Къэрэщэе-Щэрджэсым и Къэралыгъо филармоние иартистхэм япчыхьэзэхахьэ гъэшIэгъонэу Мыекъуапэ щыкIуагъ.

Зэхахьэр зезыщагъэхэ артистхэу Алият Нурлубаевамрэ Мыкъо Анжелэрэ зэгурыIоныгъэ ахэлъэу мы республикэм лъэпкъыбэ зэрэщыпсэурэр къаIотагъ. Къэралыгъо гъэпсыкIэ иIэу Къэрэщэе-Щэрджэсыр зыщыIэр илъэси 100 зэрэхъугъэм фэгъэхьыгъэ концертэу «СичIыгу гупсэ ижъогъобын мэкъамэхэр» зыфиIорэм артистхэм орэдыбэ къыщаIуагъ, лъэпкъ къашъохэр къыщашIыгъэх. — Тиреспубликэ изыкIыныгъэкIэ лъэ­шы хъугъэ, Урысыем ис лъэпкъхэм зэпхыныгъэу адытиIэр щыIэныгъэм щытэгъэпытэ. ТиорэдкIэ, тикъашъокIэ тыкъышъулъэIэсы, шъудгъэгушIо тшIоигъу, — къытиIуагъ концертыр зезыщэгъэ Мыкъо Анжелэ.

Къэрэщэе-Щэрджэсым изаслуженнэ артисткэу Акъбай Лаурэ «Мыр си Кавказ» зыфиIорэ орэдыр къызыхедзэм, республикэм ичIыопс, икъушъхьэхэр зэрэдахэхэр нэгум къыкIигъэуцуагъэх. Филармонием къашъохэмкIэ итеатрэ иартистхэу Лилия Дарчиевам, Азамат Ионовым, Арсен Джандубаевым, Бэчыжъ Жаннэ, Алина Тарасуновам, Заур Кмышевым «Къашъо» зыфиIорэ лъэпкъ къашъор къашIыгъ. Артистхэр дахэу уджыгъэх. Пэсэрэ лъэхъаным гукIэ ухащэзэ, лъэпкъ шэн-хабзэхэр къагъэлъэгъуагъэх.

Оркестрэм къыригъэIогъэ лъэпкъ мэкъамэхэр гум «щэчэрэгъух». Бэрэ зэхэтхырэ орэдышъохэм гур аIэты. Къа­шъоу «Минги-Таур» артистхэу Адэжь Анжелэ, Арсен Джандубаевым, Хьаджымэ Исмахьилэ къыхадзагъ. Лъэпкъхэр зэфэзыщэхэрэ къашъохэр, «Пшъэшъэ уджыр», «Нохчо» зыфиIорэр, фэшъхьафхэри артистхэм къашIыгъэх.

Азамат Ионовым «ЛъэпэчIасэр» гум рихьэу къыгъэлъэгъуагъ. Дахэу къэшъо, къамэхэр фэIэпэIасэу джэхашъом хесэх.

Орэдыр, къашъор

Мыкъо Анжелэ, Алият Нурлубаевам, Думанышъ Лианэ, нэмыкIхэм лъэпкъ, шIулъэгъу орэдхэр къаIуагъэх. Жэнэ Къырымызэрэ Сэмэгу Гощнагъорэ зэдаусыгъэ лъэпкъ орэдэу «Адыгэхэм яхабзэ джащ фэд» зыфиIорэр залым чIэсхэм агу рихьыгъэ къодыеп, ащ дежъыугъэх.

Ижъырэ адыгэ къашъоу «Ислъамыер» Анна Кочкаровамрэ Азамат Ионовымрэ къызэдашIыгъ. Адыгеим иансамблэхэу «Налмэсым», «Ислъамыем», «Синди­кэм», «Абрекхэм», «Мыекъуапэ инэфылъэхэм». нэмыкIхэм къашъоу «Ислъа­мыем» екIолIэкIэ зэфэшъхьафхэр фашIы. Къэрэщэе-Щэрджэсым иартистхэми къашъом шIыкIэшIу къыфагъотыгъ. «Ислъамыер» узыIэпищэу къызэрашIырэр къыхэдгъэщы тшIоигъу.

Псэ къыпегъакIэ

Къэрэщэе-Щэрджэсым изаслуженнэ артисткэу Мыкъо Анжелэ орэдэу къы­Iорэм псэ къыпегъакIэ. Артист нэша­нэхэр фэIэпэIасэу егъэфедэх, орэдым хэлъ гупшысэр къыплъегъэIэсы, нэгушIоу пчэгум щэуджы. «Кавказ ытамэхэр» зыфиIорэ орэдыр А. Мыкъом къызыхе­дзэм, лъэпкъыбэ зыщыпсэурэ Кавказ шъолъырым идэхагъэ, ицIыф гъэшIэгъон­хэр нэгум къыкIигъэуцуагъэх. Хэгъэгум игушъхьэ кIуачIэ фэгъэхьыгъэ къашъор Аджый Анжелэ, Арсен Джандубаевам, Къуныжъ Тимур, Хьа­джымэ Исмахьилэ, нэмыкIхэм къашIыгъ. МэфэкI зэхахьэм диштэу къашъор къагъэлъэгъуагъ.

Къэрэщэе-Щэрджэсым иартистхэм тагъэгушIуагъ. Адыгэ Республикэм и Къэралыгъо филармоние щыкIогъэ зэхахьэр шIукIэ тыгу къинэщт. Лэгъупкъоп­сыр ошъогум къыщынэфы зыхъукIэ дахэу зэрэщытым фэдэу къэшъуакIохэм пчэгур къагъэшIэтыгъ. Фыжьышъор, плъыжьы­шъор, уцышъор, нэмыкIхэри жъуагъоу къэнэфыгъэх. Лъэпкъхэм языкIыныгъэ тамэу ратырэм зиушъомбгъугъ. Художественнэ пащэу Мурат Нагиевым, артистхэм тафэраз.

ЕмтIылъ Нурбый.