ЯщытхъуцIэ хагъахъо
Къыблэ шъолъырым самбэмкIэ изэнэкъокъу Ермэлхьаблэ тыгъэгъазэм и 13 — 15-м щыкIуагъ.
Бзылъфыгъэхэр, хъулъфыгъэхэр якупхэм ахэтхэу апэрэ чIыпIэхэм афэбэнагъэх. Адыгэ Республикэм ихэшыпыкIыгъэ командэ медали 6 къыдихыгъ.
Нащэ Расул, кг 71-рэ, апэрэ чIыпIэр къыфагъэшъошагъ. Тренерхэу Джарымэкъо Рустамрэ Джарымэкъо Азмэтрэ ипащэх. Бат Аскэр, кг 78-рэ, дышъэ медаль къыдихыгъ. Тренерхэу Джарымэкъо Рустамрэ Хьабый Байзэтрэ агъасэ.
Лъэустэнхьаблэ щапIугъэ Екатерина Соловьевам, кг 80-м къехъу, апэрэ чIыпIэр къыфагъэшъошагъ, тренерыр Нэныжъ Байзэт. Къыхэдгъэщы тшIоигъу Екатерина Соловьевам мыгъэ Европэм ятIонэрэ, дунаим апэрэ чIыпIэхэр самбэмкIэ къазэрэщихьыгъэр.
Нащэ Расул Европэм иныбжьыкIэхэм самбэмкIэ язэнэкъокъу дышъэ медалыр къыщыдихыгъ. Тэхъутэмыкъуае щыщ нарт шъаом Ермэлхьаблэ хъулъфыгъэхэм язэнэкъокъоу щыкIуагъэм апэрэ чIыпIэр къызэрэщыдихыгъэр бэмэ агъэшIэгъуагъ. Илъэс пчъагъэкIэ нахьыжъхэм Р. Нащэр атекIуагъ.
Кобл Рэмэзани, кг 58-рэ, Европэм иныбжьыкIэхэм самбэмкIэ язэIукIэгъухэм апэрэ чIыпIэр къащихьыгъ. Хъулъфыгъэхэм язэнэкъокъоу Ермэлхьаблэ щыкIуагъэм тыжьыныр къыщыдихыгъ. Тренерхэу Джарымэкъо Рустамрэ Джарымэкъо Азмэтрэ нарт шъаор агъасэ.
Чэтыжъ Нурбый, кг 71-рэ, ящэнэрэ чIыпIэр къыхьыгъ, тренерыр Джарымэкъо Рустам, Хьакъуй Амир, кг 79-рэ, джэрзыр къыфагъэшъошагъ. Тренерхэу Делэкъо Адамрэ Гъомлэшк Алыйрэ ипащэхэу самбэр ищыIэныгъэ щыщ хъунэу зегъасэ.
— Хъулъфыгъэхэм, бзылъфыгъэхэм язэнэкъокъу тибэнакIохэр чанэу хэлэжьагъэх. ТиныбжьыкIэхэм ясэнаущыгъэ къызэIуахыным фэшI егъэжьэпIэшIухэр ашIыгъэх, — къытиIуагъ Адыгэ Республикэм самбэмкIэ испортеджапIэ ипащэу Делэкъо Адам. — ХагъэунэфыкIырэ чIыпIэхэр къыдэзыхыгъэхэр Урысыем икIэух зэнэкъокъоу къалэу Пермь 2023-рэ илъэсым мэзаем щыкIощтым хэлэжьэщтых.
Сурэтым итхэр: кг 78-рэ къэзыщэчыхэрэм якуп хагъэунэфыкIырэ чIыпIэхэр къыщызыхьыгъэхэр, тренерхэр.
+