипащэхэм очко ашIозыхьырэм бэу къыдэ­хъугъэу алъытэ.

Аужырэ илъэсхэм «Шэ­хэ­кIэир» Шъачэ ичемпионатхэм апэрэ чIыпIэхэр къа­щыдэ­зы­хыхэрэм ащыщ мызэу, мытIоу хъугъэ, ары пэпчъ текIоныгъэм зи арэп зэрэпэчыжьэрэр. Джыри аущтэу хъугъэ. Кобл Мэдинэ икомандэ хэтхэу Хьахъу Байзэт, Даур Аслъан, Кобж Заур, Нэ­псэу Хъалид, Балэ Рустам, ЛIыфэ Долэт, Иван Барановыр, Кобл Адам, Николай Карповыр, ТIэшъу Заур, Инал Казбек, Владимир Ха­чаряныр, Дмитрий Костенкэр, Кобл Саид, Юрий Карибовыр, Давид Хачарян, Артур Мангасовыр, Кобж Мэдин, Даниил Ломоносовыр, Евгений Корзинкиныр, Эльдар Халатян, Игорь Морозовыр ыкIи Зэфэс Налбый мыдэеу ешIагъэх. Турнирым ахэм текIоныгъэр гъого-гъуи 7-рэ къыщыдахыгъ, 4-мкIэ пчъагъэр зэфэдизыгъ, гъого­гъуищымкIэ къатекIуагъэх. Апэ рагъэшъыгъэр Адлер икомандэу «Тракторыр» ары. Ауж итыгъэр, зэ­нэкъокъум ящэнэрэ чIыпIэр къыщыдэзыхыгъэр мы къэлэ дэдэм икомандэу «Леон».

— Зэфэхьысыжьхэр тшIыщтых, тихэу­къоныгъэхэм, щыкIагъэхэм ядэгъэзы­жьын Iоф дэтшIэщт, — къыхигъэщыгъ Кобл Мэдинэ. — Къалэм икоман­дэ анахь дэгъуцIэр къэтхьынэу амал щыIагъ, ау… ЩыIэныгъэр лъэкIуатэ, джыри ащ фэдэ турнирыбэ тапэ илъ. Клубым тапэкIэ гъэхъагъэхэр мымакIэу зэри­шIыщтхэм, иболельщикхэр зэригъэгу­шIощтхэм сицыхьэ телъ. Ахэр сы­дигъокIи тигъусэх, ащ тэркIэ мэхьа­нэшхо иI.

«ШэхэкIэим» футболымкIэ Шъачэ и Лигэ изэнэкъокъоу щыIэщтым зыфе­гъэхьазыры. БлэкIыгъэ илъэсым щыIагъэм текIоныгъэр къыщыдихыгъагъ. Джы­ри ар къадэхъуным ты­щэгугъы.

НЫБЭ Анзор.