Илъэпкъ шIу зылъэгъурэ кIэлэегъэджагъ
Мы илъэсым ижъоныгъокIэ мазэ ыныбжь илъэс 82-м итэу дунаим ехыжьыгъ кIэлэегъэджэ цIэрыIоу, общественнэ IофышIэшхоу, зэхэщакIоу Боус Нинэ.
Ар Адыгеим дэгъоу щашIэщтыгъ, Адыгеим гъэсэныгъэмрэ шIэныгъэмрэкIэ и Министерствэ, кIэлэегъаджэхэм яшIэныгъэ зыщыхагъахъорэ ыкIи гуманитар шIэныгъэхэмкIэ ушэтыпIэ институтхэм, Адыгэ къэралыгъо университетым илъэсыбэрэ зэпхыныгъэ адыриIагъ.
Нинэ Адам ыпхъум ищыIэныгъэ еджапIэмрэ кIэлэцIыкIухэмрэ аритыгъ. ШIу ылъэгъурэ Iофэу ышIэщтыгъэм кIуачIэ къыритыщтыгъ, ащ ишIуагъэкIэ къыткIэхъухьэрэ лIэужхэм яегъэджэн ыкIи япIун фэшъыпкъэу фэлэжьагъ.
Шъачэ икIэлэегъаджэу опытышхо зиIэхэм ащыщ Боус Нинэ зыфэщагъэу, къыдэхъугъэ сэнэхьатыр джыри ныбжьыкIэзэ къэнэфэгъагъ. Хы ШIуцIэ Iушъо Шапсыгъэ гъэсэныгъэмкIэ иучреждениехэм ачIэт кIэлэегъаджэхэр игъусэхэу ячIыгужъ, къызтекIыгъэхэ лъэпкъым ихабзэхэр, икультурэ шIу зэригъэлъэгъугъэ кIэлэцIыкIухэр нэбгыришъэ пчъагъэ мэхъух.
Боус Нинэ 1941-рэ илъэсым щылэ мазэ и 18-м къуаджэу Хьаджыкъо къыщыхъугъ. 1968-рэ илъэсым Адыгэ къэралыгъо кIэлэегъэджэ институтыр къызеухым, къуаджэу Тхьагъапшъэ дэт еджапIэм иIофшIэн щыригъэжьэгъагъ. Ащ ыуж поселкэу ПсышIуапэ иеджапIэу N 75-м зигъэзэжьи, пенсием окIофэ щылэжьагъ.
БлэкIыгъэ лIэшIэгъум ия 80-рэ илъэсхэм акIэхэм ежь ишIоигъоныгъэкIэ ыкIи ыпкIэ хэмылъэу район гупчэм ис адыгэ кIэлэцIыкIухэм яныдэлъфыбзэ аригъэшIэнэу ригъэжьэгъагъ. Я 90-рэ илъэсхэм Шъачэ ыкIи ТIопсэ районым яеджапIэхэм адыгабзэр зэрэщарагъэшIэщт системэм игъэпсын апэу ыуж ихьэгъагъэхэм ащыщ.
Адыгэбзэ кIэлэегъэджэ куп игъусэу еджапIэхэмрэ кIэлэцIыкIу IыгъыпIэхэмрэ адыгабзэр щарагъэшIэным кIэщакIо фэхъугъагъ, кIэлэегъаджэхэм ягъэхьазырын ыуж итыгъ, кIэлэеджакIохэм слетхэр афызэхищэщтыгъэх, ныбжьыкIэхэр ялъэпкъэгъу цIэрыIохэм, лъэпкъ научнэ ыкIи творческэ интеллигенцием ялIыкIохэм аIуигъакIэщтыгъэх, ныдэлъфыбзэм икъэгъэнэжьын ыкIи изегъэушъомбгъун тегъэпсыхьэгъэ олимпиадэхэм, Iэнэ хъураехэм, конференциехэм, адыгабзэр зэзыгъашIэрэ кIэлэеджакIохэм апае экскурсиехэм кIэщакIо афэхъущтыгъ.
Боус Нинэ ыкIи ащ игъусэхэм яшIушIагъэкIэ кIэлэцIыкIухэр краеведением пылъыгъэх, тишъолъыр итарихъ, типсэупIэхэм ацIэхэр къызтекIыгъэхэм, ахэм ящыIэныгъэ зэхъокIыныгъэу хэхъухьагъэхэм, яхэхъоныгъэхэм, непэ зэрэпсэухэрэм афэгъэхьыгъэ материалхэр къаугъоищтыгъэх, лIакъоу зыщыщхэм «ячъыгхэр» зэхагъэуцощтыгъэх. Хэгъэгу зэошхом иилъэсхэр, хы ШIуцIэ Iушъо шапсыгъэхэм яIахьэу ащ халъхьагъэр зэрагъашIэщтыгъ.
Нинэ иIофшIэгъоу ыкIи икъотэгъоу Алалэ Эммэ игъусэу зыфэдэ къэмыхъугъэ тхылъэу «Золотые россыпи Шапсугии» ыкIи «Книга Памяти Причерноморской Шапсугии» зыфиIохэрэр зэхагъэуцуагъэх.
Боус Нинэ кIэлэегъэджэ IофшIэным илъэсыбэу ритыгъэм, общественнэ Iофышхоу ышIагъэм апае «Урысые Федерацием лъэпкъ просвещениемкIэ и Отличник» зыфиIорэ цIэр къыфагъэшъошагъ, щытхъу ыкIи рэзэныгъэ тхылъхэмкIэ, нэпэеплъ шIухьафтынхэмкIэ пчъагъэрэ къыхагъэщыгъ.
Боус Нинэ икъоджэ гупсэу Хьаджыкъо щагъэтIылъыжьыгъ.
НЫБЭ Анзор.