Адыгэ Республикэм терроризмэм пэуцужьыгъэнымкIэ икомиссиерэ иоперативнэ штабрэ язэхэсыгъо АР-м и Правительствэ зычIэт унэм щыкIуагъ. Комиссием итхьаматэ игуадзэу, щынэгъончъэнымкIэ федеральнэ къулыкъум АР-мкIэ и ГъэIорышIапIэ ипащэу Михаил Кемеровым ар зэрищагъ.

Краснодар псыIыгъыпIэм игидротехническэ псэуалъэхэр зэрэухъумагъэхэм зэхэсыгъом хэлэжьагъэхэр тегущыIа­гъэх. АР-м граждан оборонэмкIэ ыкIи ошIэ-дэмышIэ IофхэмкIэ и Комитет итхьаматэу Вячеслав Лотаковыр, Краснодар краим терроризмэм пэуцужьыгъэнымкIэ икомиссие иаппарат ипащэу Александр Косивченкэр, федеральнэ къэралыгъо бюджет учреждениеу «Центррегионводхоз» зыфиIорэм икъутамэ ипащэу Игорь Бадаловыр зэхэсыгъом къыщыгущыIагъэх.

КъэгущыIагъэхэм зэрэхагъэунэфыкIыгъэмкIэ, террористическэ актхэу зэра­хьан алъэкIыщтхэм апэуцужьыгъэнымкIэ зэрэзекIонхэ фаер IофышIэхэм къафаIотагъ; дежурнэ къулыкъухэр, макъэ зэрарагъэIурэ системэхэр ауплъэкIугъэх; терроризмэм узэрэпэуцужьыщт шIыкIэм зыщыфагъасэхэрэ тренировкэхэр зэхащагъэх. Джащ фэдэу псыIыгъыпIэр щынэгъончъэнымкIэ Адыгеимрэ Пшызэ шъолъыррэ яхэбзэухъумэкIо къулыкъу­хэм зэдэлэжьэныгъэу зэдыряIэр нахь агъэлъэшыгъ.

ИлъэсыкIэ мэфэкIхэр зыщыкIощтхэ лъэхъаным цIыфхэр жъугъэу зыщызэ­IукIэрэ чIыпIэхэм террористическэ акт­хэр ащызэрамыхьанхэмкIэ Iофтхьабзэу зэшIуахыхэрэми зэхэсыгъом щатегущыIагъэх. АР-м и МВД общественнэ рэ­хьатныгъэр къэухъумэгъэнымкIэ ипо­ли­цие ипащэ игуадзэу Андрей Федосеевым зэрэхигъэунэфыкIыгъэмкIэ, АР-м и МВД хэтхэм гъэлъэшыгъэ шIыкIэм тетэу Iоф ашIэщт, урамхэми, общественнэ чIыпIэхэми атетыщт нарядхэм ахэт­хэм ахагъэхъощт.

ЦIыфхэр жъугъэу зыхэлэжьэрэ IофтхьабзэхэмкIэ чIыпIэ отделхэм япащэхэм ащыщхэу пшъэдэкIыжь зыхьыщтхэр агъэнафэх, специалист-кинологхэм е оперативнэ-техническэ купхэм шIокI имыIэу ащ фэдэ Iофтхьабзэхэр зыщыкIощтхэ чIыпIэхэр къаплъыхьэх.

ИлъэсыкIэ мэфэкIхэм ялъэхъан цIыф­хэм ярэхьатныгъэ къэухъумэгъэным, гъогурыкIонымкIэ шапхъэхэр къыдэлъы­тэгъэнхэм атегъэпсыхьагъэу МВД-м, Росгвардием, ухъумэнымкIэ унэе организациехэм яIофышIэхэу, народнэ дружинэхэм ахэтхэу ищыкIагъэм фэдизмэ Iоф ашIэщт. Мыекъопэ районым икъушъхьэ­лъапэ щыгъэпсыгъэ зекIо ком­плексхэм общественнэ рэхьатныгъэр къащыухъумэгъэнымкIэ амал, кIочIэ тедзэхэри къызфагъэфедэщтых.

АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур хэу­шъхьафыкIыгъэ дзэ операциер зыщызэхащэрэ лъэхъаным псэуалъэхэм террористическэ актхэр ащызэрамыхьанхэмкIэ Iофтхьэбзэ тедзэу зэхащэхэрэм къатегущыIагъ.

Адыгэ Республикэм игъэцэкIэкIо хэбзэ къулыкъухэмрэ чIыпIэ зыгъэIоры­шIэжьынымкIэ къулыкъухэмрэ къафэгъэзэгъэ псэуалъэхэм адэхьанхэмкIэ ыкIи шэпхъэ гъэнэфагъэхэр къащыдэлъытэгъэнхэмкIэ амалхэр зэрахьэх, уплъэкIунхэр зэрэзэхащэрэ, макъэ зэрарагъэIурэ системэхэм, ухъумапIэу щыIэхэм язытет зэрагъашIэ. Джащ фэдэу ошIэ-дэмышIэ тхьамыкIагъохэр, террористическэ актхэр къэхъун зэрилъэкIыщтхэр къыдалъытэзэ, ащ фэдэ лъэхъанхэм IофышIэхэр зэрэзекIонхэ фаер къафаIуатэ, тренировкэ гъэнэфагъэхэр зэхащэ.

ГъэсэныгъэмкIэ учреждением террористическэ актхэр ащызэрамыхьанхэм тегъэпсыхьэгъэ амалхэм якъыхэхын, Урысые Федерацием терроризмэм щыпэуцужьыгъэнымкIэ планэу 2019 – 2023-рэ илъэсхэм ателъытагъэм иположение­хэр зэрагъэцакIэхэрэм, Адыгэ Респуб­ликэм игъэцэкIэкIо хэбзэ къулыкъухэм яIофышIэхэу терроризмэм пэуцужьыгъэ­нымкIэ пшъэдэкIыжь зыхьыхэ­рэм яIэпэIэсэныгъэ зыкъызэрэрагъэIэтырэм япхыгъэ Iофыгъохэми зэхэсыгъом щатегущыIагъэх.

Политическэ, социальнэ-экономикэ ыкIи нэмыкI Iофтхьабзэхэу терроризмэм пэуцужьыгъэнымкIэ зишIуагъэ къэкIонэу щытхэм гъунэ зэралъафырэм, 2023-рэ илъэсым АР-м терроризмэм пэуцужьыгъэнымкIэ икомиссие Iоф зэришIэщт планэу агъэхьазырыгъэм зэхэсыгъом щахэплъагъэх.

АР-м и ЛIышъхьэ ипресс-къулыкъу