Адыгабзэр щызэрагъашIэ
АР-м икъэралыгъо программэу «Гъэсэныгъэм хэхъоныгъэхэр егъэшIыгъэнхэр» зыфиIорэм къызэрэдыхэлъытагъэу, 2019-рэ илъэсым игъэтхэпэ мазэ къыщегъэжьагъэу Лъэпкъ тхылъеджапIэм игукъэкIыкIэ «Адыгабзэ зэзыгъашIэ зышIоигъохэр» зыфиIорэ Клубыр мыщ щызэхащагъ.
Адыгабзэмрэ тхыбзэмрэ я Мафэ ехъулIэу мэфэкI шIыкIэм тетэу ар къызэIуахыгъ. Адыгабзэм изэгъэшIэн, адыгэ лъэпкъым икультурэ, итарихъыр шIоигъоныгъэ зиIэхэр нэIуасэ фашIынхэр ары пшъэрылъ шъхьаIэу яIэр.
Тхьамафэм тIогъогогъо фаехэр а клубым къекIуалIэх, адыгэ къэIуакIэхэр ащымыгъупшэнхэм пае телефонхэм мэкъэ тетхагъэхэр афарагъэхьых. Непэрэ мафэм ехъулIэу кIэлэцIыкIухэмрэ нахьыжъхэмрэ купитIоу гощыгъэу Iоф ашIэ. Егъэджэнхэм анэмыкIэу зэдэгущыIэным епхыгъэу джэгукIэ зэфэшъхьафхэр афызэхащэх. Яныдэлъфыбзэ фэдэу адыгабзэр арагъэшIэныр арэп зэхэщакIохэр зыуж итхэр, бзэр мэкIэ-макIэу аIуалъхьаныр, къэгущыIэнхэ амал яIэныр, къараIорэр къагурыIоныр ары. Адыгабзэм дакIоу лъэпкъ культурэм, щыIэкIэ-псэукIэу адыгэхэм яIагъэм афэгъэхьыгъэ темэ зэфэшъхьафхэр къыщаIэтых.
Егъэджэнхэм зафагъэхьазыры зыхъукIэ, краеведческэ ыкIи лъэпкъ литературэм фэгъэзэгъэ отделым чIэлъ гущыIалъэхэр, справочникхэр, тхылъхэр, методическэ IэпыIэгъухэр агъэфедэх. Урысхэу адыгабзэ зэзыгъашIэ зышIоигъохэм анэмыкIэу IэкIыбым, анахьэу Сирием ыкIи Тыркуем къарыкIыжьыгъэхэр Клубым къекIуалIэх. Ахэм урысыбзэр зэрамышIэрэр къыда-лъытэзэ егъэджэн амал шъхьаф къафыхахыгъ.
КъэIогъэн фае тхылъеджапIэм щызэхащэрэ Iофтхьабзэхэм Клубым къекIуалIэхэрэр чанэу зэрахэлажьэхэрэр. Ахэм ащыщ Урысые Iофтхьабзэхэу «Ночь искусств», «Библионочь-2022» зыфиIохэрэр. Джащ фэдэу 2020-рэ илъэсым Мыекъуапэ щыкIорэ Iофтхьабзэу «Лучший видеоурок» зыфиIорэм, 2021-рэ илъэсым литературнэ-поэтическэ сыхьатэу «Плоды взращенных «зерен слов»» зыцIэм, АР-м инароднэ усакIоу, профессорэу, УФ-м культурэмкIэ изаслуженнэ IофышIэу Бэрэтэрэ Хьамидэ къызыхъугъэ мафэр илъэс 90-рэ зэрэхъурэм фэгъэхьыгъэу зэхащагъэм ыкIи нэмыкIхэм ашIогъэшIэгъонэу ахэлэжьагъэх.
Адыгабзэр зышIогъэшIэгъонхэм клубым ишIуагъэкIэ ар зэрагъашIэ. Ащ фэдэ шIоигъоныгъэ зиIэхэр Лъэпкъ тхылъеджапIэм къырегъэблагъэх.