Хэгъэгум и ДОСААФ илъэс 95-рэ зэрэхъурэм фэгъэхьыгъэ зэхахьэу Мые­къуапэ щыкIуагъэм ныбжьыкIэхэр дзэ къулыкъум зэрэфагъасэхэрэм щытегу­щыIагъэх.

НыбжьыкIэхэр къулы­къум фэгъэхьазырыгъэнхэм, яхэгъэгу шIу алъэ­гъоу пIугъэнхэм, лъэхъаным диштэу яегъэджэн зэхэщэ­гъэным яхьылIэгъэ Iоф­тхьабзэм илъэс 12 — 14 зыныбжьхэр къырагъэ­блэгъагъэх.

КIалэхэм, пшъашъэхэм спорт лъэпкъи 9-мэ яIэпэIэсэныгъэ ащауплъэ­кIугъ, ушэтынхэр атыгъэх. КIэлэеджакIохэр къэлъагъэх, гимнастикэм хэхьэрэ шIыкIэхэр къагъэлъэгъуагъэх, гирэхэр аIэтыгъэх, дартсымкIэ зэнэкъокъу­гъэх.

— Дзэм къулыкъушIэ кIощт кIалэхэр лъэхъаным диштэу гъэсэгъэнхэм фэшI Iашэр зэрагъэфедэщтым, Калашниковым иавтомат зэпкъырахыным ыкIи аугъои­жьыным, уахътэу ащ тырагъэкIуадэрэм, нэмыкI­хэм афэгъэхьыгъэ егъэ­джэн зэхахьэхэр гъэ­шIэгъоных, — къытиIуагъ Урысыем и ДОСААФ икъутамэу Адыгэ Рес­пуб­ликэм щыIэм иотдел ипащэу Ирина Манченкэм.

IэпэIасэм иегъэджэнхэр кIэлэеджакIохэм агу ре­хьых. Граждан ухъумэгъэ­ным, сэнэхьат хэхыгъэхэм кIалэхэр афэгъэсэгъэнхэм, водителым ипшъэрылъхэр нахьышIоу къагурыIоным, нэмыкIхэм къулыкъушIэхэр къатегущыIагъэх.

Мыекъуапэ иавиационнэ спорт клубэу М. М. Громовым ыцIэ зыхьырэм Урысыем и МЧС и ГъэIорышIапIэу Адыгеим щыIэм, ДОСААФ-м якъулыкъу­шIэхэм ныбжьыкIэхэм яегъэджэн дэгъоу рагъэ­кIокIыгъ.

Зэфэхьысыжьхэр

АР-м и ДОСААФ зэ­хищэгъэ зэнэкъокъум дартсымкIэ, къэлъэнымкIэ Мые­къуапэ ия 2–рэ гурыт еджапIэ икомандэ апэрэ чIыпIэр къыщыдихыгъ. Хьакурынэхьаблэ игурыт еджапIэу N 1-р ятIонэ- рэ хъугъэ. Инэм игурыт еджа­пIэу N 25-м ящэнэрэ чIыпIэр фагъэшъошагъ.

Красногвардейскэ районым игимназиеу N 1-м, къалэу Мыекъуапэ, Адыгэ­къалэ яеджакIохэр дартсымкIэ зэнэкъокъум къащыхэщыгъэх.

КIапсэр купым хэтхэм зэпакъудыизэ кIуачIэр, къулаир, зэдегъэштэгъэныр къызэрадэхъурэр къа­гъэлъэгъуагъ. Хьакурынэхьаблэ игурыт еджапIэу N 1-м текIоныгъэр къыдихыгъ. Инэм игурыт еджапIэу N 25-м икIалэхэм ятIонэрэ чIыпIэр афа­гъэшъошагъ. Кощ­хьэ­блэ районым и Майскэ гурыт еджапIэу N 7-р ящэнэрэ хъугъэ.

Шъхьэзэкъо зэнэкъо­къухэм гиревой спортымкIэ къащыхэщыгъ Аскэр Шелобудиныр Шэуджэн районым щыщ. ЯтIонэрэ чIыпIэр зэдагощыгъ Захар Трегубовымрэ (Мыекъуапэ) Шъэумыз Инверрэ (Тэхъутэмыкъое район).

Шышъхьэ Байзэт Кощ­хьэблэ районым щыщ. Ав­томатыр зэпкъырахынымкIэ ыкIи псынкIэу угъоижьыгъэнымкIэ апэрэ чIыпIэр къыдихыгъ. Аскэр Шепобудиным ыкIи Къэлэшъэо Тамерлан ятIо­нэ­рэ, ящэнэрэ чIыпIэхэр ахьыгъэх, Шэуджэн районым щеджэх.

Пшъашъэхэри къахэщыгъэх

Гимнастикэм хэхьэрэ шIыкIэхэм якъэгъэлъэгъон хэлэжьэгъэ пшъашъэхэм ягуетыныгъэкIэ зыкъыуагъаштэ. Мыекъопэ районым щыщ Милана Лаптевам апэрэ чIыпIэр ­ыхьыгъ. Анна Скворцовам, Елизавета Негай ятIонэрэ, ящэ­нэрэ чIыпIэхэр ахьыгъэх, Тэхъутэмыкъое районым щапIугъэх.

«Скакалка» зыфиIорэ зэнэкъокъум пшъашъэхэр яIэпэIэсэныгъэкIэ къахэщыгъэх. КIапсэу агъэчэрэгъурэм гъогогъу 693-рэ елъагъ Анна Скворцовар, Тэхъутэмыкъое район. Елизавета Зарецкаяр ятIонэрэ хъугъэ, 350-рэ кIапсэм елъагъ. Елизавета Негай — 309-рэ.

ХагъэунэфыкIырэ чIыпIэхэр къыдэзыхыгъэхэм щытхъу тхылъхэр, шIухьафтынхэр аратыжьыгъэх.

— Спортым щызэнэ­къокъухэзэ ныбжьыкIэхэм яIэпэIэсэныгъэ хагъахъо, нэIуасэ зэфэхъух, респуб­ликэм итарихъ нахьышIоу зэрагъашIэ. Дзэм кIощт кIалэхэм кIуачIэр, къулаир апсыхьэх, — къытиIуагъ Адыгэ Республикэм и ДОСААФ ипащэу Барцо Тимур. — Лъэпкъхэм язэпхыныгъэ зэнэкъокъум щэпытэ.

ЕмтIылъ Нурбый.